CAPÇALERA: Eth Ligam occitan Youtube

Jornalet, gaseta occitana d'informacions

Dimècres, 12 d'agost

Reinat Toscano

Divendres, 6.2.2015 03h00

Ensenhament de l’occitan au licèu de Brinhòla


Comentaris 7 comentaris    
Dolent Fluix Bo Molt bo Fabulós (9 vòtes)
carregant En cargament


Au licèu de Brinhòla, l’ensenhament de l’occitan a ren d’un lòng fluvi tranquille! Ren de ben originau, per dire la veritat: totjorn la sansonha que coneissèm, que fa que ren se pòu metre en plaça ni mantenir que que siegue sensa la bòna volontat administrativa: problema d’oraris incompatibles, informacion deficienta ò pas facha, opcion pas mencionada dins lu dossiers d’inscripcion... Avèm ja tot vist deis empachas possiblas...
 
En setembre de 2013, noveu Provisor, aparentament dubèrt: recampi en catastròfa 9 escolans de 2a e, miracle! Tròbi una ora comuna per n’aculhir 5! Obtenèm 1 ora per setmana e capitam de metre en plaça un projècte pedagogic: una senhaletica en occitan, que lei promiers elements son pausats en decembre: “Sala dei Professors”, “Secretariat dau Provisor”, “Secretariat dau Provisor Adjonch”. Mai en janvier, au retorn dei vacanças, plus de senhaletica! Cu l’a arrancada? Lo Provisor Adjonch que s’es planhut au Provisor d’èstre pas estat avisat? Lei secretàrias, qu’avián clarament mostrat sa desaprobacion au moment de l’installacion? De professors, que d’únei s’èran declarats clarament còntra en nom de la Lèi Toubon? Quauqu’un d’autre? Mistèri... E pas question d’aver la permission de contunhar lo projècte...
 
Costat informacion, lo Provisor mandèt una letra ai Collègis dau sector per informar leis escolans de 3a, en prepausant mon intervencion dins lei classas. Deguna responsa... Saupèri lo perqué quora venguèron au Liceu per un acamp lei professors principaus de 3a: per la màger part, l’informacion li èra pas arribada. E aquélei que l’avián aguda (pegada en sala dei professors sensa deguna explica) l’avián pas legida... Tant que lei collegas èran aquí, n’avèm aprofichat per faire una novèla distribucion d’informacion (desplegant, acompanhat de la brocadura “L’occitan, qu’es aquò?”).
 
Passèron quàuquei setmanas. Quora pausèri la question a d’escolans de 3a vengut en visita de descubèrta au Liceu, degun aviá ausit parlar de provençau... M’aquò, se comprèn facilament que, en setembre de 2014, 1 escolan solet (sobre pauc ò pron 1700) s’èra marcat. E coma lo Provisor Adjonch aviá ja recuperat l’ora de provençau per completar mon servici d’italian, inutile de seguir la demanda dau Provisor de cercar de volontaris...
 
Arribam en janvier. Lo Provisor me tòrna demandar d’alestir una letra per informar lei Collègis. Me demanda se pòdi ajónher lei logòs d’associacions ò d’organismes, istòria de donar mai de pes au corrier. Leu dich, leu fach: lo Jornalet respònde de òc immediatament, coma Prouvènço d’Aro, Aquò d’Aquí, lo CIEL d’òc e l’IEO. Mai pas lo Felibritge, perqué lo cors de provençau dau Liceu es pas una accion dau Felibritge ni d’un Felibre... D’aitant mai que l’Escòla felibrenca locala, dins la drecha linha dau “Couleitiéu”, a totjorn mes d’empachas au trabalh fach au Liceu, per exemple en disent a la cantonada que faliá pas marcar seis enfants perqué èra pas de provençau que s’ensenhava! Coma se lo Capolier Pèire Fabre aguèsse acceptat d’inscriure seis enfants dins un cors onte se siguèsse pas pres en còmpte la grafia mistralenca!
 
