CAPÇALERA: Eth Ligam occitan Youtube

Jornalet, gaseta occitana d'informacions

Dijòus, 6 d'agost

Matieu Casanòva

Dijòus, 9.7.2015 03h00

Après la lenga, l’accent?


Comentaris 6 comentaris    
Dolent Fluix Bo Molt bo Fabulós (18 vòtes)
carregant En cargament


La mòrt de Charles Pasqua a balhat l’ocasion a un grand mèdia de se trufar, un còp de mai, de “l’accent dau Miegjorn”. D’efiech, le Lab d’Europe 1 aprofechèt la desaparicion de l’ancian ministre per prepausar sus la tela un “Tòp 7 dei politicians capables de remplaçar l’accent de Charles Pasqua”. Sigam clars, es pas question aicí de defendre l’accion passada ni la memòria d’un òme que son ideologia politica èra jacobina e pròcha de la drecha extrèma. Pasmens es pas una rason per se laissar insultar un còp de mai. Dins lo fons coma dins la forma, aquel article nos sembla de condamnar.
 
Bèu primier, lo mèdia francés precisa a sei legeires que Pasqua aviá l’accent “dau Sud, còrs per èstre mai precís”. Pasqua es efectivament còrs d’origina, mai es nascut a Grassa, en Provença. Mesclar leis accents còrs e provençau, es una valentiá que pòu complir solament una redaccion parisenca, tant la sonoritat dei dos parlars es diferenta. Un còp passada aquela remirabla introduccion, Europe 1 prepausa una compilacion d’òmes e fremas politicas de l’accent curiós. Dins sa lista, d’elegits biarnés, tolosans, marselhés… amb d’exemples vidèo e de comentaris ben causits. Aprenèm que Jean-Michel Baylet “ajusta fòrça consonantas a la fin dei mots” (“je trouveuh; la maing dans la maing” sic). Mai luenh dins lo classament, Patrick Menucci e Jean-Claude Gaudin, elei, “semblan sortits de la Glòria de mon Paire”. Francament, i a pas pron de causas de dire sus aquelei dos personatges de la vida politica marselhesa per se trufar de lònga de son accent? Aparentament, non. Basta pas d’aver enfrominat lei lengas dau territòri de la republica e umiliat de generacions de locutors. Fau tanben metre l’accent (es lo cas d’o dire) sus lei darrierei traças d’occitan dins nòstre biais de prononciar lo francés.
 
Es pas lo primier còp que lei mèdias se trufan de l’accent meridionau. Es pas lo darrier tanpauc. Aquelei que comprenon pas nòstra colèra nos acusan sovent de pas aver pron d’umor, de pas acceptar la galejada. Per nautres çò qu’es de mau acceptar, es lo fach que çò que fa ben rire quand s’agís de “francés dau sud”, pòu èstre considerat coma de racisme (e a just títol!) quand pertòca una autra comunautat. E, per exemple, leis mèdias francés ausarián faire una lista dei personalitats de l’accent maugrabin o de l’accent african? Ont es lo limit entre trufandier e racista? Que son lei critèris dei redaccions de la capitala? Quand de temps encara faudrà suportar la bestiesa e l’ignorància deis elèits dau Nòrd? Siam en 2015 e lei parisencs son encara persuadits de parlar sensa accent. Fau pas èstre lingüista per saber que dau moment que parlam, avèm forçadament un accent. Es verai que per comprene aquò, faudriá considerar lo fach que sa cultura, son biais de parlar, de pensar, d’escambiar… es pas forçadament la nòrma unica de referéncia. Sabon pas que parlam una autra lenga que l’oficiala, comprenon pas que parlam un francés diferent. Tan pieg per elei, nautres contunham nòstre camin e nòstra lucha còntra l’uniformizacion.



publicitat
BANER1: Amics campanha covid



Comentaris

13 de julh 18.21h

Tè! veni tot escàs d'ausir a la radiò ''la langue d'oc c'est le français du sud'' Cresi que 'quò's un medievista que parla... :(


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

13 de julh 01.26h

Tant que sarà ensenhada a l'escòla una Istòria de França d'a rebors ;
tant que i aurà de professors de collègi e de licèu que saràn d'acòrdi per l'ensenhar d'aquel biais ;
tant qu'aqueles ensenhaires (franchimands o non) corregiràn per deca lo jove que legís e parla francés emb de l'accent occitan (e òi !) ;
tant que laissarem s'enracinar dinc l'enconscient collectiu lo mite de la França eternala ;
tant que de travalhadors se sentiràn moquets d'aveire l'accent davant lur practica... Legir la seguida


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

10 de julh 12.18h

Segon ieu, l'accent occitan del francés es un caractèr nòstre, mas en cap de cas deu èsser un caractèr de determinacion de l'occitanitat. Es la lenga nòstra que deu prene aquesta plaça. L'accent occitan en francés deu pas èsser lo combat de l'occitanisme.

Tanben parlar de l'accent "du sud", "marseillais", "provençal" o "méridional" reven a se trencar de la partida nòrd d'Occitània ont sovent l'accent natural en francés de las gents es pas identificable facilament.

Tanben cal dir... Legir la seguida


Valora aquest comentari:   votar positiu 9   votar negatiu 3
Respondre comentari replica Comentari inadequat   Formulari d'abús de comentari

9 de julh 11.45h

E mai sovent parlarem occitan, e mai servarem l'accent. Doncas... "Cau ten la lenga ten l'accent que dei cadenas...


Valora aquest comentari:   votar positiu 8   votar negatiu 0
Respondre comentari replica Comentari inadequat   Formulari d'abús de comentari

9 de julh 09.44h

Òc e un dvd important: "Le complexe du santon" ne'n parla fòrça fòrça d'aqueu racisme anti occitan...
Senon un article "France, français, accent et orthographe" de Revest L trobable sus internet.
E veguèri passar sus un blòg una tièra tota de citacions de celebritats francesi (escrivans, pensaires, jornalistas) emb pron de "clichés" chauvinistas anti occitans... dedins LF Célina, etc..


Valora aquest comentari:   votar positiu 6   votar negatiu 0
Respondre comentari replica Comentari inadequat   Formulari d'abús de comentari

9 de julh 09.25h

E ben cresi que vam poder a nòste torn escarnir l'accent de 'queths Pèrisians khi croient kh'ils ont pè d'èksont. :D


Valora aquest comentari:   votar positiu 7   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Matieu Casanòva

Matieu Casanòva logo rss

Licenciat d’Istòria a l’UPPA (Bearn), ancian jornalista de Ràdio País, ara sòci de l’Ostau dau País Marselhés.

mai d'informacions

contactar l'autor

Categorias

Mai d'articles

Archius




D'autres articles


Jornalet, gaseta occitana d'informacions