CAPÇALERA: IEO09-01
CAPÇALERA2: OPLO

Jornalet, gaseta occitana d'informacions

Dimècres, 7 de decembre

Terric Lausa

Divendres, 4.1.2013 03h00

Rompedura: Letra a un ancian amic francés que me retirèt la paraula perqué soi un sobeiranista occitan


Comentaris 37 comentaris    
Dolent Fluix Bo Molt bo Fabulós (29 vòtes)
carregant En cargament





Àudios Letra a un ancian amic francés que me retirèt la paraula perqué soi un sobeiranista occitan (MP3, 5' 27'')

Escolta audio


Etiquetas
lausa, rompedura

Mon car Cristòl,
 
Me desencusaràs de t’escriure publicament aquesta letra de vòts de Cap d’An. Comprendràs qu’es lo solet biais qu’ai trapat, ja que respondes pas pus al miu corrièr postal, ni als mius apèls de telefòn, SMS, e-mails, ja que m’as esfaçat de la lista dels tius amics de facebook dempuèi qualques meses.
 
A la debuta, ai pas comprés aqueste silenci. Te pensavi ocupat o preocupat. Los amics sabon èsser presents mas l’amistat se noirís tanben, de còps que i a, d’aluenhaments. Me fasiái pas cap de làgui. Puèi, doçamenton, comprenguèri que quicòm se passava: èra pas normal que me donèsses pas pus de nòvas e doçamenton venguèri a me demandar se me fasiás pas la cara.
 
La tiá amistat m’èra preciosa. Partatjàvem un fum de valors, d’interesses, de passions comunas: las lengas, charrar de politica, l’occitan, l’educacion, l’istòria e la literatura. Èri admiratiu de çò letrut ençò tiu, de la noblesa de la tiá tenguda, de ta larga cultura alternativa e de ton sens de l’umor tot en ironia e finesa. Pensi qu’aimavas lo miu costat terradorenc e montanhòl, çò instinctiu en ieu en matèria de lenga occitana. Teniam una amistat complementària e fòrta.

L’istòria de las nòstras vidas nos a desseparat del punt de vista geografic, mas los mejans de comunicacion de uèi nos an fait servar un contacte pròche pendent un brave brieu. Mas ara es la rompedura totala.

Nafrat d’aquò, soi anat cercar d’explicas ont las podiái trapar: sus internet. Anèri veire sus unas paginas e blògs ont sabiái qu’i anavas regularament se se rescontrèsson qualques signes de ton existéncia e en tot legir mantunes de tos comentaris qu’escriviás aquí e ailà, d’un còp la vertat m’espetèt a la figura: aviás pas acceptat lo miu engatjament nacional occitan! Aviás trencat totes los ligams que nos unissián perqué suportavas pas mai qu’èri un patriòta occitan independentista e qu’o fasiái saber. E tanpauc suportavas pas las miás simpatias cap a l’independentisme catalan.

Ara tot m’es clar coma aiga clara. Pr’aquò te trufavas de totes los imperialismes en tot dire qu’èran una malautiá de l’esperit uman, una catastròfa pel planèta, que t’enfadavas en parlar dels nacionalismes de conquèsta, que te declaravas solidari de totes los paures chechèns, tibetans, palestinians e autres africans victimas de la colonizacion. E ben finalament e paradoxalament, acabères en considerar que ieu èri una persona de missant frequentar per la sola rason qu’aviái decidit de far fàcia a çò qu’aviam a l’ostal: l’imperialisme francés en Occitània. Aqueste imperialisme, lo francés al dintre de l’exagòn, te pausava un grèu problèma de consciéncia. Lo podiás pas acceptar e encara mens lo reconéisser. E finalement decidiguères de me retirar la paraula. Polida politica de l’estruci e polida demostracion del cas tipic d’esquiz-òc-frenia!
 
Òc, ara tot m’es clar. E dire que te disiás amic de l’occitan! Mas la vertat es qu’ès asservit al nacionalisme francés. T’ai legit que disiás que voliás pas cap de frontièras per anar de Marselha a Brest. Mas qual ne vòl? Sabes pas que i a pas mai de frontièras en Euròpa? Cossí tu, òme senat, pòdes creire a la perspectiva d’una Occitània e d’una Catalonha sobeiranas que pausarián frontièras ermeticas? Soi segur qu’i creses pas brica a aquela teoria farlabicada del ghetto, que volontariament difusas messorgas que quitament tu i creses pas. Dises qu’ès favorable a l’union, que t’agrada l’idèa de poder viure amassa amb los bretons e los parisencs. Que t’agrada de pas aver a sortir un passapòrt per passar de Barcelona a Madrid. Plan. Nosautres tanpauc o volem pas del replegament. Per contra, çò que volem es decidir al país. Volem dintrar dins lo camp de las nacions del planèta. La sobeiranetat occitana e catalana son una luta per mai de democracia. Te rendes compte de çò qu’escrives de còps que i a: fas passar los patriòtas catalans e occitans per de fascistas! Voler la democracia pels nòstres païses es èsser fascista aquò?

Quina caricatura ès vengut mon vièlh! Quin ipocrit! Quina pauretat d’imaginacion politica tenes en la ment! Aviái pas brica soscat que podiás èsser tant jacobin, tant imperialista coma aquò! Jos la masqueta de la tolerància progressista d’esquèrra aviás plan amagat un conservatisme ferotge. Pensavi que teniás las meteissas preocupacion pel pòble occitan que ne teniás pels toaregs o pel amazighs . Mas ailàs, m’èri enganat: aquò te servissiá pas qu’a renforçar lo tiu nacionalisme francés. En te legir suls sits internet comprenguèri qu’allòc d’èsser un tipe dubèrt, en realitat, èras un servidor del sistèma ideologic estatal jacobin de França e d’Espanha a un punt tant naut qu’aviás decidit de trencar mantunas annadas d’amistat amb ieu per defendre l’idèa de l’union qu’en vertat es l’idèa de la preson dels pòbles al dintre d’estats-nacions jacobins.

Victima de ton educacion classica, te pòdes pas imaginar qu’una realitat nacionala autra que las de França e la d’Espanha pòscan existir? Disi “victima”, mas fin finala ai pas enveja de te balhar lo pretèxte aqueste. Ja tenes pro de vivacitat intellectuala per te fargar d’idèas plan perpensadas e as causit las idèas imperialistas francesas e espanhòlas. Auriás pogut emplegar ton intelligéncia a explorar los camins de la democracia e de la libertat per Occitània e per Catalonha. Allòc d’aquò, as decidit de te metre al servici moral del francisme e de l’ispanisme, doás declinasons de l’opression.

Pensaràs coma voldràs. Pauc me fa. Mas a l’avenidor, me fariá gaug que tornèsses pas declamar qu’ès un aimador de la libertat perqué çò qu’aimas abans de tot es la tota-poténcia de França e d’Espanha, e tanben, sens te comandar, m’agradariá vertadierament que quitèsses de parlar d’Occitània e de Catalonha: quand òm arriba al punt de se desamistosar de qualqu’un jol pretèxte que la persona es un patriòta occitano-catalan òm se declara adversari d’Occitània e de Catalonha.

Sabes de qué mon car Cristòl, o dirai puslèu mon pauvre Christophe? Desenant, la tiá amistat, me’n foti. S’aimas melhor doblidar una amistat al nom de la fiseltat a l’estat francés, aquò vòl dire que, fin finala, tu ès la persona pauc recomendabla. E ton amistat soi ieu que la vòli pas pus.
 
La construccion d’Occitània e de Catalonha deurà far lo sacrifici d’aquesta mena de comportaments d’intolerància. Rai de las amistats contra-natura! Rai dels pesucs del cervèl!

Totun al nom del sovenir amistós, te desiri una bona santat e una bona vida de familha. Per contra desiri l’esfondrament de la causa que defendes.



publicitat
BANNER1 - OPLO erasmus



Comentaris

10 de genièr 09.20h

#37
En parlar de cons....

http://www.youtube.com/watch?v=N51Yh1GPw3Q


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

9 de genièr 18.34h

Tot lo monde ne parla, doncas vèni far un torn sus aqueste article e son fais de comentaris!
Dèu èsser la contaminacion de Facebook... Terric, pecaire, qual es aquel Cristol? lo coneissèm pas! Una letra dubèrta es per una autoritat, un qualqu'un de conegut!
Alara me'n soi pagada una bona en legir d'estimables conselhs sus l'amistat : "ieu podi pas èsser amic ambe qualqu'un qu'es pas tolerant"... e ieu tanpauc, coma podi pas èsser amic ambe los cons, mas son doas categorias que son pas d... Legir la seguida


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

8 de genièr 16.37h

#33 "La calómnia, la deformacion, la violéncia verbala, l'insulte e la manca de moralitat sorgisson sempre a partir dau camp deis antinacionalistas." Aquò que's deu, per ua grana part, au refús deus antinacionalistas de cambiar de pseudonime quan an a tiéner prepaus dont saben que seràn considerats com agressius ;-)


Valora aquest comentari:   votar positiu 1   votar negatiu 4
Respondre comentari replica Comentari inadequat   Formulari d'abús de comentari

