Bandièra01 1180x150: Comuna de Tolosa

Opinion

Bob Marley, abantes des polhs e des dreadlocks

Marc Espí

Marc Espí

Neishut en Garòs (Val d'Aran), estúdie audiovisuaus en Barcelona. Guitarrista e passionat pera musica, mès que mès era restacada damb era cultura urbana e underground; sustot reggae, soul, brit pop e mod revival.

Mai d’informacions
Eth passat 29 de junh s'estrenaue eth film Marley, dirigit per Kevin Macdonald e produsit per Cowboy Films, Shangri-La Entertainment e Tuff Gong Picture.
 
Marley ei un documental que tracte era figura deth cantant de reggae mès mercant dera istòria.
 
De Robert Nesta Marley tot ei ja escrit, mès tot soent trapam a mancar materiau e contenguts sus es sues origines de com un joen jamaican d’un barri conflictiu e damb estètica rudeboy, deishe crèisher es sòns peus e dedique eth 80% dera sua òbra musicau a Jah.
 
Jos eth nòm rudeboy s’amasse ua subcultura erigida en Jamaica enes anades 60 qu’auèc ua fòrta influéncia ena joenessa des barris mès praubi dera isla e enes pòbles. Aqueri joeni eren amants dera musica ska autant com eth calypso e autes musiques neres. Tamben gaudien des hèstes, dera violencia e des valors e actituts des gàngsters que vedien en es films dera epòca.
 
Tot a non pertanher a familhes damb sòs, precisament, es rudeboys se petaçauen entà poder vestir de manèra eleganta, e podèr visitar ath barbèr quan eth peu començaue de crèisher.
 
Bob Marley siguèc clarament influenciat per aguest movement e amassa damb Peter Tosh e Bunny Livingstone bastís un conjunt vocau de ska que previament s'aperarie The Teenagers e definitivament adoptarien eth nòm de The Wailers.
 
Ei en miei des anades 60 quan comencen d'enregistar singles damb eth mític estudi Studio One. Pendent 1963 e 1966, enregistren diuerses cançons, entre eres probablement era mès famosa en clau ska des Wailers: Simmer Down.
 
Aguesta prumèra compilacion la complementen 5 temes més que s'agrupen sus eth nòm Simmer Down: At Studio One.
 
Personauments, destacaria un primerís One Love, que pòc a a vèir damb era cançon der àlbum Legend (1984) e Lonesome Feelings, que juntament damb Simmer Down son es temes mès animats deth trebalh.
 
En 1970, ja damb era musica jamaicana en tot trionfar non sonque ena isla, se non que tanben en Gran Bretanha, Leslie Kong produís ara banda eth dusau trebalh que s'aperarie Best Of The Wailers. Un total de 10 cançons formen aguest segon liurament des Wailers on ja trapam ua transicion deth prumerís ska ath reggae.
 
Non deishe d'èster ua bona obra, on trapam jòies coma Go tell it on the Mountain, damb Peter Tosh coma veu principal o Stop That Train.
 
Pòc a pòc era banda abandonèc eth gènere skatalitic e en prenèc consciéncia deth movement rastafari;  transformeren era sua manèra de hèr musica.
 
Per se quedèssen dubtes, barram er article damb era cançon que més clar mos mòstre aqueri prumèri ans on Marley passejaue pes carrèrs de Trenchtown damb eth peu cuert, ben rasat e abilhat damb vestit.
 
Ne mès ne mens, s’entitole Rudeboy, mes dempús Marley la rehèc en tot aperar-la Rebel's Hop e temps mès tard coma Walk into the proud Land, en tot interpretar-la de forma mès pausada.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Rasta Barba Canebièra dau pintaç
2.

Legir aquèlei cauvas en occitan es cool !

  • 6
  • 0
Joan Marc Leclercq
1.

Òsca ! Un còp de mei un artícou brilhantissime ! Mercés.

  • 12
  • 0

Escriu un comentari sus aqueste article