Dissabte, 20.5.2017 03h00
La campanha electorala francesa metet la question europea au prumier plan. E mai, un còp elegit, lo president Macron comença per rescontrar la chanceliera alemanda per ne parlar. Adonc, vòle profietar de quela cronica per vos presentar un projecte europeu nuòu, entre lo liberalisme au poder e lo retorn aus Estats Nacions. La question se pausarà dins los jorns venents aus candidats a las eleccions legislativas francesas. Mas queu projecte interessa tanben los lectors d’autres país, que los tòca e que ne devem debatre per bastir ensems l’Euròpa de deman.
S’agís dau New Deal per Euròpa de DIEM 25, organizacion paneuropea creada fai un an per Yanis Varoufakis, ancian ministre grec de l’economia.Es estat elaborat dempuei 6 mes per los aderents. Vòu respondre a la crisi dobla de nòstre continent - lo sos-emplec, consequéncia de las politicas d’austeritat e la crisi migratòria - en pausar lo principi d’una resolucion europea. aitau, per DIEM 25, ni lo proteccionisme economic, ni la quilhada de barrieras a las frontieras son de las solucions.
Queu projecte progressista per Euròpa se basa sus 4 principis:
— L’accès per los europeus aus bens essenciaus (alimentacion, lotjament, transpòrt, energia) dins chada país, mai lor drech a un trabalh decentament remunerat, a l’educacion per sos mainatges, a un sistema de soenhs de qualitat e a un environament preservat.
— La transformacion de las richessas en investiments dins una economia ecologica e novatritz. Pusleu que d’estimular la competitivitat daus país e aitau la competicion entre ilhs, l’objectiu es de favorizar los sectors ecologics sus tot lo continent.
— Partejar los revenguts dau capitau, mai que mai dins una economia de mai en mai numerica onte l’automatizacion de la produccion frotja.
— Una gestion marcoeconomica democratica jos la tutela daus pòples sobeirans pusleu que dins las mans de tecnocratas.
Per arribar quilhs objectius, DIEM 25 fai de las proposicions politicas precisas:
— Controlar la finança en reglementar las opercaions bancàrias e crear una plataforma publica de paiament numeric
— Sostener las comunautats localas dins chada país emb tres programas sociaus: lucha contra la paubretat, desvelopaement de lotjaments sociaus e garentida de l’emplec
— Renovar l’euro en arrestar las politicas d’austeritat o controlar lo cost de sa disparicion si quò arriba
— Coordinacion paneuropea entre país de la zòna euro e los qu’i son pas per çò de l’economia, de la fiscalitat mai dau sociau
— Condicionar las operacions de la banca centrala a la participacion aus programas d’investiments ecologics e a las plataformas de paiament numeric publicas
— Preparar una economia post-capitalista progressista e duberta en democratizar l’esfera economica e la creacion d’un dividende minimum universau
Quelas politicas, las podem metre en plaça en partida, rapidament, sens chamjar las institucions existentas: la plataforma publica de paiament numeric, los investiments ecologics, lo programa contra la paubretat, un moratòri sus las expulsions locativas.
D’autras demandan daus acòrds entre Estats: la reforma bancària, lo programa de garentida de l’emplec, la coordinacion paneuropea de las politicas monetàrias e fiscalas. Aitau, podrem passar a una vertadiera economia post-capitalista progressista a terme mai long, emb un dividende minimum universau per partejar las richessas e de las politicas de democratizacion de l’esferas economica e financiera.
Comentaris
20 de mai 10.30h
Un bon programme de segur.
Mas avetz oblidatz qui commanda?
L'Europe, l'Euro, l'OTAN son au service daus mestres de l'Europe e dau monde occidentau. Los mestres an pas envejat de partejar lòr poder sinon Varoufakis seria enguera ministre de l'economia greca. Prener lo poder quò es çò qu'àn essaiat de far de nombrosas associacions que jamai dempuei forças annadas son arribadas au poder perque los mestres son los mestres daus juecs. Manipulan, mentan, an l'argent per paiar los medias e... Legir la seguida
Valora aquest comentari:
5
0
1
Comenta
Lo comentari es estat mandat corrèctament
Un comentari
En cargament
Un comentari
Mandar
