Bandièra01 1180x150: Comuna de Tolosa

Opinion

Letra a Tamara Carrasco

Mireia Boya Busquet

Mireia Boya Busquet

Èx-deputada dera CUP en Parlament de Catalonha. Consultora environamentau e professora associada ena Universitat Pompeu Fabra.

Mai d’informacions
Cara Tamara,
 
Non mos coneishem personalaments, ne sò jamès anada tà Viladecans, tath tòn pòble, mès des d’ager non me trèigui eth tòn nòm deth cap. E le voi dider plan naut, e le voi repetir a non poder mès, enquia crebar se cau, pr’amor qu’aué as estat tu era sequestrada per aqueth regim infame, mès deman pòt èster quin aute que sigue. E le cridi pr’amor qu’ès hemna e ès coratjosa, dempús dera sororitat, dempús der engatjament, dempús dera denóncia publica e dempús dera conviccion qu’era Republica pòt èster un lòc a on vaugue era pena víuer.
 
Tamara Carrasco, dignitat deth Baish Llobregat mès combatiu, lutaira entàs drets e entàs libertats de totes en cada letra deth tòn nòm. Qu’arrés sage d'invisibilitzar-te ne desumanizar-te en tot amagar eth tòn nòm e en tot redusir-te a un gròs títol anonim. Qu’es carronhassèrs non hèsquen sang damb eth tòn patiment. Tu ès nosates, e nosates, ací dehòra, èm tu, pr’amor que toti èm CDR.
 
Capinauta deuant es carcerèrs, punh lheuat deuant era inquisicion. Pensa que representes mès de 2 milions de persones que, coma tu, aqueth 1r d’octobre defeníem poder votar, qu’aqueth 3 d’octobre protestàuem contra era violéncia policèra, que dia darrèr dia, en cada accion, demanam libertat tàs presoères politiques e cridam pro de vulneracion des drets fonamentaus. Ne ès pas soleta, ne ac seràs pas jamès.
 
Mauditi siguen. Aqueth regim poirit, corromput e violent mos ròbe era nòsta gent, era des barris, pòbles e ciutats que se botgen. Era des movements autoorganizadi, era deth carrèr que batane. Enes CDR arrés comande pr’amor que toti volem comandar sus es nòstes vides. E non saben que coma mès haràn, mès haram, pr’amor que non auem neishut entà renonciar ad arren, pr’amor que talhar ua flor, tu aué, non arture era primauera catalana.
 
Sò segura qu'auràs mil pensades en cap entàs tòns, sò segura qu'auràs mil qüestions sense responsa entath tòn futur. Non t'inquietes pas, "suenhem-mos" non ei solament un eslogan, ei ua filosofia de vida qu’aplicam es 24 ores. Seram damb es tòns pairs e amics. I seram pr’amor qu’era unitat deuant dera repression ei de besonh, mès tanben pr’amor qu’ei era nòsta fòrça. Tant de bon desvelhe mès gent entà acompanhar-te, entà denonciar çò que te hèn.
 
Pro de fascisme d’un còp! Pro d'impunitat dera extrèma dreta que governe encrabatada e que senténcie en aqueri tribunaus sòns. Aué que hè 25 ans der assassinat de Guillem Agulló, per tu tanben, ne oblit ne perdon a cada menuta que te priven dera desirada libertat. E era luta contunhe, enquiara victòria, tostemp, enquia que te pogam trèir d’aquera cèla a on t’an barrada, enquia que tornes tà casa e alavetz òc, me mòstres eth tòn Viladecans aimat.
 
Es terroristes son eri. Terrorisme d’Estat se’n ditz. Se guanhen perdem toti. Era protèsta non violenta, eth desaubediment civiu, non son cap de delicte, jamès ac pòden èster. E que non pensen que mor arturaram, èm decidides a non ajulhar-mos jamès plus. Mos auem lheuat. Resistim e resistiram. Orgulh de toti aqueri que, coma tu, son CDR. Era nòsta fòrça ei collectiua, era sua desbranda ei voler individualizar-mos. Poder popular.
 
Arrebremba, deuant deth jutge, laguens era cèla, enquia que gesques, i èm toti. Sent era nòsta alenada ath tòn darrèr, t’apiejarà en aguestes ores malaisides.
 
Milions d’abraçades.
 
 
 
 
 
Letra publicada en catalan sus VilaWeb er 11 d'abriu de 2018, a propòs dera detencion de Tamara Carrasco.



abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

T.
2.

Aquesta letra hèi aunor a una democrata, a tot democrata vertadèir. Osca .

  • 1
  • 0
Jean-Charles Valadier La Selva de Segalar
1.

Òsca Visca la Republica

  • 5
  • 0

Escriu un comentari sus aqueste article