Bandièra01 1180x150: Comuna de Tolosa

Opinion

Ucraïna e la tripla crisi ecologica

Maime Caillon

Maime Caillon

Engenhaire de formacion, militet dins mai d'una associacion ecologista dempuei sos 19 ans.

Mai d’informacions
Dins sa cronica Earth Insight dau 28 de feurier, lo jornalista britanic Nafeez Ahmed presentet una analisi de las revòltas popularas recentas - Ucraïna, Veneçuela, Bòsnia, Islàndia, Tailàndia - emb un punt de vuda ecologista  (avetz la traduccion Reporterre). Una analisi que presenta las crisis alimentària, energetica e climatica coma las causas de quelas revòltas. Las remarcas d’un lector nòrd-catalan dau Jornalet - sus lo tractament de la crisi ucraïnesa - me balhet envia de ne’n parlar dins ma cronica emb queu punt de vuda especific.
 
La prumiera causa que Nafeez Ahmed identifia es la crisi alimentària. Vos aviá desjà parlat dins un article de 2012 de la concurréncia entre doas utilizacions de la produccion agricòla: l’alimentacion umana e la fabricacion d’agrocarburant. Queu factor liat a l’especulacion sus las terras agricòlas, mena a l’aumentacion daus pretz. En Ucraïna, quela aumentacion a’gut un impacte negatiu sus las exportacions de cerealas, çò qu’intensifiet la paubretat mai que mai en vila. L’inflacion, au contrari de çò que pòden dire las autoritats, es plan importanta e los Ucraïnés despensen 75% de lors revenguts per las facturas correntas.
 
Segonda causa: la crisi energetica. Ucraïna’ribet a son pic de produccion petroliera mai gasiera en 1976. Auei es un importator net d’energia. E mai 80% de sos importacions venen de Russia. Lo pretz dau gas rus, que quadruplet en dempuei 2004, es tanben un dau factor de l’inflacion que coneis lo país. Nafeez Ahmed vei pas d’alternativa ni dins lo gas d’eschiste, ni mai dins lo nuclear (un rapòrt de la Banca Europea per la Reconstruccion e lo Desvelopament (BERD) revela que los 300 millions d’euros prestats per renovar los 15 reactors vielhissents doblarà lo pretz de l’electricita d’acianta 2020). De notar que la produccion agricòla actuala es dependenta de las energias fossilas: adonc las doas crisis agricòla e energetica son liadas e s’alimenten.
 
Tresesma causa: la crisi climatica. La premsa japonesa desvelet un projecte dau segond rapòrt dau Grop d’Experts Intergovernamentau (GIEC): estima que dau temps que la demanda alimentària vai aumentar de 14%, la produccion agricòla baissarà de 2% tots los 10 ans per’mor de l’eschaufament climatic. Queu scenario es basat sus un eschaufament de 2.5°C çò que sembla plan prudent a Nafeez Ahmed.
 
Ucraïna, coma mai d’un país dau monde, se tròba fàcia a las consequéncias socialas de la tripla crisi ecologica: alimentària, energetica e climatica. Se tròba tanben, per’mor de quelas crisis, au centre de la confrontacion imperialista entre Occident (Union Europea e Estats-Units) e Russia: lo contraròtle daus pipelines qu’alimenten Euròpa en gas rus.
 
Las revòltas que vesem de pertot, en Ucraïna mai alhors, aportaràn malaürosament pas la solucion a quelas crisis. Sem a sortir de la civilizacion dau carbòni, e deuriam nos preparar, nos adaptar, acompanhar los chamjaments, pusleu que de los subir.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Maime Limòtges
2.

#1 Parlaria pusleu de productivisme en generau (adonc de capitalisme en particulier).

L'analisi ecologista nos ditz pas que fau surtir dau productivisme (adonc dau capitalsime) mas que nos sem a ne'n surtir. La question es : coma ? Sia nos organizem per ne'n surtir d'un biais democratic en garantizar un biais de viure acceptable per l'ensems daus pòples dau monde. Sia iò fasem pas, e la surtida serà violenta, emb de las crisis socialas de las grevas e nos menarà vers daus regimes autoritaris o benleu totalitaris.

Coma sei mai que mai de mança, emb un "background" marxista, diria pusleu "ecosocialisme o barbaria". Perque lo communisme stakhanovista nos menarà a la catastròfa tan coma lo capitalisme actuau.

  • 0
  • 0
socialisme o barbaria santa teresa
1.

donc en conclusion que devem d'ara d'ara sortir deu capitalisme.

  • 3
  • 2

Escriu un comentari sus aqueste article