CAPÇALERA: IEA-AALO
CAPÇALERA2: Botiga

Jornalet, gaseta occitana d'informacions

Dijòus, 1 de decembre

Primaël Montgauzí

Dimècres, 4.2.2015 03h00

Son ebrieus les josieus?


Comentaris 26 comentaris    
Dolent Fluix Bo Molt bo Fabulós (13 vòtes)
carregant En cargament


Hasèva un moment que pensavi d’escríver un articlòt suu sionisme e l’identitat josiva, qu’i legishem dins la premsa francesa e internacionala tants mensonges dessús. S’ac avèvi deishat de costat dinc a-s-ara, cèrtas reaccions de jornalistas e politicians aprèp les murtres de Charlie Hebdo / Hyper Cacher m’an fin finala motivat entà passar a l’acte. Avèm tots ausits le prumèr ministre Isralian B. Netanyahu aperar les josieus[1] de França a vénguer s’installar dins lor “hogau nacionau”[2], com avèm tots vist aqueths praubes josieus franceses e tunisians s’anar hèr enterrar en Israèl. En mès d’aquò, avèm pogut legir dins l’editoriau deu quite Jornalet deu 18 de genièr qu’un responsable josieu, en deféner “lo respècte de las identitats diferenciadas de França” defenèva tant las “identitats ebrieva [sic] e musulmana” com “occitana e bretona”[3].
 
Dambe aqueths exemples (e ne poirí citar un hum d’autes), vesem que le mite (antisemita[4] a l’origina, pèi sionista tanben!) d’un pòble josieu caçat de Palestina, escampilhat dins le mond en tot preservar son identitat nacionala, e qu’auré de tornar legitimament sus la tèrra mairala d’Israèl, es tant espandit dins les esperits que le se pòt legir tant dins les mèdias mainstream – mès praquò intellectuaus (Le Monde) – com dins un jornau alternatiu e critic, notadament per las questions deus pòbles e de las culturas minoritàrias (Jornalet). Jornaus que suspècti pas cap d’èster antisemitas pr’aquò, que sia plan le dit; mès me pareish important de botar en lum quauques punts sus la question de l’identitat josiva, entà “esvitar tot amalgama”, coma ac ditz l’expression à la mode.
 
Me permeteré de m’apujar sus las analisas d’un istorian Israelian, Shlomo Sand, dont le libe Com le pòble josieu estoc inventat[5] estoc un best-seller, especialement en Israèl.
 
Dins aqueth obratge hòrt dense, l’autor demòstra que le sionisme s’es inspirat d’un mite antisemita crestian que conta que les josieus de la Crestiantat serén originaris de Palestina, escampilhats en diaspòra pr’amor d’un castigament de Diu pramor qu’aurén tuat Jèsus, donc Diu segon la teologia crestiana (ac aperam le “mite deïcida”[6]). Tanben, nos ensenha qu’aqueth nacionalisme originau se desvelopèc pendent le sègle XIX, sègle de l’invencion deu nacionalisme, ideologia que considèra que la nacion a tostemps existit, quan, segon l’autor, nacion e nacionalisme néishen amassa[7].
 
I aprenguem en fèit que le judaisme, com les autes monoteïsmes, estoc ua religion proselita pendent longtemps, dinc a la victòria sociala e politica deu cristianisme (dambe l’emperator Constantin), le siu gran rivau dins l’empèri roman, e la de l’islam un pòc aprèp, au sègle VIII[8]. Aquò explica perqué trobam mantuas comunitats josivas dins divèrses parçans de la tèrra, dambe noms e “faciès” locaus[9] e non pas ebraics o arameans[10]. La teoria de l’exili deu “pòble” judean[11] a la destruccion deu Temple de Jerusalem es donc faussa (pas cap documents istorics ne pàrlan[12] e, péger, i a d’atestacions de revòltas judeanas en Palestina plan aprèp 70[13]…). Mès a partir deu constantinisme, la comunitats josivas de l’Empèri perdón complètament le drèit de hèr de naus adèptes[14], e pòc a pòc, les caloc mèma víver dins barris e ghettos desparats de la rèsta de la vila, çò qu’afortiscoc l’idèa que se mesclèn pas jamés damb la poblacion locala.
 
Descobrishem tanben que les prumèrs sionistas eths medishes, Ber Bokhorov, Ben Gurion e Yitzak Ben Zvi, defenèvan l’idèa que les descendents vertadièrs deus Judeans èran les Palestinians, convertits majoritàriament a l’islam e au cristianisme, ua petita part estent demorada josiva[15]. Aqueths futurs líders israelians esperàvan, a l’epòca, se mesclar dambe aquera poblacion entà tornar trobar çò que pensàvan èster la lora cultura vertadièra.
 
