CAPÇALERA: ETH LO
CAPÇALERA2: FAI-TE SOCI

Jornalet, gaseta occitana d'informacions

Dissabte, 14 de decembre

Terric Lausa

Divendres, 15.1.2016 03h00

Pro d’aquesta injustícia!


Comentaris 8 comentaris    
Dolent Fluix Bo Molt bo Fabulós (19 vòtes)
carregant En cargament





Àudios Pro d’aquesta injustícia! (MP3, 8' 2'')

Escolta audio


Etiquetas
jornalet, lausa, macip

Devi reconéisser que l’estat francés, que sovent critiqui en rason del sieu comportament occitanofòb, a una politica sociala interessanta pels ciutadans, se la comparam amb la d’autres païses europèus. Se pòt presar especialament l’existéncia del salari minimal universal, qu’es la basa essenciala de la proteccion dels trabalhadors, dels comjats pagats o del descans ebdomadari.
 
Per Occitània, l’SMIC francés orari en 2016 fa 9,67 èuros, lo de l’estat espanhòl es de 5,13 èuros. Dins l’estat italian la mesa en plaça d’un salari minimal es pas encara faita. S’i parla d’un taus orari d’unes 7 èuros. Per tant que protectors que pòscan èsser los salaris minimals, sabem ben qu’aquò es pas pro per poder viure amb tranquillitat e decéncia e que permet pas la seguretat financièras dels que lo percevon. Mas ja es quicòm.
 
Tèni un amic que non se pòt pas solament prevaler de la proteccion minimala deguda als trabalhadors. Se fa espleitar. Se fa espleitar non solament al nivèl del sieu salari senon que tanben al nivèl de las vacanças que li son pas pagadas e al nivèl del sieu descans setmanièr. Mon amic trabalha apuprètz 42 oras per setmana, amb pas cap de jorn de descans e sens un solet jorn de vacanças. Se reportam lo trabalh que fa al taus orari es pagat 1,93 èuros per ora, çò es lo nivèl d’un país coma Libia, Chili o Romania. Mon amic jamai non se planh d’aquesta situacion. Es apassionat pel sieu mestièr. Lo fa amb passion, metodologia, professionalisme, competéncia, fe e sustot amb amor. Mon amic trabalha pas en Romania o en Libia. Es fòrça mai pròche nosautres. Demòra dins un continent e un país que li deuriá portar sa proteccion sociala. Viu e trabalha per Occitània dins aqueste perlogament frairal del País Nòstre qu’es Catalonha. Viu e trabalha per Occitània totalament, amb lo còr, lo cap e las tripas. O fa fins a l’esgotament mas sens jamai s’en cansar. Parli de mon amic Ferriòl Macip Bonet, lo creator e cap-redactor de Jornalet.
 
Benlèu n’i a que pensan que fargar un web-jornal amb quatre articles, una cronica d’opinion per jorn e de rubricas divèrsas es quicòm d’aisit e de rapid. S’enganan. Ferriòl trabalha entre 5 a 8 oras per jorn cada jorn (se permet d’i passar “sonque” 3 oras lo dissabte). Gerir un jornal es pas sonque una istòria d’escritura d’articles. I a un trabalh important de velha informacionala, de recampament de las fonts, de lecturas, de seleccions de las nòvas, de contactes, de collècta d’imatge, de traduccions, d’animacion de la còla, de gestion de l’espleit informatic e ne passi e ne doblidi. Per tot aqueste trabalh en 2015, Ferriòl s’es pogut pagar 4216 èuros, siá 351 èuros per mes, siá 1,93 èuros de l’ora. Segon los estandards catalans dels SMICS en 2015, auriá degut receure 11 203 èuros e segon los estandards franceses 21 119 èuros. E aquò se parlam de salari minimal! Se parlam de salaris jornalistics Ferriòl auriá degut receure 35 000 èuros per l’annada. Ne cobriguèt sonque l2%!
 
Aquò —o disi amb gravetat— es una injustícia insuportabla. Non se pòt pas demandar a qualqu’un de far un mestièr e de non pas èsser pagat. Un poiriá dire: “Mas perqué diable Jornalet es gratis? Foguèsse pagador lo sit lo Ferriòl se poiriá sortir un salari!”. Mas pas d’engana aquí. Sabem ben, a la lutz de l’extrèma fragilitat de la premsa occitana, que se Jornalet non foguèsse pas gratis, degun lo legiriá pas. E puèi cal dire que Ferriòl es un òme desinterassat. Sonque li impòrta lo desvolopament de la lenga occitana, la dignitat del país d’Òc e l’amor del pòble. S’aquò lo deu condemnar a la pauretat, es lèst de s’i abandonar e o fa amb lo sorire.
 
Mas nosautres legeires podem pas èsser complicis d’aquesta injustícia. S’aimam legir Jornalet, s’ aimam dubrir internet per i descobrir l’informacion Nòstra, s’avem d’estima e d’amistat per Ferriòl alara nos devem bolegar! Podem pas demorar los braces crosats en esperar que d’autres se petaçaràn a nòstra plaça. Totes sabem que la situacion economica es dificila. Cada còp mai de monde tenon de problèmas de sòus, de salaris, de pensions. Demandam pas als legeires de se metre en dificultat personala mas al mens que cadun faga quicòm. QUE CADUN FAGA QUICÒM!
 
