Bandièra01 1180x150: Comuna de Tolosa

Opinion

Manual Scan

Marc Espí

Marc Espí

Neishut en Garòs (Val d'Aran), estúdie audiovisuaus en Barcelona. Guitarrista e passionat pera musica, mès que mès era restacada damb era cultura urbana e underground; sustot reggae, soul, brit pop e mod revival.

Mai d’informacions
Un des aspèctes mens coneishut deth mod revival o deth 2 Tone son es bandes deth genre sorgides enes Estats Units. Era màger part de grups d'aqueth corrent musicau apareishèren en Anglatèrra, qu'ère a on se generèc eth boom a compdar des darrèrs ans dera decennia des 1970.
 
A finaus des 1980 e enes 1990 comencèren d'aparèisher bandes estatsunidenques que seguien era influència deth revival, mès un des grops pionèrs dera scena yankee siguèc Manual Scan, que sorgic en plena epòca revival.
 
Bart Mendoza, Kevin Donaker, David Heminger e Paul Kaufman fonderen era banda en San Diego en an 1981.
 
Era casa de disqui Dance and Stance siguèc era responsabla de balhar at public eth prumèr EP des californians en 1982. Pòrte per títol “Plan of Action” e lo compausen 5 tèmes.
 



 

 

 
F.A.B Records compdarà damb eth grup entà enregistrar un split amassa damb The Risk. Es cançons dera part de Manual Scan siguèren era ja nomentada “Plan of Action” e “We Still Feel the Same”.
 

 
Eth hèt d'enregistrar aguest split e que F.A.B Records siguèsse ua entrepresa britanica, ajudèc ara expansion des musicians qu’arribèren a Euròpa en tot desembarcar en Reiaume Unit.
 
Manual Scan comencèren alavetz ua seguida de virades per Anglatèrra e tanben per Espanha, a on tot just començaue eth Revival amasa damb era “movida madrileña”.
 
En an 1989 Manual Scan torne a trèir un EP, aguest viatge dera man de Circle Sound, damb estudi ena ciutat natau des gojats. “The Lost Sessions” balhèc 4 naues cançons ath public.
 

 

 

 
Passaràn 2 ans e era banda presentarà eth sòn darrèr album intitolat “Days and Maybes...”. Un EP de 6 tèmes entà finalizar era sua carrèra musicau ja que pòc dempús de lançar eth disc, Manual Scan quitèc es scenaris e se dissolvec.
 
Malerosament, sus Internet non è pogut pas trapar es cançons d'aguest darrèr album (autant coma bèra ua des EP's anteriores).
 
En 1997 gesseràn en format CD dues compilacions. Era prumèra pòrte eth madeish nòm qu’eth prumèr trebalh que treigueren e siguec produsida per Snap! Records. Era segona s’intitole coma un des sòns prumèrs tèmes: “All Night Stand” e la treiguèc eth sageth Get Hip Recordings.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Brissauda Banha cauda
1.

Que dire de mai ?
Excellent article... coma de costuma !

  • 3
  • 0

Escriu un comentari sus aqueste article