Que le sionisme estosse ua reaccion a las persecussions (pogroms, anti-dreyfus, shoah), ac podem comprénguer; que permetosse d’exiliar milièrs e milièrs de Palestinians de la lora tèrra entà desculpabilizar Euròpa de la sivas fautas, aquò se pòt pas… o s’auré pas calut poder hèr[16]. Se l’idèa estoc acceptada tant aisidament en Occident, es que le mite —antisemita— de la diaspòra èra plan encapat peus Europèus. E benlèu qu’ac es encara. Çò que bota en lum, es l’incapacitat de las nostas societats de pensar le pluralisme: o ètz catolic-republican-galés-etc…en foncion deu periòde; o ètz d’endacòm mès, pas d’aicí, pas d’en çò noste. En non descontrusir pas hòrt e plan aqueste mite, hasèm la medisha error que les Reis Catolics d’Espanha quan cacèn musulmans e josieus espanhòus deu lor reiaume (les josieus sefaradas contunhan de parlar espanhòu —e pas ebrieu o aramean!— dins la lora comunitat en Turquia, pròva que le ligam dambe la cultura espanhòla èra fòrça més fòrt…). E sabem tot çò qu’i perdón, tant scientificament, com arquitecturalament o artisticament[17]. Le pluralisme, s’es viscut dins la convivéncia[18], es plan sovent a l’origina d’ua civilizacion rica e luminosa.
 
Me pareish essenciau de non contunhar pas de deishar pensar, conscientament, o inconscientament, que les josieus serén un pòble, un ethnos. Çò qu’empacha pas de parlar de culturas josivas dins la mesura on aquestas comunitats, sovent exclusas dins l’istòria, an desvelopat biaisses de víver, de pensar, e a còps de parlar[19], diferents de la cultura dominanta. Mès aqueras culturas son enrasigadas dins la cultura indigèna, e non pas palestiniana (o judeana, o ebraica, o com la volem aperar). Hèn part de l’identitat deu país on víven. Senon, podem pas comprénguer ren de l’istòria de Palestina, mès tanpòc de la nosta!
 
Cau donc plan comprénguer on es le mau: l’antisemitisme es considerar les josieus com estrangèrs. L’antisemitisme es pensar qu’an de tornar d’on vendrén (Israèl), quan le sionisme ensaja de hè pensar le contrari[20]. Le quite antisemitisme es antisemita puishque s’imagina que les josieus serén semitas (es unicament vertat entaus josieus arabis ara), concèpte que caudré melhor aperar judeofobia.
 
Se volem lutar en favor d’ua cultura populara, enrasigada dins la realitat istorica, dobèrta, metissada e plurala, contra l’ideologia ultranacionalista que s’inventa un passat mitologic (la coneishem plan en França), me pensi que seré important de plan comprénguer le cas josieu. La question israelinana es tanben un problèma europèu, occidentau en generau[21]. Pas un afar estrangèr. N’èm a l’origina d’un cèrt biais, tant politicament com ideoligicament.
 
Perque les païses occitans an agut ua istòria rica dambe la diversitat religiosa, perque les militants occitanistas defenen le pluralisme e la convivéncia, perque nos opausam de fèit aus colonialismes e a l’etnocentrisme europèu, perque avem estat e èm encara victimas d’un negacionisme istoric nacionalista, pensi qu’es necessari d’aver las idèas plan claras sus aqueste punt sensible entà comprénguer plan que tot veng d’ua medisha ideologia, d’un medish biais de tornar legir l’istòria e de la cambiar entà balhar pretextes aus fòrts entà carar les més febles: catars, josieus, Palestinians, pòbles e culturas minoritaris, etc…
 



