Bandièra01 1180x150: Comuna de Tolosa

Opinion

Lo FN en via de "normalizacion"

Matieu Casanòva

Matieu Casanòva

Licenciat d’Istòria a l’UPPA (Bearn), ancian jornalista de Ràdio País, ara sòci de l’Ostau dau País Marselhés.

Mai d’informacions

Complicat de díser per avança que seràn los resultats deu segon torn de las legislativas dimenge. Mes ei probable d'assistir au tornar de l'extrèma dreta a l'Assemblada Nacionala. Son cinc candidats en balotatge favorable, qui 3 en Occitània: Marion Maréchal Le Pen en Vauclusa, Valérie Laupies en Bocas de Ròse e l'exuberant Gilbert Collard en Gard. Per Valérie Laupies, l'UMP Roland Chassain que l'a facilitat lo tribalh en se desistant, per paur de véder elegit tornar lo president socialista de PACA, Michel Vauzelle.

Après quauquas annadas de pausa, ei donc lo retorn de la tactica de la fin de las annadas 90, quan candidats de la dreta esitavan pas a anar pescar las votz deu FN e a formar, de hèit, alianças dab eth. Ei pas Nadine Morano qui diserà lo contrari, l'anciana ministra a installat son burèu personau a Minute aquesta setmana. En lo quotidian d'extrèma dreta, apèra a l'"union sacrada" per bàter l'esquèrra, argumentant que lo PS se geina pas per har d'alianças dab l'extrèma esquèrra qui "vòu la legalizar lo cannabis". Botar suu medish nivèu de dangerositat la legalizacion de l'èrba e la xenofobia assumida deu FN ... a pas paur deu ridicule l'ex fan de Nicolas.

La dreta enfin amassada! Lo saunèi de Marine Le Pen qui ei a se realizar quauques mes sonque après la caduda de Sarkozy. "La dreta republicana ei morta", ce comentan quauques uns. Mes ei vertaderament antirepublican lo Front National? Aquò depen de la definicion que balham de republican, evidentament. En França, Estat jacobin, lo mot Republica ei sacrat e quasi sinonime de democracia. La Republica francesa garanteish efectivament un sistèma de vòte democratic - e totun criticat e criticable-, mes podem pas denegar tanpòc qu'aquera Republica ei representada per valors patrioticas e/o nacionalistas francesas, per una unitat territoriau blua/blanca/roja centralista, que lo FN n'ei un deus partisans mei actius.

Lo FN elegit a l'Assemblada, èra pas mei arribat despuish 1986, quand Mitterrand apitava la proporcionala e que l'extrèma dreta amassava 35 deputats. Òmis politics favorables au retorn d'aquera proporcionala ploravan aquesta setmana per lo malur deu FN, pas encara assegurat d'estar representat maugrat sons 13% a las eleccions. Per Daniel Cohn Bendit, que los qui son demorats revolucionaris apèran pas mei Dani lo roi mes Dani lo jaune, "lo FN a l'Assemblada, ei lo prètz de la democracia". Per Francés Bayrou tanpòc, un parlament shens FN, ei pas normau.

Efectivament l'argument de la representacion politica ei valedèr. Mes çò que cau retiéner prumèr d'aqueras paraulas, ei la banalizacion sancèra de l'extrèma dreta e de sas posicions politicas. Lo FN vòu lo tornar de la pena de mort? Considèra que l'avortament ei un luxe? Escopeish suus drets deus omosexuaus e de las hemnas? Vòu pas mei d'estrangèrs en aquera França "blanca e catolica"? Aquò pausa pas nat problèma a una bona partida de la classa politica franchimanda, ni aus mèdias francés qui s'embarassan pas mei d'aqueras questions. Marine Le Pen s'estona, cada dus mes, de descubrir qu'un candidat FN ei tanben un militant nèo-nazi, e se devem contentar de la créder.

Fin finala, los esfòrçs deu sègle 20 per educar los ciutadans son pauc a pauc a se desagregar e se uèi ei permetut de díser que los estrangèrs considerats com lo mau etèrne an pas ren a foter a noste, doman perqué pas, tornarà com au temps deu colonialisme lo sentiment de har partida d'una raça superiora. La resulta d'una aculturacion recurenta de la populacion qui malurosament boicòta tròp sovent los cors de gimnastica intelectuala.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Castèths Lanas Negas
12.

