Bandièra01 1180x150: Comuna de Tolosa

Opinion

Era quista

Tònho Castet

Tònho Castet

President e fondador dera Associacion Es Paums, acordeonista, dinamizaire culturau en Vilamòs, activista dera lengua e traductor

Mai d’informacions
Non sonque de nhèu…
 
E ben ma hilha, pòc mos ac pensàuem qu’era quista entath Torneg de Ping Pong aurie tant bon acuelh.
 
Ath delà der esquí, en Terçon de Lairissa (Val d’Aran), qu’auem trapat una auta manèra de botjar-mos, de hèr a mòir es uassi, òc; jogar ath Tennis de Taula.
 
Entà promòir aguesta auta forma de hèr exercici, qu’auem organizat eth prumèr Torneg Popular de Tennis de Taula en encastre dera Hèsta Major de Vilamòs  d’enguan.
 
Be’n son d’importanti entara economia dera Val es espòrts restacadi tamb era nhèu, er òr blanc que li’n didem, mès tanplan que i a d’autes d’activitats que se pòden hèr sense besonh de que nhèue.
 
Ça’m par, en nòste parçan era nhèu mès-lèu que mos embarrasse, guarda.
 
Quan nhèue, encara mos planhem, Bon Diu, quin mau temps, en tant que mès ensús nhèu ei çò de madeish que bon temps. Quan cap ara primauera,  era pelha naua e bèra[1] demore mès deth compde enes prats e en restilhè s’acabe enquiara palha entà sostrar eth jaç,  que rebotegam e mos tarde de que comence a terrenhar[2], entà poder trèir a pèisher eth bestiar.
 
Eth Tennis de Taula, qu’ei un espòrt ben popular, que pòden practicar era gent de quinsevolhe edat, sèxe e condicion fisica. Tant i pòden jogar ua dòna coma un sénher, ua damaisèla coma un mainatjàs, un cavalèr coma un mosso, un gojat coma ua gojata, un d’Arres de Sus coma un d’Arres de Jos. No te cau pas un gran investiment en equipament, i pòdes jogar tamb era madeisha ròba que pòrtes en gésser de des·honar. Encara que ei un espòrt umil, hè ans qu’ei olimpic.
 
Que se pòt practicar tant laguens coma dehòra, çò qu’ei plan avient entà climatologies coma era nòsta. Alavetz que i pòs  jogar tot er an.
 
Ei, coneishut tanben coma Ping Pong que serie era onomatopèia deth tapatge que hè era piloteta en tustar tamb era taula o era paleta.
 
Tanplan qu’ei bon entara salut, ja que te cau botjar totes es parts deth còrs: es mans, es pès, es codes, es jolhs, es braci, es canèths, eth cap, eth còth, es espatles, es anques, es cavilhes, eth vrente, era esquia, es bots des cames, eth abdomen, es cueishes…ac hès a moir tot. Mieja ora de Ping Pong  qu’equivau a tot un maitin de des·honar[3] tamb era puarda[4].  
 
Estimule era soplesa, ei bon entara ment pr’amor que fòrce era concentracion. Ath delà qu’ajude a socializar pr’amor que no i pòdes jogar tot solet, se non que aumens i a d’auer un contrari.
 
Vedetz qu’ei un espòrts des mès complèts, bon mercat, simple, laugèr, dinamic e entretengut.
 
En cas des qu’organizam eth Torneg, eth visperon tamb eth podom e era pasion peth Tennis de Taula se  desvelhèc quan en an 1997, des dera enterpresa ena que èra emboishat e entà promòir era sua practica, hérem ua donacion ara  ciutat de Lhèida de dotze taules. Èren dotze taules especiaus, entà jogar dehòra, que anauen vitzades en beton de tèrra, resistentes ara climatologia extrèma d’aquera vila.
 
Èren antivandaliques e bèth descrabestat sonque ne podec abrismar ua arrosant-la tamb essença e ahlamant-la.
 
Fin finala que resistiren pròp de quinze ans plaçades enes parcs e places de Lhèida.
 
Ena Val d’Aran ja i a fòrça practicants deth Ping Pong gràcies ath bon trebalh deth Grop Tennis TaulAran e nosati tamb aguesta iniciatiua des  de Vilamòs que i volem ajudar.
 
Per aquerò, des de Casa Lúcia, en collaboracion tamb eth  Ajuntament de Vilamòs e des nòsti patrocinadors, qu’auem organizat eth Torneg, entà promòir eth Tennis de Taula en Aran.
 
Guarda que mos a calut anar a quistar entà demanar collaboracion entath Torneg e qu’auem estat ben arrecebudi, auem trapat fòrça patrocinadors e collaboradors (veir programa). Ada eri toti, fòrça gràcies.
 
Eth Torneg que hè part deth programa dera Hèsta Major de Vilamòs, per çò que se i vies a jogar,  que poderàs gaudir, ath madeish temps dera Hèsta d’un des pòbles mes polits dera Val.
 
Viende, vos i demoram toti eth dia 14.
 
A lèu.
 
 
 
 
 
[1] Era Val d’Aran, Jusèp Condò Sambeat.
 
[2] Terrenhar o desterrenhar ei quan cap ara fin deth iuèrn se comence a delir era nhèu enes prats e enes montanhes e comence a campar era potja.
 
[3]Des·honar ei tornar a pujar tà naut era tèrra que, a fòrça de  laurar en  arribent, s’a anat esguitlant cap ath hons, entara honada o part baisha dera tèrra, ath hons.
 
[4]- Puarda ei ua piòsha que se hè a servir entà des·honar. Tamb eth mange en husta, a dues pues en un costat e ua hlama en er aute (veir fòto).
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article