La letra, doncas, la farai, e veirèm ben...
 
A! Oblidavi: aqueu Liceu onte de gents vòlon pas vèire la lenga d’òc ensenhada pòrta lo nom de ... Raynouard. Çò que rèsta d’eu se deu revirar dins son cròs en vesent pariera situacion!



publicitat
BANER1: Amics campanha covid



Comentaris

22 de julh 15.08h

#6 Gramací per aqueu comentari.
Lo problema dei collegas, es que per la màger part son opausats à la lenga nòstra (en nom de la democracia e de l'egalitat!), ò alora son favorables quand fa ganhar d'oras per mantenir un pòste e sensa opinion quand i a pas besonh de se batre per un pòste (mon afectacion oficiala es en italian, es à dire que cada ora de provençau que pòdi faire desgatja automaticament una ora d'italian, quand l'occitan es dins mon orari, çò qu'es pas totjorn lo cas...... Legir la seguida


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

22 de julh 13.38h

Coneisse bien vòstres escrichs. Me plason vòstre estile mai vòstre parlar.

A despart d'aquò, sens mai far d'alòngui sus vòstra escritura qu'es pas lo subjèct aicí, vos dise pas qu'una causa : "Gramecí e òsca per la pena que prenètz, per vòstra accion en favor de la lenga !".

La situacion es complicada dinc l'ensenhament public, malerosament...
Coratge, demoressiatz pas sol dinc vòstra òbra, cercatz-vos de sosten en cò de vòstres collègas,
en esplicar bien la rason e lo ben d... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

18 de junh 07.00h

Quàuquei nòvas... Dos collègis an respondut à un corrier de l'IEO, per dire que son demandaires d'informacion. Aquò es una bòna nòva... Mai díson que li agradarié qu'aquesta informacion siguèsse facha, en mai de l'IEO, per lo professor dau Liceu... Un dei collègis a demandat au professor (=ieu) per l'intermediari d'una collega amiga. Perqué pas per la via ierarquica? An pas reçauput la famosa letra d'informacion? Perqué lo problema es que lo provisor dau Liceu es estrechament esta... Legir la seguida


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

15 de març 15.25h

Ai pas vist la letra mandada, mai aparentament sembla que siegue arribada... Sensa deguna responsa oficiala, evidentament... Solament una responsa oficiosa, d'un collègi que vòu estudiar la possibilitat de durbir l'opcion l'an que vèn (se m'encargui dei cors, causada aisada, evidentament, entre mei cors d'italian au Liceu, de la 2a a la Terminala + la seccion professionala e lei BTS, mei cors d'occitan per l'IEO e autreis activitas...). Mai ren d'oficiau per lo moment... (doncas ren de solid... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

18 de febrièr 08.49h

A veire lo pauc de comentaris, a creire qu'autra part tot es excellent -au contrari de çò qu'es presentat aicí- o alora qu'interèssa degun??


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

8 de febrièr 15.33h

Eths "collègas" de qui's declaran contra "en nom de la Lèi Toubon" (e perqué dera Ordonància de Villers-Cotterêts tant que i son), de que i avèvan coma tòca permèra de protegir eth francés dera dominacion deth anglés pera permèra o deth latin eclesiastic pera segonda, e saben qui èra Raynouard aumens ? Que seré dilhèu bon d'arrebrembar'us, istuèra de botar'us davant eras loas contradiccions e que deuràn logicament resòlver en arrebatiar eth licèu, que veirem alavetz çò que'... Legir la seguida


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

8 de febrièr 08.30h

Mercés per aqueu testimoniatge de situacion extremament dificila de l'ensenhament d'occitan au sègle 21... Se cada professor testimònia de sa realitat d'ensenhament ansin, aurem de pròvas concretas per faire avant. O au mens per metre lo monde davant sa realitat.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Reinat Toscano

Reinat Toscano logo rss

Escrivan, poèta e professor d'italian e occitan. Autor d'una Gramàtica niçarda

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions