Bandièra01 1180x150: Comuna de Tolosa

Opinion

The Cigarettes

Marc Espí

Marc Espí

Neishut en Garòs (Val d'Aran), estúdie audiovisuaus en Barcelona. Guitarrista e passionat pera musica, mès que mès era restacada damb era cultura urbana e underground; sustot reggae, soul, brit pop e mod revival.

Mai d’informacions
Adam Palmer, Steve Taylor e Rob Smith sigueren 3 gojats deth comtat de Lincolnshire que ena fin des ans 70 reberen eth còp de dues ondades culturaus juveniles emergentes en Reiaume Unit: eth punk e eth mod revival.
 
Era particularitat des subcultures sociaus, ei que totes cerquen de diferenciar-se dera societat "normau" e sustot des autes subcultures.
 
Es tres joeni, popèren d'aguestes dues vessantes musicaus e en tot cercar er individualisme, saberen fusionar era elegància venguda deth revival mod damb eth dinamisme violent e radicau que definís eth punk.
 
Eth resultat ei The Cigaretes, ua banda que non se pòt classificar en cap des dus subgèneres, e un des motius ei que siguèc un conjunt efimèr (1979-1981) que desapareishèc abantes d'enregistrar cap d’LP.
 
Çò que òc enregistreren sigueren dus EP's: "The Cigarettes: They're Back Again, Here They Come" e "Can't Sleep at Night".
 
Eth prumèr d'eri amasse 3 tèmes: I've forgot my number (now I'm telling you my name), All we want is you money e era cançon que da nòm at 7'' They're Back Again, Here They Come.
 
Er EP veiguèc era lutz er an 1979 e siguec enregistrat e produsit pera casa Company Records.
 
Siguec un EP que non causèc guaire repercussion en panorama musicau britanic, pr’amor que pendent aguesti ans era formacion e aparicion de bandes puraments punk o deth gènere 2tone ere çò que triomfaue e The Cigarettes, tot ac cau díder, auien bastit ua estetica e ua manèra de hèr musica fòrça particulara.
 
Er an següent, era banda signèc entà grabar eth segon EP que compde solet damb 2 cançons.
 
Ena fàcia A deth disc i trapam eth tema que da nòm ara òbra: Can't Sleep at Night mentre que en costat B sòne It's The Only Way To Live (Die).
 
Totes dues se mòstren més pausades qu’es qu’aparèishen en prumèr disc, damb un tòc progressiu mès sense arribar a àster tant rapides coma es prumères composicions.

Entà enregistrar aguesta segona òbra, eth grup cambièc de casa discografica entà firmar per Dead Good Records.
 
S’ena epòca, eth parelh de disqui que treiguèren non gaudiren d'un extremat succés, aué en dia son cercats tant pes amants dera musica punk coma pes mods mès aficionats as rarities e ath revival.
 
Malerosament eth madeish an de trèir eth segon EP, 1980, The Cigarettes abandonèren eth mon dera musica e en dia d’aué eth public encara ne desconeish es motius.
 
En definitiua, ua banda que coma ditz eth sòn nòm, siguèren tant efimèrs coma ua cigarreta. Coma ditz er arrepervèri: “Quan a estat bona era prua? Quan non n’i a auut sonque ua.”

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Randy Barcelona
2.

Bon descobriment i bon article Marc!

  • 5
  • 0
Batko
1.

Mercés au Marc un còp de mei qui’ns hèr descobrir aquestes hilhs espirituaus deus Jam.
Se n’as d’autes atau, n’as pas a prémer, podes enviar !!!

  • 7
  • 0

Escriu un comentari sus aqueste article