Avem fargat una associacion —que ne soi clavaire— dels Amics de Jornalet. L’escotisson es de 20 èuros. Ongan sonque un trentenat de personas se son marcadas, contra 60 l’an passat. Es pas amb 30 personas qu’arribarem a far quicòm de juste e de digne. L’an passat lo micromecenatge aviá plan foncionat. Lo pòble amb generositat e espontaneïtat aviá donat, mas èra pas a destinacion de Ferriòl: la moneda acampada serviguèt per cambiar l’ordenador e pagar l’albergament del sit internet. Volontariament aquí parli sonque de Ferriòl perqué la siá situacion es la mai urgenta e dolorosa. Mas doblidi pas totes los collaborators que trabalhan e donan d’oras en quantitats sens remuneracion, siá en tot escriure d’articles siá amb la revision lingüistica e qu’un jorn ne caldrà parlar. Aquestes gents tanben s’ameritan l’òsca.
 
Cal saber que totas las collectivitats departamentalas e regionalas son estadas contactadas per subvencionar Jornalet. Totas an refusat de donar res. Avèm contactat l’ÒPLO recentament nascut, mas es pas encara en foncionament. Cresi que la sola ressorça serà nòstra, los legeires, las gents qu’aimam legir Jornalet, las gents qu’estimam e qu’aimam Ferriòl. Nos cal donar, contunhar de donar, tornar donar.
 
Ferriòl Macip Bonet pòt pas viure amb Jornalet. Lo paure el subreviu. A pas un autre mestièr que li permetriá de veire en Jornalet un passatemps de benvolença. Jornalet li pren la màger part de son temps. Per poder manjar, corrís pertot arreu Barcelona, aquí a donar de corses d’occitan, ailà de corses d’esperanto, amont a far lo musicaire, aval a far de traduccions. Mon amic Ferriòl, nòstre amic Ferriòl, per subreviure, sacrifica sa vida personala. Se sacrifica per far viure Occitània.
 
Ara o sabètz.
 
 
 


Per donar 2 solucions:
 
1. Chèc, Paypal o Virament bancari al AMICS DE JORNALET
 
2. Virament dirècte a Jornalet a Barcelona al compte Caixa d’Enginyers:
— IBAN ES79 3025 0001 1414 3339 8145
— SWIFT CDENESBBXXX
al nom d’Associacion entara Difusion d’Occitània en Catalonha



publicitat
BANER1-2-3: DGPL AN LAFONT



Comentaris

18 de genièr 21.08h

Osca a vosautres brave mond, tenetz vos fiers!


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

17 de genièr 18.34h

#6 .Que me semble ben.Hèt virament de 120 Euros.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

15 de genièr 21.25h

Se m'engani pas dins mei carculs, e en arrondissènt lei chifras, manca a Ferriòl 7000 € pèr ajonhe au mens lo SMIC catalan. Se divisam aquela soma pèr lei 60 qu'an aderit a l'associacien de sostèn au Jornalet, fa 120 € dins l'anada. M'engagi a pagar aquela soma.

Amistats en totei e especialament a Ferriòl e Terric.


Valora aquest comentari:   votar positiu 11   votar negatiu 0
Respondre comentari replica Comentari inadequat   Formulari d'abús de comentari

15 de genièr 20.01h

anam faire un rampèl sus la letra de la FELCO.


Valora aquest comentari:   votar positiu 15   votar negatiu 0
Respondre comentari replica Comentari inadequat   Formulari d'abús de comentari

15 de genièr 13.56h

Me fie que qu'es un article plan esmavent dau Terric Lausa e mai ieu sia de costuma pas totjorn de bana coma se.
Vau probable paiar l'escotisson de sosten. Mercés a Terric.


Valora aquest comentari:   votar positiu 18   votar negatiu 0
Respondre comentari replica Comentari inadequat   Formulari d'abús de comentari

15 de genièr 13.04h

La setmana a besonh d'argent; jornalet a besonh d'argent e aqueus jornaus an dau mau a interessat los legissaires. Es benleu ora de se pausar de las questions.
L'òm a l'impression que tot çò que l' òm fait o dich interessan pus degun; la critica arrieba leu quand quauqu'un entrepren quauqua ren. Quò es pas solament vrai per los occitanistes. Quò es vrai per los occitans mai tots los frances. Degun a pus de got a se revoltar; las manifestacions assemblan pas lo monde que chaldria, l'econ... Legir la seguida


Valora aquest comentari:   votar positiu 0   votar negatiu 1
Respondre comentari replica Comentari inadequat   Formulari d'abús de comentari

15 de genièr 11.35h

Demori que non semble un article d'autopromo nimès d'egolatria. Non ac voleria jamès.
Me cau díder que plorè coma ua ceba d'emocion en moment de liéger er article de Lausa abans de publicar-lo en Jornalet. Quan hès es causes per passion, sens cap d'interés, non ac arremèrques enquiath moment que quauquarrés t'ac arreconeish. Quan hès es causes per amor, eth melhor pagament, ei qu'aqueth amor sigue rendut e partejat.

Te tot còr, fòrça gràcies Terric.


Valora aquest comentari:   votar positiu 24   votar negatiu 0
Respondre comentari replica Comentari inadequat   Formulari d'abús de comentari

15 de genièr 10.23h

Ferriòl Macip es una persona admirabla. De mai en mai se sap qu'es una persona de primièra importància per l'occitanisme. Dins lo futur pròche serà reconegut coma un grand òme e coma un eròi d'Occitània.
E ara, immediatament, totes li devèm portar nòstre sosten material. Que participem totes al finançament de Jornalet!


Valora aquest comentari:   votar positiu 18   votar negatiu 1
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL TRADUCTOR

Perfil

Terric Lausa

Terric Lausa logo rss

Faguèt d'estudis d'occitan a l'Universitat de Montpelhièr. Militant occitanista e aimador de la frairança occitano-catalana.

mai d'informacions

contactar l'autor

Las mai...


Mai d'articles

Archius




Etiquetas

lausa   thunberg  

D'autres articles


Jornalet, gaseta occitana d'informacions