CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Dimècres, 18 de setembre

Mireia Boya Busquet

Dissabte, 16.5.2015 03h00

Dàvid e Goliat (sus era naua e era vielha politica)


Comentaris Pas cap de comentari    
Dolent Fluix Bo Molt bo Fabulós (10 vòtes)
carregant En cargament


Eth pròplèu 24 de mai son es eleccions municipaus enes Ajuntaments dera Val d’Aran e tanben en sòn maximal òrgan de govèrn, eth Conselh Generau d’Aran. Vos pogui ben assegurar que damb era aparicion deth nau partit assembleari Corròp per Aran, se presenten fòrça moigudes e interessantes, donques es corropaires son vengudi entà trencar eth bipartidisme damb naues manères de hèr e decidir, en tot mercar un cambi entre era naua e era vielha politica.
 
Vielha politica ei hèr òbres e melhoraments en epòca electorau, ua pratica abituau en TOTI es pòbles dera Val. Carrèrs lheuadi, pònts que s’aparien, flors que se planten, servicis que se daurissen... Tot se passe eth darrèr mes de campanha. Coriós. Es que manen compden damb era memòria a cuert termini des vesins e vesies e dilhèu, qui sap, tanben mos prenen per pècs. Era naua politica ei planificar es quate ans en tot campar er interés generau, decidir es òbres en assemblades populares, hèr pressupòsti participatius, dar compdes ara fin der an de çò que s’a hèt e, sustot, deishar era improvizacion tara ora de sopar, non tath futur des pòbles.
 
Vielha politica ei non voler potenciar es iniciatiues des vesins e vesies, ne dera oposicion politica, se er Ajuntament non se pòt penjar es medalhes. Es prepauses e es projèctes gessen sonque deth consistòri e encara que les poguen realizar professionaus aranesi e araneses, s’encomanen a empreses de dehòra. E ei qu’en Aran, encara mos pensam qu’era nòsta gent non ei pro preparada, que non a credibilitat ne capacitat entà hèr. Era naua politica apòste pera intelligéncia collectiua en tot hèr corròp, hugís de lutes partidistes e de politiques fondamentades en deshèr aquerò qu’era oposicion bastís, encara que sigue bon tath pòble. Èm era generacion mès preparada que jamès a agut era Val d’Aran, ei eth nòste temps entà sajar de bastir amassa, en positiu e tà toti e totes, des d’acieu. Dauritz-mos eth pas.
 
Vielha politica ei compréner eth cargue elegit coma ua carrera professionau, setiar-se en ua cagira ans e ans entà hèr e deshèr coma senhors feudaus, en tot enténer era institucion der Ajuntament o deth Conselh coma un fèud pròpri, barrat as vesins e vesies e ath debat public. En Aran auem quauqui cacics que pensen que sense eri eth mon deisharà de virar. Era naua politica limite mandats e salaris, e enten es cargues coma un servici public ara comunitat e per interés generau de toti e totes.
 
Vielha politica ei era des amiguismes e favors personaus, que mès endeuant se vieràn vòtes, e tanben era que fomente es clans e non era libertat d’idèes e decision laguens des familhes. Era naua politica ei assemblearia, participatiua, egalitària e transparenta. Des persones entàs persones. A on laguens d’ua familha podem non sonque votar partits diferents senon tanben èster candidats.
 
Vielha politica ei era des granes, sonades e damb un naut còst, campanhes electoraus. Dipctics de programa, creions, mochets, adesius, coches que se passègen pes pòbles, banderòles damb es cares des candidats en toti es fanaus, enviaments massius de corrèu... Cau? Non desbrembem qu’es partits se financien en part via subvencions, damb sòs publics, ei a díder, de toti nosati. Era naua politica apòste pera contencion des despenses e pera sostenibilitat e era imaginacion enes campanhes electoraus. En uns pòbles petits, a on mos coneishem toti, non cau tot aguest espectacle. Pro còste guanhar sòs coma tà desperdiciar-les atau.
 
Vielha politica ei era qu’impossibilite a partits joeni coma Corròp de participar enes debats de television e ràdio publiques, era des candidats que se nèguen ar intercambi public de projèctes en tot pensar qu’an mès a pèrder qu’a guanhar damb eth debat. Era naua politica ei era que crèe naui espacis de participacion e discusion, en egalitat de condicions e oportunitats entà toti e totes, aquera qu’organize consultes entà decidir en assemblada.
 
Vielha politica ei era des promeses enes programes, es madeishes cada quate ans, promeses que non se complissen, promeses que hèn es programes uets de contengut e reflexion. Era naua politica ei era que trabalhe per objectius, damb propòstes concrètes e sense òbres faraoniques, era que planifique e dar compdes an darrèr an, era que trigue amiar endeuant çò qu’es vesins e vesies mès vòlen e an de besonh, en tot demanar-les dia darrèr dia.
 
Trencar damb tot açò ei un trabalh de hormiguetes, que Corròp se plantège a long terme. Ei coma era istòria dera luta entre Dàvid e Goliat, maugrat nosati acieu auem vengut a amassar, a bastir, a hèr corròp. Era soleta luta que volem ei aquera per un Aran mès sociau, participatiu, sostenible, egalitari, integrador e transparent.
 
Demoram èster Dàvid eth pròplèu 24 de mai.



Programa electorau de Corròp tath terçon de Quate Lòcs
Programa electorau de Corròp tar ajuntament de Les



Video Corròp from Mireia Bo on Vimeo.



publicitat
BANER1-2-3: DGPL AN LAFONT



Comentaris


No hi ha cap comentari




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: 468x60 Aran TV

Perfil

Mireia Boya Busquet

Mireia Boya Busquet logo rss

Èx-deputada dera CUP en Parlament de Catalonha. Consultora environamentau e professora associada ena Universitat Pompeu Fabra.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions