CAPCALERA: la botiga

Jornalet, gaseta occitana d'informacions

Dimenge, 25 de julh

Terric Lausa

Dijòus, 15.7.2021 03h15

Jornalet non serà pas un espaci d’injustícia!


Comentaris 8 comentaris    
Dolent Fluix Bo Molt bo Fabulós (23 vòtes)
carregant En cargament





Àudios Jornalet non serà pas un espaci d’injustícia! (MP3, 5' 28'')

Escolta audio


Sèm lo lendeman de la fèsta nacionala francesa e nos trapam amb un gost amar dins la boca. Occitània a pas res agut a celebrar. Las atacas insensadas del govèrn contra nòstra lenga son ineditas. París a sortit contra nosautres un arsenal juridic de guèrra e dins los “territòris” —coma dison ara— la màger part dels politicians regionals sucursalistas se calan e en realitat voldrián que nos calèssem. Mas nos calarem pas e Jornalet a un ròtle immens a jogar per que nos calem pas. Jornalet es un espleit de luta que nos cal gardar.
 
En 2016, puèi en 2019, al nom de l’associacion dels Amics de Jornalet, aviái lançat una crida —un bram— a la mobilizacion per de dons. Explicavi la situacion dificila e injusta de las finanças de nòstre jornal occitan. Contèri las dificultats economicas personalas del cap-redactor Ferriòl Macip e coma el trabalha amb passion e assiduitat cada jorn per produsir un webjornal tot en occitan, un jornal que dona tota sa dignitat a la lenga e al país.
 
Jornalet non se fa pas en un clucar d’uèlh. Un fum d’oras de trabalh son necessàrias cada jorn. Donarai un exemple. L’entrevista del deputat Joan Lassala: calguèt d’oras de mobilizacion per trapar lo mejan de lo contactar, metre al punt un rendètz-vos vidèo e l’entrevistar. Prenguèt d’oras e d’oras per transcriure a l’escrit las paraulas de l’entrevistat. Los articles que cada jorn sortisson e que prenon qualques paucas minutas a legir, necessitan d’oras de preparacion, de velha informativa, d’escambis amb los actors de l’actualitat, de traduccion. Al trabalh de cap-redaccion, s’ajusta cada jorn las innombrablas oras de trabalh nocturne de revision lingüistica, faita per Joan Barceló, e los enregistraments àudio de Tomàs Hirondelle. Lo public non se n’avisa pas. Es la magia de la premsa.
 
Aquel temps, aquelas oras, aqueles jorns, meses e annadas passadas a fargar Jornalet, sens dimenge ni vacanças, es lo temps de Ferriòl Macip dempuèi mai de 9 ans. Fa 3393 jorns que Ferriòl òbra al jornal en occitan qu’es la referéncia informativa occitana. 3393 jorns! E en 3393 jorns el a pas ganhat ni un èuro ni un centim. Res.
 
Totas las temptativas faitas per ensajar de recebre de moneda publica an fracassat. L’ÒPLO —que nos presentèron per èsser un espleit de desvolopament de la lenga occitana— a refusat de portar la mendre ajuda financièra a Jornalet, malgrat las promessas. Podèm pas comptar que sus la generositat dels legeires.
 
La decéncia me fòrça de calar las obligacions financièras de tèrme cort que son a mand de tombar sus las espatlas de Ferriòl Macip. Son d’obligacions del quotidian, que qual que siá amb un salari basic, normal, poiriá onorar, mas que meton Ferriòl dins la precarietat mai absoluda. Perqué la realitat la vau dire: Jornalet viu perqué Ferriòl subreviu e s’empaurís!
 
Pensaretz qu’i a pas res de nòu e que fa d’annadas que planhèm aquesta situacion. Òc, es vertat. Mas al cap de 9 ans, la lassièra financièra s’installa e degun que trabalha deuriá pas èsser forçat de manlevar d’argent a sa familha per subreviure.
 
Lançam doncas una campanha de dons. Fasèm una crida a la generositat dels legeires. Totes nosautres los legeires de Jornalet, los locutors d’aquesta lenga millenària que vòl pas morir, sèm diferents, amb de vejaires e d’opinions que divergisson e sovent s’opausan. Mas tenèm totes lo meteis sentiment d’amor per nòstra lenga e totes tenèm lo meteis sentiment de revòlta contra l’injustícia. Far un don a Jornalet, es lutar per la lenga e contra l’injustícia.
 
Que cadun lute per l’occitan!
Que cadun faga un don a Jornalet!
 
 
 
Terric Lausa,
clavaire dels Amics de Jornalet
 
 

 

fffff   fffff
  Per far un don:
 
— Chècs a l’òrdre de: “Los Amics de Jornalet” d’enviar a

Associacion Los Amics de Jornalet
6 carrièra Victor Hugo
11500 Quilhan
 
— Transferiments bancaris dirèctes sul compte de Jornalet:
 
IBAN: ES79 3025 0001 1414 3339 8145
Còde BIC o SWIFT: CDENESBBXXX
 
— PayPal: paypal.me/jornalet


L’actualitat de la campanha de dons se poirà seguir sus la pagina Facebook dels Amics de Jornalet: www.facebook.com/Losamicsdejornalet
 
     
 
 

 
 
 


 
 
abonar los amics de Jornalet
 
 



publicitat
BANNER1 - AMICS DE JORNALET 07/21



Comentaris

17 de julh 10.32h

#7
correccion :
n'i a que ne pòden pas COMPRÉNER arren, son tròp "estequits"....


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

17 de julh 08.41h

"préner la causa damnada
de nòsta lenga mespresada ,
per l'aunor deu país sosténguer
e per sa dignitat mantéguer."

Hèi qüate sègles que lo Pèir de Garròs avèva comprés aquò.
Qüate sègles que trabalham a gratis nosautes qu'aimam la nòsta lenga , e qu'avem comprés .
Ferriol Macip tanben. Es de respectar.

M'agrada de trobar lo "Jornalet " cada jorn ? m'agrada de pagar un "abonament".

Mès au contre , n'i a que pòden pas comprés arren , son tròp "estequi... Legir la seguida


Valora aquest comentari:   votar positiu 12   votar negatiu 0
Respondre comentari replica Comentari inadequat   Formulari d'abús de comentari

16 de julh 13.28h

#5

AH òc ! :-)

Crèsi qu’es vos lo moralista amator dins aquel article i a una culpabilizacion fera çaquelà sus una basa de siá disent injusticias, coma s’èran los legeires de jornalet qu’escardussavon lo paure En Feriòl. Es enfòra de tota realitat, lo biais d’aduire las causas es un afachament pietadós.

La situacion umana dificil i compatissi mas es pas de iò, es de vosaus e vòstra incapacitat que vos ten aquetat.
Fasetz pagar per legir jornalet atal En Feriòl... Legir la seguida


Valora aquest comentari:   votar positiu 6   votar negatiu 18
Respondre comentari replica Comentari inadequat   Formulari d'abús de comentari

16 de julh 10.33h

#4
"De genolhos, cap de libertat possibla"
De vertat?

Fasètz lo conselhièr e lo moralista en parlar d'una situacion umana dificila.
Parlatz de libertat en amagar vòstra cara.

En realitat es plan dolenta e minabla vòstra manièra de far


Valora aquest comentari:   votar positiu 20   votar negatiu 9
Respondre comentari replica Comentari inadequat   Formulari d'abús de comentari

16 de julh 07.48h

Butar una querdada per d’argent un 14 de julhet passat, ont la mitat del mond es en vacanças, es d’un amatorisme romantic priu que far trimfle, enquèra aqui avèm brica anticipat.

Capdelar es anticipar. O sabèm pas far.

lo perpic se trigòssa dempuèi nòu ans e cada an se regacha enrè vèire s'una solucion s'es pas venguda.

Sabi pas se mandarai d’argent nimai potets, calotats benlèu ? …….

De ginolhon cap de libertat possible !

Plan de plaser a totis los escamandr... Legir la seguida


Valora aquest comentari:   votar positiu 4   votar negatiu 21
Respondre comentari replica Comentari inadequat   Formulari d'abús de comentari

15 de julh 09.01h

#1

De grands campions ciclistas coma nosautres avèm plan d'argent.
Ieu ai fach un chèc amb ma prima de malhòt jaune.
Deuriás faire çò meteis alluòc de repotegar


Valora aquest comentari:   votar positiu 7   votar negatiu 6
Respondre comentari replica Comentari inadequat   Formulari d'abús de comentari

15 de julh 08.46h

Si jornalet, tanben l'occitanisme, arrieban pas a se far una plaça dins la societat quò es que fau cambiar l'òffre.
Sem dins un moment clau de l'istòria ente lo vielh deu disparaitre per laissar la plaça au nòu. A de que nos servan Molac o Lassala si quò es per totjorn se focalisar sur far passar una lei.
Lassala a pas enguera ren fach per far un cors d'occitan. dau mens me sembla.
Fau quitar lo monde que portan la bona paraula e escotar lo pòple. Fau parlar de çò que lo pòple pen... Legir la seguida


Valora aquest comentari:   votar positiu 9   votar negatiu 24
Respondre comentari replica Comentari inadequat   Formulari d'abús de comentari

15 de julh 08.02h

Volèvi balhar sòus a la buveta de Jornalet dissabte passat, per l'arribada deu Tour a Quilhan. Qu'aurí podut crompar un camison deu jornau, quauques pegasolets, minjar un enterpan e charrar un brèu damb l'associacion. Benlèu quitament qu'aurí pres la carta e un abonament anuau, un còp bandat.
Be serí tornat a casa plan content, e tot lo public desplaçat per lo parat que n'auré podut har egau.
Qu'es de dòu har. Pas quitament una bandaròla, pas un estand per presentar las activitats e... Legir la seguida


Valora aquest comentari:   votar positiu 7   votar negatiu 16
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Terric Lausa

Terric Lausa logo rss

Faguèt d'estudis d'occitan a l'Universitat de Montpelhièr. Militant occitanista e aimador de la frairança occitano-catalana.

mai d'informacions

contactar l'autor

Las mai...

Mai d'articles

Archius




D'autres articles


Jornalet, gaseta occitana d'informacions