CAPÇALERA: HISTÒRIA DE LA CUINA CATALANA I OCCITANA
CAPÇALERA2: FAI-TE SOCI

Jornalet, gaseta occitana d'informacions

Divendres, 6 de decembre

Nicolau Rei Bèthvéder

Divendres, 6.5.2016 03h00

Vòti Occitània


Comentaris 23 comentaris    
Dolent Fluix Bo Molt bo Fabulós (31 vòtes)
carregant En cargament


A partir deu 9 de mai dinc au 10 de junh las gents de la navèra region, qu’amassa Lengadòc-Rosselhon e Miejorn Pirenèus (LRMP), auràn de causir entre cinc prepausicions:

 
— Languedoc
 
— Languedoc-Pyrénées
 
— Occitanie
 
— Occitanie – Pays catalans
 
— Pyrénées - Méditerranée
 
Abans de començar, coma ac hascoc remercar Dàvid Grosclaude dambe rason: son noms en francés. Dins un Estat democratic normau seré logic d’aver lo nom de la region dins la lenga pròpria. Pagam encara l’excepcion francesa qu’arrèsta pas de durar.
 
Prumèr, parlarèi d’un nom que podèm descartar de tira: “Pyrénées – Méditerranée”. Sembla a un nom d’un departament navèth inventat per un aròu de tecnocratas parisencs. Mès seriosament, ei dejà lo nom de l’euroregion qu’unish las regions LRMP, Catalonha, Islas Balears e Aragon. Aver lo nom d’ua estructura qu’existish dejà, me sembla mès que geinant. Mès grèu encara fòrça gents d’aquesta region navèra son pas ni deus Pirenèus, ni de la Mediterranèa (departaments 12, 32, 46, 48, 81, 82). Aqueste nom ei la negacion de tota identitat. Ei un anti-nom.
 
Segon, parlarèi deus noms, mès pregonds e rics aqueres, que son “Languedoc” e “Languedoc-Pyrénées”. E los Gascons, on son dambe aqueste nom ? I a pr’aquò cinc departaments gascons en partida (82, 31, 09) o en totalitat (65, 32) dins la region navèra. Los Catalans (66) apreciaràn qu’occitanistas prepausan “Languedoc” o “Languedoc-Pyrénées”. Occitanistas, mès totjorn lengadocians, disen que los Catalans e los Gascons se retrobaràn dambe los Pirenèus. Tarba, Aush o Perpinhan son pas vilas ni pirenencas ni lengadocianas. Son ciutats de la ribèra. Prepausar aquestes Pirenèus, ei adoptar un punt de vista departamentalista deus revolucionaris de 1790. Ei donc sentir a la prova. Ajustarèi encara qu’istoricament lo Carcin (46, 82) e lo Roèrgue (12) estón pas dins lo Lengadòc de l’ancian regime. Fòrça d’elegits deu Gard, de dialècte provençau, demandèn publicament a sortir de la region LRMP entà integrar la Provença. Aqueste Lengadòc, envielhit e fantasmat, sembla pas atractiu a despart de J.M. Baylet, ministre e l’òme de la Despacha!
 
I a ua causa essenciala, qu’escapa a fòrça occitanistas, ei qu’ua zòna lingüistica ei pas totjron ua region. Pensatz a l’Escòcia per exemple. Gents deu Carcin o de l’Agenés se sentissen lengadocians? Fòrça occitanofònes naturaus de l’Agenés se disen “gascons” mentre que parlan “lengadocian”. Ua identitat regionala o nacionala ei quasi totjorn diferenta de la realitat lingüistica. Ua region ei sustot un espaci devath l’influéncia d’ua metropòli poderosa. Mès i a plen d’autes factors economics, culturaus, istorics o geografics que hèn l’unitat d’ua region. La coheréncia de la Sicília ei d’estar ua isla, la de la Soïssa ei ua istòria montanhòla comuna… Créser qu’es lo “Lengadòc” que hè l’unitat d’aquesta region pedaçada ei seguir la mosca blua.
 
Ara, parlam deu nom “Occitanie –Pays Catalan”. Entà díser la vertat, aqueste nom ei tròp long. Los publicitaris vos ac diràn: un bon nom ei un nom brac. Ua, duas, tres sillabas maximum. Exemples: Bretanha, Corsega, Aragon, Euskadi... “Occitanie-Pays Catalan” ei tròp long, los mèdias de París daràn de tira ua acronim estille “OPC”, la navèra region acabaré coma la prauba Provença que deveng PACA ara.
 
Au delà d’ua simpla question de nom, “Occitanie – Pays Catalan” pausa lo problèma de la reciprocitat. On ei lo territòri que s’apèra “Catalunya – Val d’Aran” o “Catalunya – Aran”? I a dejà ua region Catalonha, que benlèu devenguerà un Estat. Los Catalans poderén dejà començar per cambiar lo nom de’Pirenèus Orientaus’ per’Catalonha-Nòrd’.  Lo 66 ei pas qu’un departament suu 13 que comptarà la region navèra.
 
Mès ei pas per un rasonament en negatiu qu’arribi a la conclusion que votarèi “Occitanie” soleta a la consulta. Los oposants occitanistas a la causida “Occitània” disen que l’actuala region LRMP ei pas qu’ua part de l’Occitània. Ei vertat, mès on existish sus ua mapa oficiala lo mot’Occitanie’? Enlòc! Qui sap çò qu’es l’Occitània en dehòra de l’escabòt deus occitanistas? Qui coneish lo mot’occitan’ o’Occitània’ a París? 1 o 2% de la populacion totala? En votar Occitània ei, au contrari, ensajar de la hèr estar. Atau la comunitat autonoma d’Euskadi cab pas tota l’Euskadi mès que legitima los Bascos dins los autes territòris. Tots los Catalans son pas en “Catalunya”, mès lo hèit qu’existish ua Catalonha legitima l’accion deus catalanistas a l’exterior. Ei pr’amor que i avó un prumèr Estat grèc en 1830, qu’amassava mens deu 15% deus Grècs, que l’elenisme progressèc. En 2016, lo territòri de la Grècia ei  6 còp mès bèth per rapòrt au moment de l’independéncia e amassa mès deu 85% deus Grècs. Çò d’important ei de plantar la grana, ei de començar. Ei pr’amor que i a ua region Bretanha qu’un jorn Nantas ne tornarà estar la capitala.
 
En mès d’aquò, los medishes occitanistas estón contents, a la fin de las annadas’80, quan lo conselh regionau de Miejorn-Pirenèus adoptèc lo drapèu occitan coma emblèma regionau. Sense l’adopcion per ua part deus païses occitans d’ua emblèma de tots los Occitans, lo drapèu nòste seré pas sortit de la paguèra.
 
Nosauts, occitanistas, angueram en contra d’ua volentat populara en refusar un nom que butam dumpèi 60 ans a popularizar? Atau, quasi tots los sondatges hèits peus mèdias regionaus e estataus dan “Occitània” prumèra. Cau acceptar lo nòste succès e sortir d’ua cultura deu ghetto. En politica, cau estar realista. Entà impausar Occitània a tot lo territòri occitan, cau començar per un tròç.
 
Après, saunejam pas de tròp. En seteme París, peu son Conselh d’Estat, s’oposarà a “Occitanie”. Preferirà un “Languedoc-Pyrénées” o un “Pyrénées – Méditerranée”. Mès se i a centenats de milièrs de personas que vòtan per Occitània, serà çaquelà mauagit a F. Holanda -e aus autes parisianistas- d’empachar l’expression populara de ganhar. Ua batalha de las interessantas se va draubir lo 9 de mai.
 
Alavetz, la començam a bastir aquesta Occitània?



publicitat
BANER1-2-3: DGPL TRADUCTOR



Comentaris

12 de mai 21.14h

Completament d'acòrdi ambe l'article . Per ieu tanben serà Occitània !


Valora aquest comentari:   votar positiu 5   votar negatiu 3
Respondre comentari replica Comentari inadequat   Formulari d'abús de comentari

10 de mai 09.35h

#21

Alavetz mercé de far precisions ! Es causa sabuda que l'occitanisme es plural, que siá a Tolosa, a Marselha o a Niça (basta de legir los comentaris aquí). Parlas de l'aficha: ''Mon pays, c'est l'Occitanie''. Es la de Convergéncia Occitana.

Los que son anats quèrre de sosten amb lo Collectiu Provença son de la Joventut Mondina.

Grandmercé de far pas de generalitats dins l'occitanisme tolzan.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

9 de mai 18.31h

#20 Parli de FACHS objectius. D'occitanistas son anats querre de sostenh de la part dau Collectiu Provença.
Que lei gents, lo grand public, votèsson "Occitanie" coma nom de region per aquesta region es pas çò que me geina. Cò que me geina es la campanha de desinformacion menada per d'occitanistas d'ailà e tot lo discors ninòi au mièlhs e messorguier en realitat que se l'aponde.
Quora l'IEO s'acontenta de publicar una mapa d'Occitània en l'apondent "L'occitanie c'est quatre regions" fan... Legir la seguida


Valora aquest comentari:   votar positiu 7   votar negatiu 7
Respondre comentari replica Comentari inadequat   Formulari d'abús de comentari

9 de mai 17.41h

I a un quicòm que cal aver en cap : se la màger part de las personas dins aquesta novèla region s'identifican a Occitània (quina que ne siá la rason), perqué podrián pas causir aqueste nom?
Matiu, nos acusas en causissent "Occitània" de nos aligar al collectiu Provença. Farai pròva tanben de marrida fe : en refusant Occitània, seguissèm lo FN.
Enfin, degun empacha pas los occitans d'endacòm mai de causir Occitània per nom de region. Seguissi pas de prèp, mas ai pas ausit los occ... Legir la seguida


Valora aquest comentari:   votar positiu 10   votar negatiu 1
Respondre comentari replica Comentari inadequat   Formulari d'abús de comentari

9 de mai 14.48h

Quauques Occitans son-t-ilhs mai occitans que los autres?


Valora aquest comentari:   votar positiu 0   votar negatiu 4
Respondre comentari replica Comentari inadequat   Formulari d'abús de comentari

9 de mai 10.36h

#17 Es pasmens exactament la veision aicí argumentada.
Parte dau principi l'autor qu'ambe lo tropisme e la fascinacion culturala qu'aurián leis provençaus, gascons,auvernhàs, lemosin e cie per la region MPLR, bastarà de la nomenar Occitània per que pauc a cha pauc cada compausantas de la vertadiera Occitània voudràn se li pegar.

En realitat, es ben pus probable que se va passar l'exacte contrari. Nomenar aquesta region Occitània es de fach considerar que leis autres regions concernida... Legir la seguida


Valora aquest comentari:   votar positiu 4   votar negatiu 6
Respondre comentari replica Comentari inadequat   Formulari d'abús de comentari

8 de mai 23.38h

#15 acusar un gascon de "centralisme lengadocian"... ! Bon, de tot biais, coma totjorn los occitanistas son pas d'acòrdi, signe sanitós o pas? en tot cas signe de diversitat.


Valora aquest comentari:   votar positiu 7   votar negatiu 0
Respondre comentari replica Comentari inadequat   Formulari d'abús de comentari

8 de mai 19.53h

#15 Ai pas dich qu'existissiá pas o qu'a pas jamai existit una tendéncia istorica dins l'occitanisme lengadocian a se definir coma lo centre. Atanben lo "centralisme" (calriá encara saupre çò que vòl dire aquo) fin finala es una posicion politica coma una autra, tan legitima qu'una autra, en França coma en "Occitània" emai s'es benlèu pas la mai coerenta ni la mai espandida dins l'occitanisme, quitament lengadocian.
Per precisar mon comentari: ai l'impression (mas es benlèu que freque... Legir la seguida


Valora aquest comentari:   votar positiu 4   votar negatiu 1
Respondre comentari replica Comentari inadequat   Formulari d'abús de comentari

8 de mai 17.33h

#14 préner l'exemple de Grècia per apuejar son argumentari basta per mostrar la sota pensada centralista darrier d'aquel article... Quant de locutors grecs encuei en Asia Menora ? Quau saup encuei qu'Istanbòu èra la mai gròssa vila grèca despuei mai de 1500 annadas ? De qu'es sa solucion ? Prepausar una deportacion dei darriers locutors d'occitan en Provença, Gasconha, Lemosin, etc... dins sa mini occitània de farlabica ?
Se l'autor s'avisa pas dau caractèr insultant d'aquel exemple, q... Legir la seguida


Valora aquest comentari:   votar positiu 10   votar negatiu 10
Respondre comentari replica Comentari inadequat   Formulari d'abús de comentari

8 de mai 10.26h

#13
Francament ieu tròbi aqueste discors del "centralisme" lengadocian ben susfach...
1* l'occitan lengadocian es estat causit coma basa generala per de rasons de simplicitat, adaptada ara a totes los dialectes. En mai 'occitan lengadocian es tan divèrs que los autres dialèctes, un montpelherenc, un donasanenc e un roergat parlan pas parièr, e quand parlan "llarg" acceptan de quitar de localismes...
2* çò que menaça la lenga occitana en Gasconha e lemosin, es plan mai la politica ling... Legir la seguida


Valora aquest comentari:   votar positiu 9   votar negatiu 2
Respondre comentari replica Comentari inadequat   Formulari d'abús de comentari

5 -10 -20 -tots
1
-
2
-
3 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: 468x60 Aran TV

Perfil

Nicolau Rei Bèthvéder

Nicolau Rei Bèthvéder logo rss

Escrivan, licenciat en sciéncias politicas e professor d’occitan e d’istòria geografia tanben en occitan.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions