capÇALERA: oplo

Jornalet, gaseta occitana d'informacions

Dijòus, 2 de julh

Jean-Charles Valadier

Dimenge, 16.10.2016 03h00

Los partits ecologistas d’Euròpa e las questions nacionalas: Belgica, Olanda e França (part 3)


Comentaris Pas cap de comentari    
Dolent Fluix Bo Molt bo Fabulós (6 vòtes)
carregant En cargament


Groenlinks
 
Als País-Basses, Groenlinks es pauc investit subre la question institucionala e culturala. Es una excepcion en Euròpa, e mai se coma los autres partits ecologistas,valoriza fòrtament la diversitat culturala. Sas posicions subre la lenga frisona non son pas claras. Groenlinks non sosten pas l’idèa d’un estatut particular per la Frisa, mai que mai perque lo principal partit nacionalista que pòrta la revendicacion frisona, lo Friese Nationale Partij, es fòrça conservator.
 
 
Ecolo
 
Belgica a dos partits ecologistas subre una basa nacionala. Groen es lo partit ecologista flamenc, present en Flandra e sa capitala Brussèlas, e Ecolo lo partit francofòn e germanofòn, present en Valonia e a Brussèlas, coma  ciutat bilingüa. Al nom d’aquela division comunautària e de la definicion de Belgica coma estat binacional, Ecolo sosten l’organizacion federala actuala de l’estat bèlga al nom de las valors de solidaritat, de cooperacion e de respècte de las diversitats.
 
 
Euròpa Ecologia los Verds
 
En França, Euròpa Ecologia los Verds (EELV) es lo sol grand partit politic francés de tipe federal amb d’instàncias regionalas e de projèctes regionals.  Aquesta especificitat se tradutz tanben dins lo doble nom estatuari del partit dins unas regions: Euròpa Ekologiezh Ar Re C’hlas, en Bretanha e Auropa Eculugia I Verdi en Corsega. De programas ecologistas regionals pòdon èsser fòrça autonomistas tal coma en Bretanha e Corsega.  Istoricament, los ecologistas en Corsega s’inscrivon dins la movença nacionalista.
 
La question regionala o federala es ignorada de l’actualitat politica e mediatica de l’estat centralizat qu’es França, e mai se Corsèga arribèt darrièrament a faire emergir aquela question. Coma los grands partits politics francés ignoran aquelas questions, es gaire presenta dins las presas de posicion dels ecologistas franceses, e mai se la revendicacion d’un federalisme diferenciat es inscrit dins lo projècte ecologista de reforma territoriala de França. EELV prepausa l’emergéncia d’autonomias tal coma en Espanha amb la possibilitat de diferenciacion de las competéncias transferidas. Lo programa  d’EELV de 2012 indica que “la distribucion de las competéncias e de las formas d’organizacion territorialas poirián cambiar d’una region a l’autra amb d’experimentacion regionala (normativa, fiscala, politica)”. Lo projècte presidencial d’Eva Joly en 2012 prepausava “una organizacion nòva de França subre un modèl federal diferenciat, amb una regionalizacion enforçada: autreg a la region de competéncias normativas e d’una granda autonomia fiscala, mentre que la pereqüacion financièra es assegurada per l’estat jos lo contraròtle d’un senat renovat. Las lengas regionalas seràn oficialament reconegudas”.
 
Fòra Corsèga ont l’union de la movença nacionalista conqueriguèt lo poder, son per d’aliganças entre las organizacions regionalistas o nacionalistas amb EELV que d’elegits regionalistas intrèron dins d’executius locals e poguèron faire evoluir la question regionala, e lançar de politica lingüistica per las lengas minorizadas de França.
 
 
Conclusion
 
En Euròpa, la màger part dels partits ecologistas compartisson un projècte regionalista bastit subre los concèptes de subsidiaritat, de federalisme diferenciat e de valorizacion de la diversitat culturala.
 
Gràcia a aquel quadre ideologic,  pòdon tractar las questions de reforma territoriala o de revendicacion autonomista o independentista. Per los ecologistas, region e estat-nacion non son pas de causas immudablas. Aculhisson favorablament las reconfiguracions territorialas que se fan amb e per los ciutadans e al servici de la democracia e de la solidaritat. Per Catalonha e Escòcia, (e mai Corsega, se la question se pausèsse), los ecologistas sostenon lo dreit a l’autodeterminacion, sense prejutjar de la responsa a aportar a la question. Lo projècte ecologista europèu se pòt resumir per d’estats federals dins una Euròpa federala.
 
Aquelas convergéncias ideologicas explican las unions estrategicas que se pòdon nosar regularament en Euròpa entre las organizacions regionalistas o nacionalistas e ecologistas.






Jornalet es possible gràcias al sosten economic e jornalistic dels legeires e benevòls. Se podètz sosténer en venent sòci dels Amics de Jornalet o de l’associacion ADÒC, contribuiretz a far un mèdia mai independent e de melhora qualitat.



publicitat
BANER1: AOF



Comentaris


No hi ha cap comentari




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Jean-Charles Valadier

Jean-Charles Valadier logo rss

Adjunt al cònsol de Tolosa en carga de la lenga e cultura occitana de 2008 a 2014, es membre de la comission Regions e Federalisme del partit Euròpa Ecologia Los Verds.

mai d'informacions

contactar l'autor

Las mai...

Mai d'articles

Archius




D'autres articles


Jornalet, gaseta occitana d'informacions