#11 Plan d'accòrd, qu'es com los dont cassèvan lo curè dab lo fusilh quen arribèva a socasi. De qué avèn paur, d'estar convincuts ?

  • 0
  • 0
Jacme Tolosa
11.

Manifestar contra los "identitaires" fabrica mai d'"Identitaires", o lo FN.... mas a qunt endreit podèm contra-argumentar ? I a pas un mèdias occitans qu'o farà ambe justícia e realisme ; e quora o farà serà castuigat per zo aver assajat... L'extremisme de dreita ajuda l'extremisme d'esquèrra, mas ajuda pas la societat normala ! E vica versa.
Lo darrièr còp qu'ai poscut argumentar contra lo FN èra sus un mercat, aquel de Pessac ; en fàcia l'avocat de Jean-Marie Le Pen ; al cap de trenta minutas son sortits (èra un grope FN) del mercat e an cambiat de botiga. Mas per pas encontrar lo FN, los autres militants nacionalistas franceses an fugit (benlèu per preparar manifestacion contra lo FN ?) al moment d el'anóncia de l'arribada dels militants FN, la rumor.
Abans l'encontre ambe Mèstre Colombier, a l'epòca conselhièr regional d'Aquitània en companhiá virtuala d'un felibre plan conegut en Biarn e president de l'IGB (me sembla encara ara), aviam dificultats per distribuar los tracs d'Unitat d'Òc, aprèp es estat talament aisit que n'aviam pas previst pron.
Èri en companhiá de dos militants de la CGT poste, que els volián pas saludar lo FN ; los ai forçat, e an capitat de comprendre aprèp donc...
Ai d'autres exemple de luòc qu'ai acarat l'argumentcion del FN ... mas pas ambe las manifestacions dels nacionalistas d'esquèrra francesa.

  • 1
  • 0
Nouguier Patrick
10.

Matieu Casanova a rason quand parla del FN e pense que sèm totes d'acòrdi per dire que lo cal combatre.
Pasmens lo cal combatre al nivel politic e pas en l'empachar d'aver d'elegits.
La manca de democràcia dins aqueste païs fa pujar lo FN e pas lo contrari.
Los dos grands partits que senhorejan son responsables d'aquela situacion
e los cal pas esparhnar.
Patrick Nouguier

  • 5
  • 0
Maime Limòtges
9.

Una analisi plan bona, mas sei pas de consent sus un punt. La concepcion republicana francesa es nacionalista, sem de consent. Mas lo nacionalisme dau FN es pas lo mesme. Es l'eiretier dau monarchisme, de l'ultracatolicisme, daus contrarevolucionaris. Contunha l'afrontament entre borgesia liberala e aristocracia conservatritz. Mai recentament, ço que me sembla marcar la diferéncia entre drecha republicana e l'extradrecha es la segonda guerra mondiala. La drecha republicana, nacionalista e eiretiera de la revolucion francesa, era a Londres, era resistenta. L'autra era darrier Pétain. E la drecha republicana, au nom de sa vesença de la Republica, a pogut trabalhar dins lo CNR emb daus comunistas, republicans tanben, per farjar un compromés sociau fondator de çò que volian per lor Republica.
Lo FN, e aura una partida de l'UMP, son pas partesans de quela ideia de la nacion francesa, coma Republica eiretiera de la revolucion e de la resisténcia. Es un autre nacionalisme, una autra concepcion pas tant democratic que lo daus republicans.

  • 4
  • 0
Castèths Lanas Negas
8.

Non mes shens peguejar, com pòdetz díser que sui "anti-independentista" ? En Ecòssa, en Belgica, en Catalonha, que pòden estar anti-independentista mes ací... N'atz pas nat pes !! Ne sui pas anti-independentista, que sui trufandèr !
Mes shau, que'm trufi dab un hèsh d'arrespèct ! Unqüèra un esfòrt e que'n serèi auntant com vos.

  • 1
  • 0

Escriu un comentari sus aqueste article