CAPÇALERA2: IEA-AALO

Jornalet, gaseta occitana d'informacions

Divendres, 14 de decembre

Tònho Castet

Dimenge, 2.12.2018 03h00

Un còp de man


Comentaris 3 comentaris    
Dolent Fluix Bo Molt bo Fabulós (6 vòtes)
carregant En cargament


Aguest noveme qu’a vengut plen de bones notícies tar aranés. Çampar qu’an passat inapercebudes çapur tàs que susvelham e campam quina novetat que sigue en tema dera nòsta lengua, que mos semblen plan importantes.
 
 
Cors  C1 d’aranés
 
En prumèr lòc eth Conselh Generau d’Aran ja a dubèrt  eth periòde de preinscripcion tà matricular-se en Cors d’aranés nivèu C1, er antic nivèu D. Be'n hège de temps que i auie ua demana per part deth collectiu d’estudiosi der aranés qu’auien agotat tot er itinerari formatiu possible en  aranés. Non i a dobte qu’ei un pas mès entà deuant tà tier quilhada era bandèra dera lengua.
 
 
Colleccion Antòni Nogués
 
Er Institut d’Estudis Aranesi, Academia Aranesa dera Lengua Occitana e Antoni Nogués an signat un convèni entara difusion des traduccions ar aranés d’òbres dera literatura internacionau.
 
Eth doctor Antòni Nogués ei un estudiós der aranés, especialista en revirar tèxtes ara nòsta lengua. Donques a compdar de prumèr de gèr ja serà a disposicion de toti es que la volguen liéger Anna Karenina de Leon Tolstoi.
 
Cada mes jos eth títol Colleccion Antòni Nogués er IEA publicarà en sòn web un nau tèxte revirat ar aranés. Es mès immediati son Guèrra e Patz tanben de Leon Tolstoi; Eth Latzeret de Tormes, anonim; Es frairs Karamazov e Crim e castig de Fiòdor M. Dostoievski, Eth Buscon de Francisco de Quevedo; Era Gitaneta, Era illustra serventa, Eth gelós extremenh e Rinconete e Cortadillo de Miguel de Cervantes; Condes de Hans Christian Andersen; Es aventures de Tom Sawyer de Mark Twain; e Es Miserables de Victor Hugo.
 
Damb aguesta iniciativa er IEA da responsa a un besonh de tèxtes en aranés accessibles que i auie en collectiu de lectors ena nòsta lengua.
 
 
Benda desenhada en aranés
 
Ja ei en maquetacion era versión en aranés de Es Jòies dera Castafiore der autor bèlga Hergé que a coma protagonista ath personatge Tintin e eth sòn can Miló.
 
Ei eth prumèr des vint-e-quate titols que Zephyrum Ediciones va a publicar reviradi ar aranés per Associacion Es Paums. Ena version aranesa es tèxtes s’an adaptat ara toponimia e onomastica deth País, atau eth Capitan Haddock en lòc de jurar per Brest, ac hè peth Montlude e es dus inspectors Dupont e Dupond se diden Bertranet  e Bertranon. Es personatges en lòc de brindar pera nòça de Madama Castafiòre e eth capitan damb champagne ac hèn damb aigua de nòdes.
 
Damb aguesta colleccion  se place ar aranés ath nivèu dera seishantea de lengües en que s’an publicat es mès de dus cents milions d’exemplars venudi deth universalaments coneishut reportaire.
 
 
Recensament d’entitats de foment der aranés
 
Eth Departament de Cultura dera Generalitat de Catalunya a publicat eth nòm des Associacions que hèn part deth Recensament d’entitats tà promòir er aranés.
 
Aguest Recensament qu’a eth sòn equivalent  hè temps tara lengua catalana, amasse a: Associacion culturau Institut Aranés, de Lhèida; Associacion entara Difusion d’Occitània en Catalonha (ADÒC), de Barcelona; era Associacion Es Paums, de Vilamòs (Val d’Aran); e eth Comitat d’Afrairament Occitanocatalan (CAÒC), de Barcelona.
 
Estone que des quate entitats inscrites pera Generalitat sonque n’i age que ua deth territòri. Ua pròva de que dehòra se botgen tanben pera lengua deth País. Benvengut sigue eth sòn interés.
 
Aqueri que se graten era pòcha e hèsquen bèra donacion ad aguestes quate Associacions pendent enguan 2018, poderàn dedusir eth 15% dera aportacion, damb un limit maximal de 10% dera quòta autonomica, ena Declaracion de Renda, en 2019.
 
Tàs Associacions que tostemp mos cau anar a mandiar recorsi tà perucar e amiar endeuant es nòstes iniciatiues, qu’ei ua plan bona noticia e un bon còp de man.
 
 
 




abonar los amics de Jornalet
 



publicitat



Comentaris

3 de decembre 00.07h

Eth CAÒC e promòu er aranés? Çò qui hèn tad eth? Non so ath sabut de çò qui hèn ara mes que sèi que promòu susquetot eth lengadocian e que d'eth temps dera lei der aranés estèn violament contra er aranés.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

2 de decembre 13.42h

Tiò!!!


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

2 de decembre 12.46h

Quí posse era Lengua, posse era Dignitat!!


Valora aquest comentari:   votar positiu 7   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat

Perfil

Tònho Castet

Tònho Castet logo rss

Musician, acordeonista integrant dera formacion Es Paums. Diplomat en psicologia. Mastèr en Direccion de Vendes. Èx professor de Relacions Umanes de Dale Carnegie.

mai d'informacions

contactar l'autor

Las mai...


Mai d'articles

Archius




Etiquetas

aranés   castet   es paums   tintin  

D'autres articles


Jornalet, gaseta occitana d'informacions