Dissabte, 18.5.2013 03h00
En aqueste segond episòdi dedicat a l’origina dei colors de malhòts, vos prepausi de nos passejar en l’Estat espanhòu e tanben en Argentina.
D’en primier parlem de Blaugrana. L’escais famós dei jogaires dau Barça mòstra fierament lei colors dau club: blau e granat. Una istòria pas jamai confirmada oficialament ditz qu’es lo fondador dau club, lo soís Hans Gamper, qu’aviá causit lei meteissei colors qu’aquelei de l’FC Basel, club per lo quau aviá, bensai, jogat quand èra mai jove. Una version recenta parla d’un autre estrangier que participèt a la creacion dau Barça, l’alemand Otto Maier, que lei colors de sa comuna d’origina èran lo blau e granat.
En cò de l’enemic, a Madrid, se lo blanc dau Real es ben conegut, lo roge e blanc raiat de l’Atlético es un omenatge au club de Southampton, perque lo club foguèt creat per de joveis estudiants britanics. Lo club basco de l’Athletic Bilbao pòrta tanben lo roge e blanc e es pas un azard perque a la debuta dau sègle, lo fornidor s’enganèt en li mandant lei malhòts de l’Atlético Madrid. Dempuei, Bilbao a gardat aquelei colors.
Per acabar amb Madrid, lo Rayo Vallecano, basat dins lo quartier popular de Vallecas, s’es fach impausar la color blanca après lo restacament dau canton a la vila. Per se diferenciar dau Real, lei menaires dau Rayo an apondut una benda diagonala roja sus la camiseta perque i aviá a aquela epòca un acòrd amb lo club argentin de River Plate.
Puei que parlam de River Plate justament, coma es arribada aquela benda roja? Dison qu’en 1908, pendent lo Carnaval de Buenos Aires, quauquei joves recuperèron un riban de seda roja d’un carri per lo pausar sus lo malhòt. Lei colors foguèron lèu adoptadas per la populacion dau quartier, a majoritat d’origina genoesa, puei qu’èran tanben lei colors dau drapèu de Gènoa.
A la meteissa epòca, lo fraire enemic, Boca Junior, auriá, eu, causit sei colors en apercebre au luenh dins lo pòrt un batèu suedés, lo Drottning Sophia. Pòrta dempuei una polida tunica blava raiada de jaune.
Comentaris
18 de mai 21.12h
Mercés Mathieu Casanòva per aquestes articles sul fotbòl que, cada còp, me fan èsser mens pèc sus aqueste espòrt que m'es desconegut, e la siá cultura.
Valora aquest comentari:
4
0
18 de mai 13.21h
#2 Ben l'Atletic es fondat en 1898 e l'Atletico en 1903. Logicament, l'un a copiat sus l'autre, e deu èstre lo mai joine.
Per lo Barça siau segur a 100% que ven dau FC Bâle que Hans Gamper n'èra tanben un jogaire. Emai lo nom, FCB per lei dos clubs... Ai vist que d'unei catalans francofils assajan d'explicar lei colors per un omentage a la França republicana. Qunta galejada...
PS : "El 26 de abril de 1903, un grupo de estudiantes vascos de la Escuela Especial de Ingenieros de Minas, form... Legir la seguida
Valora aquest comentari:
3
0
18 de mai 12.42h
Ai legit lei dos !
Per lo barça, es tra que complicat. Ai tanben legit que lo president a causit lei colors perque aviá un estilo blau e granat. Improbable mai bòn ..
Valora aquest comentari:
4
0
18 de mai 12.38h
Precision : Es Bilbao que prenguèt lei colors de Southampton. L'Atletico Madrid eu, foguèt fondat per d'estudiants bascos de Bilbao. Es per aquò que prenguèron lei colors e lo nom dau club de sa vila d'origina !
Valora aquest comentari:
4
0
1
Comenta
Lo comentari es estat mandat corrèctament
4 comentaris
En cargament
4 comentaris
Mandar
