Bandièra01 1180x150: Comuna de Tolosa

Opinion

Occitan e regionalas de 2021

Manifestacion per la lenga occitana a Tolosa, març de 2012
Manifestacion per la lenga occitana a Tolosa, març de 2012
Jean-Charles Valadier

Jean-Charles Valadier

Adjunt al cònsol de Tolosa en carga de la lenga e cultura occitana de 2008 a 2014, es membre de la comission Regions e Federalisme del partit Euròpa Ecologia Los Verds.

Mai d’informacions
Doas regions administrativas occitanas gerisson amassa dos organismes publics en carga de la lenga: l’Ofici Public de la Lenga Occitana (OPLO) e Lo Congrès. Tot aquò perque avèm fait las manifestacions Anem Òc per per l’occitan en 2005, 2007 e 2009. E tanben gràcias a la preséncia d’un elegit PS occitanista, Remesi Pech en Miègjorn Pirinèus en 2004 puèi dos elegits del partit occitan Guilhèm Latrubessa en Miègjorn Pirinèus e David Grosclaude en Aquitània dins d’aliganças amb lo partit EeLV en 2010. Dempuèi 2015, i a sonque un elegit, Patric Ros, presentat pel POC dins la sola region Occitània-Pirenèus Mediterranèa e pas mai de manifestacions occitanistas massissas. Es logicament que l’aument del finançament de l’OPLO e del Congrès non es una prioritat per los elegits regionals. Non an nimai trobat un o una elegida en Novèla Aquitània que parle occitan per presidir l’OPLO.
 
Per cambiar las causas al nivèl institucional, sonque los electors occitans o pòdon faire. E per o faire, cal de candidats occitanistas per las regionalas de 2021.
 
Las listas son per espelir e los programas se discutan en intèrne. En l’abséncia de la participation de militants occitanistas, non i aurà pas grand monde per propausar al debat intèrne d’accions concrètas per l’occitan.
 
La politica de las regions pòt sens revolucion institucionala, inclure d’accions fòrtas per la lenga e cultura occitana. La Region es desenant la collectivitat responsabla del desvolopament economic, e i poirià favorizar la lenga e cultura occitana.
 
Gerís los licèus, las politicas d’aprentissatge e de formacion professionala, coordina los servicis de l’orientacion e participa al servici public de l’emplec. D’elegits occitanistas saurián i promoùre d’engatjaments per l’occitan.
 
La Region parteja amb las autras collectivitats localas la competéncia sus la cultura, l’espòrt, la promocion de las lengas regionalas, l’educacion populara e lo torisme. Son de camps d’accion importants per l’occitan de compartir amb las comunas.
 
E mai, las regions geriscon tanben la granda majoritat dels fons europèus de desvolopament regional, per l’emplec e l’agricultura.
 
Amb d’elegits occitanistas, la socializacion de la lenga pòt èsser promoguda per un finançament fòrt de l’Ofici Public de la Lenga Occitana o lo Congrès per enfortir lo desvolopament dels espleits per la normalizacion lingüistica.
 
De filièras bilingüas publicas o Calandreta pòdon èsser prepausadas dins las convencions regionalas amb los rectorats. La senhaletica bilingüa pòt èsser generalizada dins los trens e las garas tal coma las anòncias sonòras bilingüas.
 
E mai de causas pòdon èsser propausadas per l’occitan. Mas cal s’engatjar ara dins la batèsta politica. Cadun o pòt faire dins lo partit o l’estructura ciutadana que vòl. O pòt faire dins d’estructuras occitanistas tal coma lo Partit Occitan, lo Partit de la Nacion Occitana...
 
Pòt tanben participar al 1r congrès del movement OCCITÀNIA PAIS NOSTRE que se tendrà lo dissabte 19 de setembre al grand Cafè -Restaurant Lo Florida , Plaça del Capitòli a Tolosa.
 
Ièu, coma membre d’EELV, singèri l’Apèl dels Ecologistas d’Occitània: “Lo temps de l’ecologia e de las solidaritats es vengut! Per de territòris verds e solidari” que s’acaba per:
 
Ensemble, nous ferons la différence et la diversité!
Ensemble, farem la diferéncia e la diversitat!
Entre, farem la diferència i la diversitat!
 
Los ecologistas vòlon reünir las fòrças ecologistas, regionalistas e solidàrias per bastir una majoritat per obténer de responsabilitats regionalas. Per aquò, vòlon èsser actors d’un rassemblament amb totas las e los que se retròban dins aquelas valors.
 
Convidi los lectors e lectrices a participar a aquel rassemblement. Conviés los lectors e lectrices a aderir ara a las estructuras politicas occitanistas o a EELV per pesar sus las causidas electoralas.
 
 
 
abonar los amics de Jornalet
 
 

 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Delfraisse
3.

Me sembla que Patric Roux quitèt lo Partit occitan, non ?

  • 3
  • 0
Franc Bardòu
2.

"Doas regions administrativas occitanas gerisson amassa dos organismes publics en carga de la lenga: l’Ofici Public de la Lenga Occitana (OPLO) e Lo Congrès", en practicant metodicament l'exclusion de tota activitat que non passarián per aquestas doas estructuras fonccionant en fòrma de politburò, amb un dreit impliciit de vida e de mòrt subte totas las activitats associativas que non son las amigas de lors amics.

S'es per aquò qu'avètz manifestat, mila dius, podètz demorar tranquilles a l'ostal, lo còp que ven !

  • 19
  • 1
Pierre LACHAUD
1.

Ten! Madama la Marquisa es tornada.
Tot vai plan Mme la Marquisa, l'escura a cramat, las bestias son malaudas e la recolta s'anonça marrida. Tot vai plan.
Es parier per França; tot vai plan.
Mas chau pas visar la politica, l'economia, lo sistem financier, lo monde medicau que tot se desagreja. o la tecnologia tota poderosa.
Daus uns denonçan la deriva autoritarista, veire totalitaria de Franca mas nòstres catam tots aqueus. Una simpla passejada. Sur un resau sociau ai vist un slogan : "vive la Savoie liura" perque i avia una manifestacion anti-masc.
Lo PS nos a tendut un traquenard en autorisar una revendicacion occitanista dins la region de Tolosa .
Mas, alhors l'occitan exista pas dins lo PS. Coma me lo disia un escrivan regionaliste limosin, fai deja quauquas annadas e qu'avia escrit un libre sur una afar que se passsava dins las annadas 1920 dins un vilatge limosin : "a l'epòca lo monde parlavan frances dins aquel vilatge; l'occitan qu'es pus bas, pus bas, pus bas..."

  • 2
  • 11

Escriu un comentari sus aqueste article