CAPCALERA: BOTIGA
CAPÇALERA2: mot amagat

Jornalet, gaseta occitana d'informacions

Dissabte, 13 d'agost

Primaël Montgauzí

Divendres, 28.3.2014 03h00

Cronicas deu cèdre: Sho fi ma fi?


Comentaris 2 comentaris    
Dolent Fluix Bo Molt bo Fabulós (1 vòte)
carregant En cargament


En Liban, ausiratz sovent aquesta question que vòu díser “Qué i a, qué i a pas?” e que permet de demanar çò de nau, o tot simplament de saber se tot va plan. La costuma es d’i respóner damb un “ma fi chi”, i a pas ren. Mès, en l’ausir, m’arriba a còps d’i voler respóner literalament: alavètz, en Liban, “sho fi ma fi”?
 
En Liban, i a la mar, mès i a pas mès de peishes dedins.
 
En Liban, i a la montanha, mès i pas de nèu engüan.
 
En Liban, i a tres religions e catorze confessions mès i a pas de maridatge a la lei.
 
En Liban, i a 6 còps més de hemnas que d’òmes, mès i pas le drèit per las libanesas de transméter la nacionalitat.
 
En Liban, i a un nau govèrn, mès i a pas agut d’eleccions.
 
En Liban, i a quan mèma la democracia, mès, en Orient Mejan, i a pas qu’Israël qu’a le drèit d’èster taxat de democratic.
 
En Liban, i a l’independéncia, mès l’orde de París, de Damasc, de Teeran, e de Washington compta més que le deu President.
 
En Liban, i a pas d’electricitat publica les tres quarts deu jorn, mès i a de grops-electrogènas que te còstan 100 dollars le mes.
 
I a de grops-electrogèns que te còstan 100 dollars le mes, mès les panèus publicitaris son sempre esclairats.
 
I a las facturas de telefòn més caras deu mond, més i a pas un Libanés ua minuta sense son iPhone dins la man.
 
I a de veituras americanas que ròtlan a 200 quilomètras per ora, mès i a pas de còdi de la rota.
 
I a d’encombraments a cada ora deu jorn o de la nèit, mès i a pas degun que marcha entà anar querre le pan.
 
I a de regions on la prostitucion es legala, mès i a pas le drèit de se potonejar dins la rua.
 
I a les melhors espitaus de la region, mès i a quasi pas de seguritat sociala.
 
I a 1 000 000 refugiats palestinians, mès i a pas le drèit per eths de s’installar.
 
I a 1 000 000 refugiats sirians o més, mès i a pas de trabalh per eths.
 
I a 4 000 000 libaneses, mès i a pas d’ajuda internacionala per acuelhir 50 per cent més de poblacion en refugiats.
 
I a pas mès la guèrra civila, mès i a tots les ancians caps de milícias au poder.
 
I a la patz, mès i a explosions e fusilhadas a Tripòl, a Beïrot com a la frontièra siriana e israeliana.
 
I a le sorèlh, mès i a quasi pas de ploja dempèi la prima passada.
 
En Liban, i a mantuns problèmas, mès i a pas un tipe qu’es vengut aicí sense s’enamorar com un pèc de la montanha dins la mar, deus rísers de las gents, de la musica de l’od, deus mezzes a l’arak, deus cafès sus las terrassas deus ostaus, de la holia de cadun que permèt de doblidar un pòc que doman serà benlèu complicat…
 
Alavètz sho fi ma fi? ma fi chi!
 
Aicí le país de l’amor de lonh, adishatz e yalla bye!



publicitat
BANER3: Ràdio Occitània



Comentaris

28 de març 15.06h

E oc, 6 femnas per 1 ome!!! Mas cal precisar qu'aquela proporcion tocarià pas que les Libaneses (les qu'an la nacionalitat) e pas las poblacions refugiadas, imigradas, etc, presentas en Liban. E subretot qu'aquo sembla mas una "legenda" força enrasigada dins las mentalitats aici (L'ai ausit mantuns cops, dins diversas situacions e regions aici, totjorn ambe la meteissa proporcion!). Citi donc aici un "mite" libanés!
Mas es vertat : 1) que se vei vertadièrament mas de femnas que d'omes d... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

28 de març 13.49h

I a 6 còps mès de femnas de d'òmes?
Vòls dire 6 femnas per 1 òme, o 106 femnas per 100 òmes?


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.

Perfil

Primaël Montgauzí

Primaël Montgauzí logo rss

Cantautor gascon, de Tròba occitana. Master en Letras Modèrnas a l’Universitat de Tolosa-Miralh (especialitat “cantologia”, estudi de las cançons) dambe ua recèrca sus la cançon militanta.

mai d'informacions

contactar l'autor

Categorias

Mai d'articles

Archius




D'autres articles


Jornalet, gaseta occitana d'informacions