[1] « josieu » sense majuscula, entà parlar de la confession religiosa
[2] « Netanyahou aux juifs : vous avez le droit de vivre en sécurité ou vous choisirez », Le Monde, 01/11/2015
[3] « A prepaus de Charlie Hebdo », Editorial deu 18/01/2015, jornalet.com
[4] NB : que le hèit que le mite sia sortit d’ua ideologia antisemita, non deishe pas pensar que consideri que las personas que pénsan atau ac son.
[5] SAND Shlomo, Comment le peuple juif fut inventé ?, De la Bible au Sionisme, tradusit de l’ebrieu per Sivan Cohen-Wiesenfeld  et Levana Frenk, Champs essai – Flammarion, 2010
[6] « « Il n’existe aucun preuve substantielle à la thèse de l’« Exil » principalement après la destruction du Temple […]. Cette vision repose sur une ignorance de l’histoire, inspirée de fait d’une invention des pères de l’Eglise catholique qui, dans leur hostilité envers les juifs, voulaient prouver que Dieu les avait punis pour la crucifixion de Jésus. », Israel Jacob Yuval, « Le mythe de l’exil du pays : temps juif et temps chrétien », Alpayim, 2005, citat per SAND Schlomo, op.cit. p. 256
[7] « Fabriquer des nations, souverainté et égalité », idib.
[8] De nòvas conversions an contunhat de se hèr dins las periferias deus monds crestian e musulman, notadament dins le reiaume Khazar, convertit au judaisme, e dont les descendents serén les josieus « ashkenazes », in « Les Khazars et le judaisme, une histoire d’amour », SAND Schlomo, op.cit.
[9] Basta de pensar aus josieus blonds d’Euròpa de l’Est e aus josieus negues d’Etiopia !
[10] Invention de l’exil, prosélitisme et conversion », ibid.
[11] Judean, abitants de Judèa
[12] « Il convient de rappeler que les Romains n’ont jamais pratiqué l’expulsion systématique d’aucun peuple. […] Ils ne possédaient même pas les moyens techniques de le faire. », in « L’invention de l’exil. Prosélytisme et conversion », in SAND Shlomo, op. cit. p. 249-250
[13] « La rébellion qui éclata en l’an 132 sous le principat d’Hadrien, appelée révolte de Bar Kokhba », SAND Shlomo, op. cit. p. 254
[14] L’Empèri Roman avèva ja començat d’ac interdir, com entaus crestians, mès sense autant de succès concrèts…
[15] « Venir prétendre qu’avec la conquête de Jérusalem par Titus et avec l’échec de la révolte de Bar Kokhba les Juifs cessèrent complètement de cultiver la terre d’Eretz Israël découle d’une ignorance totale de l’histoire d’Israel et de sa littérature de l’époque. […] La population paysanne, en dépit de la répression et des souffrances, resta sur place fidèle à elle-même ». David Ben Gourion et Yitzhak Ben Zvi, Eretz Israel dans le passé et dans le présent (en hébreu), citat per SAND Shlomo, op. cit.
[16] Les Palestinians son més d’un million sonque en Liban, a víver dins camps de refugiats dempèi la Nakba
[17] E sabem ara tot çò que le Mond arabi perdoc dambe la partença de la majoritat deus sius josieus entà Israèl.
[18] mot creat dins l’Andalosia de l’epòca, e "occitanizat" quauques sègles aprèp
[19] Yiddish, chuadit, ladino, son exemples de dialectes sortits de la lenga dominanta, mès adaptadas a la comunitat
[20] « La haine des juifs, la haine des démocraties, la haine de l'Etat juif, c'est la même haine », Joël Mergui, citat dins Le Monde, 01/11/2015 ; o encara suu siti ultra-sionista europe-israel.org dins ua letra dobèrta au President de la Republica francesa : « Les Juifs ont cette double dimension : Ils sont à la fois un peuple ET une religion », Robert Cohen-Tanugi,  « La Lettre du Lien Israël-Diaspora du 28/1/15 »
[21] Avèm força ciutadans francoisraelians. La question palestiniana tanben tòca mantuns franceses per rasons religiosas, politicas o auta…



publicitat
BANNER1 - OPLO erasmus



Comentaris

9 de febrièr 16.23h

#25 "tanplan coma per l'indo-europèu, non ?" => A! A! Per l'indoeuropèu, i a efectivament de teorias diferentas e siáu partisan de ne discutir serenament. Pasmens, la teoria dei kurgans es de luenh la pus admesa e la pus solida segon la majoritat deis especialistas, e forma çò que s'apèla un "paradigma". Podèm pas dire çò meteis de la teoria d'Shlomo Sand ;)


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

9 de febrièr 14.52h

#21 La question es pas de defendre o de remetre en causa l'Estat d'Israèl. Es un fach. L'article de Primaël presenta clarament que la « confusion » entre « josiu » e « ebrèu » e sa vitrificacion en mite indiscutible es la basa d'un problèma bèl. E es interessant que veire que la basa d'aquel mite es l'asira dels josius. Aprèp, tot se pòt debatre.
Tè, una pichòta pica ;-)
« la teoria d'Shlomo Sand fa pas l'unanimitat entre leis istorians e que seriá imprudent de la consi... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