7 de genièr 05.31h

Responsa #34

Car Laurenç de Pau estant, èsser nacionalista occitan aquò vòl pas dire que refusam de parlar francés. Cossi podriam far autrament a l'ora d'ara ?
Esser nacionalista occitan es explicar al pòble nòstre que sèm un pòble e que sa vertadièra lenga nacionala es l'occitan e pas lo francés.
Es explicar tanben que lo francés qu'avèm recebut de l'escòla tot en francés es per nosaus la nòstra primièra lenga internacionala que nos permet de comunicar damb de monde que parl... Legir la seguida


Valora aquest comentari:   votar positiu 8   votar negatiu 1
Respondre comentari replica Comentari inadequat   Formulari d'abús de comentari

6 de genièr 22.32h

Que podem saunejar d'ua nacion occitana, mes que cau realizar que lo monde d'Occitania s'estima mei de franchimandejar...
De mei la revendicacion sobiranista occitana que questiona la capacitat de víver dens ua societat multiculturau.
Que soi occitanista e tribalhi tot lo dia dens lo maine de la lenga occitana, mes i avoré doman un estat Occitan dab institucions occitanas e occitan coma lenga officiau tot aquò ne poiré pas empachar qu'avossi recebut tanben la lenga e la cultura francesa en... Legir la seguida


Valora aquest comentari:   votar positiu 7   votar negatiu 1
Respondre comentari replica Comentari inadequat   Formulari d'abús de comentari

6 de genièr 17.03h

#32 Es una realitat que se demòstra regularament dins lei debats de l'occitanisme en generau.
La calómnia, la deformacion, la violéncia verbala, l'insulte e la manca de moralitat sorgisson sempre a partir dau camp deis antinacionalistas.
Ai demostrat, dins aquesta discussion, que i a agut d'insultes venent d'antinacionalistas (de #15 e #16: de "Florachan" —ara es estat escafat— e de "Jaumes Privat"). Cresètz que leis antinacionalistas an reagit? Que non...
De segur, i a d'antinacionali... Legir la seguida


Valora aquest comentari:   votar positiu 8   votar negatiu 2
Respondre comentari replica Comentari inadequat   Formulari d'abús de comentari

6 de genièr 15.53h

Responsa a #30
Amb l'an vovèl soi uros de retrobar Sénher Bourdon d'Auloron
Constati que la tissa (la manie en francés) de caricaturar la pensada nacionalista l'a pas quitat.
Lo vau rassegurar se n'a besonh : Nosaus los nacionalistas, independentistas e sobeiranistas occitans sèm tant talament intolerants que pensam que s'es anti nacionalista occitan es lo seu dreit e a lo dreit de o dire dins Jornalet o endacòm mai e direm coma Voltaire que s'es empachat de o dire nos batrem per que o p... Legir la seguida


Valora aquest comentari:   votar positiu 10   votar negatiu 0
Respondre comentari replica Comentari inadequat   Formulari d'abús de comentari

6 de genièr 10.16h

Responsa a # 29

Vertat es que uèi los occitans se vòlon franceses. E alavètz ?
Cal gaitar la realitat que vivèm dempuèi decadas de la naissènca sociala collectiva (a l'escòla essencialament) dinc a la mòrt sèm embucats de narcotic blau blanc roge cossi volètz que lo sobeiranisme occitan siaga majoritari ... ?
Es una rason per los encoratjar de contunhar sus aquesta dralha ?


Valora aquest comentari:   votar positiu 7   votar negatiu 1
Respondre comentari replica Comentari inadequat   Formulari d'abús de comentari

5 de genièr 21.09h

#23 E totun, dab los nacionalistas gascons, los nacionalistas occitans qu'an exactament la medisha reaccion que los nacionalistas francés de cap ad eths.

Entaus nacionalistas occitans, ua reivindicacion independentista qu'ei legitima, e en suberpés, qui ne la defend pas qu'ei un "renegat", segon estó dit ací per un nacionalista occitan dont desbrombès de soslinhar a quin punt ei "tolerant"...

Mes per contra, se la reivindicacion ne pòrta pas mei sus l'Occitania, mes sus ua part deu son ... Legir la seguida


Valora aquest comentari:   votar positiu 3   votar negatiu 8
Respondre comentari replica Comentari inadequat   Formulari d'abús de comentari

5 de genièr 19.52h

#28 E òc, la quasí totalitat de la populacion occitana del territòri francés a una consciéncia nacionala francesa. Es per aquò que la nacion occitana pòt pas èstre exclusiva, se que non se condemna...


Valora aquest comentari:   votar positiu 3   votar negatiu 8
Respondre comentari replica Comentari inadequat   Formulari d'abús de comentari

5 -10 -20 -tots
1
-
2
-
3
-
4 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.

Perfil

Terric Lausa

Terric Lausa logo rss

Faguèt d'estudis d'occitan a l'Universitat de Montpelhièr. Militant occitanista e aimador de la frairança occitano-catalana.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions