CAPÇALERA: Nit arpiatana occitana cat
CAPÇALERA2: FAI-TE SOCI

Jornalet, gaseta occitana d'informacions

Dimars, 18 de junh

Nicolau Rei Bèthvéder

Diluns, 14.12.2015 07h15

La malescasuda de l’occitanisme politic: als conselhs regionals occitans, l’occitanisme politic se desbranda


Comentaris 32 comentaris    
Dolent Fluix Bo Molt bo Fabulós (37 vòtes)
carregant En cargament


Vertat es que Patrici Ros, l’occitanista del PÒC-EELV, foguèt elegit a la macroregion occitano-catalana. Mas aquò deu pas amagar que i a pas mai d’occitanisme politic present dins las regions, los departaments e encara mens a l’assemblada nacionala o senat. A las comunas l’iniciativa Bastir, malpensada, faguèt de marrits resultats. Los occitanistas èran, coma sovent, ambe los perdents.
 
Dins las regions ont lo sentiment d’estar diferent de París es fòrt, lo FN èran darrièr. En Bascoat, Corsega, Savòia, Alsàcia del Nòrd, Bretanha los lepenistas foguèron pas jamai davant. L’identitat “regionala” seriá donc un remèdi contra lo cancèr brun. Totes remarquèrem que los automistas bretons, còrses faguèron flòri a las eleccions regionalas. Lo breton Troadec se pensèt qualificar ambe gaireben lo 9% de las voses, quand los corsistas forcèron lo camin del poder. Quin explicar los succèsses deu corsisme que ganhèt a la collectivitat territoriala còrsa, amb Simeoni (Pè A Corsica) mentre que nosautes malautegem?
 
Las rasons de la quincanèla de l’occitanisme politic son multiplas:
 

— La vassalizacion dels elegits occitanistas, a l’esquèrra del PS o d’EELV, foguèt totala a partir de las annadas’90. Tot lo trabalh important d’autonomizacion de l’occitanisme politic de las annadas ’70 e ’80 foguèt abandonat. Coma l’UDB bretona, Entau País (auèi desaparegut) lo Partit occitan se vei coma un satellit.
 
— Lo mesprètz d’un occitanisme dels professors, dels sapients, de çò qu’es lo pòble occitan. Ja a la debuta del segle XX, lo poèta ortesian Lafòra disiá “Anem al pòble” davant l’immobilisme del felibrige que se plasiá a las taulejadas e autres prèmis literaris. En qué l’occitanisme d’auèi es diferent? L’opinion un pauc provocatora de Didièr Tosís, pareguda a la Setmana soslinha de plan lo fracàs dels elegits occitanistas menats per D. Grosclaude. Nòta una abséncia de l’occitanisme politic dins los eveniments culturals occitans populars. D. Tosís nos parla de las fèstas de Dacs o de la bastison de l’OPLO que demòra un daquòs luenchenc de l’occitan de basa. Autre exemple d’aqueste refús del pòble, foguèt l’aparicion del moviment politic Caça Natura Pesca e Tradicion (CNPT) a la fin de las annadas ’80. Darrièr aquò i aviá l’expression d’una diferéncia, d’un regèt de París, ont se podiá facilament integrar un discors occitanista. Foguèt encara una ocasion mancada.
 
— De fait, l’occitanisme se faguèt “bobo” d’un esquerrisme doç e verd mentre que las gents se dreitizavan e se daissavan anar al racisme del FN. Ont es l’occitanisme de dreita? Existís pas. Se pòt pas bastir un occitanisme fòrt sense una ofèrta generalizada. En Catalonha avèm un catalanisme present de la dreita a l’esquèrra. Parièr en Corsega, Bascoat e Bretanha. Aicí, non. Los resultats a las municipalas foguèron lamentables a Pau ont l’occitanisme politic, Bastir, luchèt contra Bayrou que ganhèt çaquelà. A Tolosa, Bastir causiguèt lo camp del perdent a la municipalas tanben. Malgrat la dreitizacion de la societat, l’occitanisme demorèt sus de pausicions vielhassas de i a vint ans. Sovent se sortiguèt de la politica per se refugiar dins lo confòrt mofle dels prèmis literaris o dels festenals subvencionats per un Estat francés subrendeutat.
 
— E los paures en Occitània, pendent aqueste temps, se botèron a votar FN. Provença, Lengadòc Bais, e val de Garona passèron a l’extrèma dreita. L’occitanisme politic, coma abans amb CPNT, los mespresan. Cèrcan pas a comprene perqué l’obrièr, al caumatge a Marselha, vòta Le Pen. Cèrcan pas de responsas al declassament de las classas popularas. S’agís pas de legitimar l’accion del FN, mas de sentir la desesperança de  las petitas gents. Non, los electors del FN son pas totes de cabords o de faissistas. L’occitanisme politic a n’anar cap a eles tanben.
 
— Segur per aquò far, cal una vertadièra revolucion. Mas podèm pensar que lo tèrratrem de las eleccions regionalas serà la marca d’un refondacion de l’occitanisme politic. Mai que jamai, se fa besonh d’un occitanisme politic copat dels partits franchimands tradicionals. S’agís pas de se daissar anar a la xenofobia, mas d’afirmar la nòstra identitat e la nòstra convivéncia. Coma disiá Robèrt Lafont, “nos cal sortir de la cultura del fracàs.”



publicitat
BANER1-2-3: DGPL AN LAFONT



Comentaris

16 de decembre 20.30h

#17 Hòu, Popi, las atacas personalas, non-mercés!
Sustot quand s'estujam darrèr un pseudonime...

