CAPÇALERA2: FAI-TE SOCI

Jornalet, gaseta occitana d'informacions

Divendres, 22 de març

Maime Caillon

Divendres, 13.12.2013 03h00

Escòcia fracturada


Comentaris 6 comentaris    
Dolent Fluix Bo Molt bo Fabulós (4 vòtes)
carregant En cargament


Queste mes, demoram dins un país celtic. A la seguda dau sondatge dau 1r de decembre, me demandei çò que los ecologistas escocés ne pensan. De’n primier sei ’nat veire çò que disen los ecologistas politics dau Partit Verd Escocés –partit ecologista directament afiliat au Partit Verd Europeu. Fau dire qu’au Reiaume Unit, i a pus de partit verd britanic, dempuei que los escocés e los nòrd-irlandés ne partigueron a la debuta de las annadas 90 per formar lors partits pròpis. Los verds escocés son partesans de l’independéncia. Mas totparier, vòlon marcar lor diferéncia emb lo SNP – Partit Nacionau Escocés. Queu partit presentet dins son libre blanc “lo futur d’Escòcia” coma serà l’estat escocés independent que vòu bastir. Los verds lor respond dins un document ’pelat “A Green Yes” - un òc verd.
 
Los verds an ben consciéncia que lo SNP es lo partit que deu bailejar la transicion. E mai l’acceptan. Per contra, li precisan que deu pas bloquar Escòcia dins sas chausidas politicas davant de’n aver reçaugut mandat en 2016 (per exemple per çò de l’integracion de l’OTAN a laquala s’opausan). Los verds vòlon qu’una convencion constitucionala siá elegida davant la fin de 2014 e que las chausidas institucionalas (regime politic o participacion a de las organizacions internacionalas) sián pas sortidas de l’agenda per’mor de la posicion dau govern. Parlan tanben de la necessitat urgenta d’una decentralizacion dau poder d’Edinborg vers las comunautats dins tota Escòcia, de la necessitat d’un estat de ben-èsser emb la creacion d’un revengut ciutadan, de la reduccion de la inegalitat per çò de la santat, una melhor proteccion daus trabalhadors e una politica d’imigracion mai umana. Reconeisson l’interest a cort terme de gardar la liura esterlina coma moneda. Mas per ilhs, l’independéncia vertadiera d’Escòcia passarà per una moneda pròpia e demandan au govern escocés d’estudiar la question aura. Passarà tanben per una economia facha d’entrepresas petitas, d’una finança locala, cooperativa, mutualista, d’una produccion alimentària locala. E mai, per ilhs, la revolucion de las energias renovelablas se farà pas sens decentralizacion de l’organizacion de la produccion.
 
Demòra la problematica de l’usatge de las reservas d’idrocarburs de la mar dau Nòrd. Per los verds, l’expleitacion de quelas resorças deu èsser nonmàs un trempolin vers la transicion energetica. Coma dins la resta dau monde, lo combat contra l’expleitacion dau gas d’eschiste es actualament lo mai important per los ecologistas escocés. Qu’es la principala campanha daus amics de la Terra escocés – que son coma los verds, independents daus amics de la Terra britanics. Manifesteron en octòbre davant la conferéncia annuala dau SNP per obtener l’interdiccion de la fracturacion idrolica. Obtengueron nonmàs de las zònas tampon a l’entorn daus projectes d’expleitacion.
 
L’independéncia, quitament vouguda per los ecologistas, sembla pas garentir un avenir mais juste e mai ecologic per Escòcia.



publicitat



Comentaris

16 de decembre 10.48h

#5 Aprofiete de ton comunicat Gèli, per te demandar si lo PNO a una posicion oficiala per çò daus gas d'eschiste e de la fracturacion idrolica.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

14 de decembre 09.53h

#4
Per lo referendum en Escòcia

Lo Partit de la Nacion Occitana, favorable per principi a l’independéncia d'Escòcia coma a la d’Occitània, pensa qu'aquel referendum permetrà de mesurar democraticament l’estat de l’opinion escocesa.
Espèra qu’una majoritat dels votants dirà de òc çò que metrà atal fàcia a sas responsabilitats l’Union europèa.

Lo Partit de la Nacion Occitana assegura totes los independentistas escoceses de son sosten indefectible.

Visca Escòcia e Occ... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

13 de decembre 14.55h

#1 Un mejan, efectivament. Veiram ben la via que prendràn los Escocés.

#2 Mercés !

#3 Non, ai pas d'eivis vertadier sus la question. Sei per lo referendum, de segur. Sei partesan d'una granda partida de las vudas daus verds escocés (republica, pas d'entrada dins l'OTAN, small business, descentralizacion energetica e politica, revengut ciutadan) mai partege l'inquietud daus amics de la Terra escocés sus la fracturacion idrolic.

La darriera frasa sintetiza mon biais de pensar. Emb lo SN... Legir la seguida


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

13 de decembre 13.58h

Se t'ai plan compres amic Maime Caillon sès per l'independéncia d'Escòcia ...
Quand te mobilizaràs tanben per l'independéncia d'Occitània serai encara mai d'acòrdi amb tu quitament s'avèm de divergéncias.


Valora aquest comentari:   votar positiu 3   votar negatiu 6
Respondre comentari replica Comentari inadequat   Formulari d'abús de comentari

13 de decembre 12.33h

Sempre m'es un plaser de legir las tiás analisis finas que pertòcan l'ecologia en lenga nòstra.

Brave Maime!


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

13 de decembre 11.09h

L'independéncia es un mejan, non una fin, e pensi que las proposicions dels Verds d'Escòcia son fòrça interessantas. Veirem ben çò que decidiràn los escoceses (ara per ara l'independentisme es minoritari, çò'm par) mas cresi que, cossí que siá, un país independent es pas la proprietat d'un partit mas d'un pòble que pòt puèi preferir las idèas que li agradan mai.


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: IEO Label ÒC

Perfil

Maime Caillon

Maime Caillon logo rss

Engenhaire de formacion, militet dins mai d'una associacion ecologista dempuei sos 19 ans.

mai d'informacions

contactar l'autor

Categorias

Mai d'articles

Archius




D'autres articles


Jornalet, gaseta occitana d'informacions