9 de febrièr 14.39h

A prepaus de Fontan…
Los principes etnistas que donèt son clars (disi pas qu'i soi favorable!)
1- una etnia (un pòble, una nacion) se definís per sa lenga mairala
2- lo territòri d'aquesta etnia es lo territòri ont aquesta lenga es parlada.
3- los objectius sont la patz, l'independéncia e l'unitat de cada nacion.
Vesèm plan que dins la definicion de Fontan, la religion a pas de plaça. Defendre un estat josiu es donc negar sa pensada.
I a una « etnia » (pòble, nacion) ebraïca ? ... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

8 de febrièr 14.12h

#20 Es important çò qu'escriu Primael. Los mites qu'environan la creacion de l'Estat d'Israel son de creacions europèas: lo mite de l'exili es una invencion crestiana (un castig pels Ebrieus), l'antisemitisme es una creacion europèa (abans la difusion de l'antisemitisme mercé a l'espandida occidentala dins los païses arabs, quala èra la realitat de l'antisemitisme en tèrra d'islam?), lo sionisme e la necessitat de tornar crear un estat "josieu" (o "ebrieu" per invencion) es tanben una c... Legir la seguida


Valora aquest comentari:   votar positiu 0   votar negatiu 1
Respondre comentari replica Comentari inadequat   Formulari d'abús de comentari

7 de febrièr 14.45h

#20 I a un grand consens dins l'occitanisme per dire que lei josieus d'Occitània son una partida integranta e originària dau pòble occitan, e que lei musulmans d'Occitània, e atanben leis arabis d'Occitània, fan partida dau pòble occitan de maniera indiscutibla.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

7 de febrièr 14.53h

#20 Ieu respècti Shlomo Sand e cresi que cau debatre serenament sus sa teoria. Per còntra vòli ramentar que la teoria d'Shlomo Sand fa pas l'unanimitat entre leis istorians e que seriá imprudent de la considerar coma definitiva e assegurada. En particular, la connexion entre lei khazars e leis asquenasitas parlant yidish me sembla fòrça, fòrça improbabla. Cau ramentar tanben que Sand defend l'existéncia de l'estat d'Israèl.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

7 de febrièr 13.50h

#16 La luta per la cultura occitana passa tanben per la luta entà la diversitat deu pais d'oc : quan Netayaho veng a Tolosa entà diser aus josius occitans qu'an de "tornar" en Palestina, me hè mau : es pas le representant deus josius deu mond. Les josius occitans son occitans e de confession josiva! Es aquo èster occitanista : lutar entà la convivéncia. E lutar tanben contra la mit-istoria que torna legir le passat d'un biais ideologic e faus (Vercingetorix com prumèr nacionalista fran... Legir la seguida


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

7 de febrièr 13.45h

#17 Atencion, acusi pas François Fontan d'èster racista, ni les sionistas tanpoc! Non, per contra, l'argument qu'utilizan, oc qu'es racista, sense ac saber benlèu : considèra que les josius son d'estrangèrs, ebrieus ("errors d'analisi" disètz ? Donc ac cau reconéixer e non contunhar pas de difusir aqueras errors, au risc de decredebilizar la pensada sancèra de Fontan). Es per aquo que disi que 'l'antisemitisme es antisemite". Es tanben per aquesta rason qu'èi decidit d'escriver aqueste... Legir la seguida


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

7 de febrièr 08.16h

#16 e 17
Mercés plan Domergue Sumien per aquelas paraulas apasimantas
Quand Fontan escriguèt aqueste tèxt o faguèt amb las coneissenças del temps ... Fontan èra un èsser uman doncas quauqu"un d'imperfach
Per un ièu un occitan conscient de l'èsser que pensa pas coma ièu es tant patriòta occitan coma ièu ......
Un occitan conscient de l'èsser qu'es francista es un enemic.


Valora aquest comentari:   votar positiu 3   votar negatiu 2
Respondre comentari replica Comentari inadequat   Formulari d'abús de comentari

7 de febrièr 00.37h

#15 Acusar Francés Fontan d'èsser racista es pas una pròva de finesa ni de perspicacitat. Fontan faguèt d'errors d'analisi, mancava terriblament de documentacion, mai èra pas racista.


Valora aquest comentari:   votar positiu 5   votar negatiu 2
Respondre comentari replica Comentari inadequat   Formulari d'abús de comentari

5 -10 -20 -tots
1
-
2
-
3 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.

Perfil

Primaël Montgauzí

Primaël Montgauzí logo rss

Cantautor gascon, de Tròba occitana. Master en Letras Modèrnas a l’Universitat de Tolosa-Miralh (especialitat “cantologia”, estudi de las cançons) dambe ua recèrca sus la cançon militanta.

mai d'informacions

contactar l'autor

Categorias

Mai d'articles

Archius




D'autres articles


Jornalet, gaseta occitana d'informacions