Qu'as ideas interessantas mes n'ès pas obligat de las exprimir com s'èram dens ua engulada de cort de collègi... Ací qu'ei ua engulada distinguida ;-)


Valora aquest comentari:   votar positiu 16   votar negatiu 3
Respondre comentari replica Comentari inadequat   Formulari d'abús de comentari

15 de decembre 21.56h

#30 Non, lo tèxte es pas una vergonha. I a doas partidas : perqué lo FN es bas dins qualques regions (que partagi pas) e l'analisi del fracàs de l'occitanisme politic. Aqui dedins i a tot plen de causas vertadièras.
En tot cas ditz pas res dels "occitans sens o saber" o dels "nascuts a Paris"; aquo son los comentaris.
De mai aqueste article me sembla de melhora qualitat que "l'analisi" del 8 de decembre que titola "Lo Front Nacional reüssís mens ont l’identitat regionala es fòrta e lo... Legir la seguida


Valora aquest comentari:   votar positiu 15   votar negatiu 4
Respondre comentari replica Comentari inadequat   Formulari d'abús de comentari

15 de decembre 19.09h

Quina vergonha aqueste tèxte !!! E ieu que soi nascut a Paris ai una plaça dins l'Occitania embarrada que ne somiatz ??? E mos parents que son "occitans sens o saber" mas que parlan pas la lenga seràn deportatz sul Larzac amb los arabes e los francimands !


Valora aquest comentari:   votar positiu 14   votar negatiu 17
Respondre comentari replica Comentari inadequat   Formulari d'abús de comentari

15 de decembre 16.29h

#28 De cor coma lo Maime !!! CPNT poah. Pas de compromessions.


Valora aquest comentari:   votar positiu 17   votar negatiu 9
Respondre comentari replica Comentari inadequat   Formulari d'abús de comentari

15 de decembre 16.19h

N'i a quauquaren que me geina dins queu texte mas degun ne'n a parlar : "Autre exemple d’aqueste refús del pòble, foguèt l’aparicion del moviment politic Caça Natura Pesca e Tradicion (CNPT) a la fin de las annadas ’80. Darrièr aquò i aviá l’expression d’una diferéncia, d’un regèt de París, ont se podiá facilament integrar un discors occitanista. Foguèt encara una ocasion mancada."

Integrar l'occitanisme a CPNT ????!!!??? Seriosament ? Qu'es pas pusleu per lo Collectieu... Legir la seguida


Valora aquest comentari:   votar positiu 19   votar negatiu 12
Respondre comentari replica Comentari inadequat   Formulari d'abús de comentari

15 de decembre 15.06h

#26 Ont veètz que sio contra ensenhar l'occitan as mainaas de l'espaci occitan ? Es evident qu'es prioritari, ai passat mai de vint ans a militar per aquo. Empacha pas que per ieu qu'ai ensenhat l'occitan en region parisenca, que l'i ai passat l'esprova facultativa dau bac(en 69 pecaire) drant de la far passar coma examinaire quauques ans puèi, ambe de joves que parlavan un occitan eiretat de tria, o de joves que l'avian aprés a Noisy le Grand en partent de ren, desolat, sio pas lest a far u... Legir la seguida


Valora aquest comentari:   votar positiu 13   votar negatiu 10
Respondre comentari replica Comentari inadequat   Formulari d'abús de comentari

15 de decembre 13.47h

#23

Mercés de m'aver corregit, qu'aviái donat los ratios en metre lo signe dels percentatge

#25

Dins una situacion normala cadun se regaudiriá que l'occitan s'ensenhèsse en segondari a l'estrange, a París o endacòm mai. Mas per l'ora aqueste argument microcosmetic a pas cap d'impacte sus la situacion nòstra.

Salvar l'occitan comença per l'ensenhament de l'occitan als mainatge occitans en Occitània. Rasonar autrament demostrariá una desconnexion amb la realitat

Se cal pas enfosca... Legir la seguida


Valora aquest comentari:   votar positiu 15   votar negatiu 13
Respondre comentari replica Comentari inadequat   Formulari d'abús de comentari

15 de decembre 11.53h

#14 se compreno ben las reaccions a ço que diso, vol dire que per pron monde, es clar que l'occitan es reservat a aquelos qu'an un aubre genealogic impeccablament occitan... Bon, bé, es vostra opinion e la partajatz.


Valora aquest comentari:   votar positiu 10   votar negatiu 17
Respondre comentari replica Comentari inadequat   Formulari d'abús de comentari

15 de decembre 11.09h

#23 E oblidem pas l'acadèmia de Grenòble...


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

15 de decembre 08.44h

#21 Mercés d'aquelas chifras, mas cresi que l'i a un problèma :
1 escolan sus 140 fa 0,71% (e pas 0,0071%)
e 1 escolan sus 909 fa 0,11% (e pas 0,0011%)
çò que càmbia pas grand causa a la remarca de flaquesa de l'ensenhament, mas fa ça que la 100 còps mai que çò qu'èra marcat.
Per matissar un pauc, cal relevar que la situacion es fòrça disparièra segon las acadèmias (amb los quasi desèrts de Lemòtge e Clarmont) e dins las acadèmias entre los departaments. Es totjorn question de... Legir la seguida


Valora aquest comentari:   votar positiu 12   votar negatiu 15
Respondre comentari replica Comentari inadequat   Formulari d'abús de comentari

5 -10 -20 -tots
1
-
2
-
3
-
4 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER 3 teveoc

Perfil

Nicolau Rei Bèthvéder

Nicolau Rei Bèthvéder logo rss

Escrivan, licenciat en sciéncias politicas e professor d’occitan e d’istòria geografia tanben en occitan.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions