Bandièra01 1180x150: Comuna de Tolosa

Opinion

Informacion en Occitània

Panèl d'expression liura a Tolosa
Panèl d'expression liura a Tolosa
Jean-Charles Valadier

Jean-Charles Valadier

Adjunt al cònsol de Tolosa en carga de la lenga e cultura occitana de 2008 a 2014, es membre de la comission Regions e Federalisme del partit Euròpa Ecologia Los Verds.

Mai d’informacions
Cerquèri sul web de documents subre l’accion politica de la region administrativa francesa Occitània Pirenèus Mediterranèa. Trobèri fòrça sites institucionals que descrivon las politicas oficialas sectorialas tal coma:
 
“Las politicas europèas - Euròpa en Occitània subre https://www.europe-en-occitanie.eu“.
 
Son de textes plan tecnics, mas amb pauc d’analisi critica o transversala de l’accion politica en Occitània.
 
Alavètz, cerquèri amb lo mot clau “Carole Delga”, presidenta de la region. Trobèri fòrça articles de de la premsa regionala amb de títols tals coma
 
— “Delga a Tolosa: “Soi per la Torre Occitània” dins La Dépêche du midi”
 
— “Carole Delga: “Trabalham sus la Mediterranèa del sègle XXI” dins lo “Midi Libre”.
 
Son d’articles de promocion de la presidenta de region mas sens analisi subre los avantatges e inconvenients d’un gratacèl en terme d’urbanisme o d’una industrializacion pesuga del litoral fàcia als desfís de l’escaufament planetari, de la crisi energetica o de reparticion de las riquesas.
 
Trobèri d’articles mai generals subre la politica regionala amb los vòts per l’an nou de la presidenta, per exemple:
 
“Per Carole Delga, la sobeiranetat de la region Occitània es la prioritat en 2022” dins www.lejournaltoulousain.fr, ont lo jornalista presenta los grands projèctes de la presidenta: idrogèn, fons sobeiran, santat, LGV… ont l’analisa del jornalista se redusis al fait que la presidenta s’inscriu dins la continuitat de son primièr mandat e desvolopa de subjèctes ja abordats e engatjats las annadas precedentas.
 
E una cerca encara mai aprefondida mostra que las opinions divergentas apareisson sonque al moment de las eleccions, mai que tot sul costat politician de las aliganças, e pauc subre lo fond programatic dels projèctes subre la region.
 
Se cercam del costat dels partits politics o dels sindicats, trobam pauc de causas de fond, en general de simples comunicats de premsa per o en sosten de las proposicions de la presidenta del conselh regional.
 
De còps, las associacions localas o environamentalas pòrtan d’analisi de fond de las politicas localas, mas amb una difusion mai que marginala, tal coma lors contribucions a las enquèstas publicas, amb per exemple:
 
“La contribucion al SRADDET: Esquèma Regional d’Amainatjament, de Desvolopament Sostenible e d’Egalitat dels Territòris” per France Nature Environnement. Escrivan que las ambicions de la region en matèria environamentala relèvan tròp sovent de l’estricte minimum respècte a las exigéncias de las leis en vigor.
 
Trobèri pauc d’analisi subre l’estat de la cultura en region, e encara mens subre la lenga e cultura occitana en region, fòra en lenga occitana, tal coma Jornalet o Lo Diari.
 
Per contra, al nivèl estatal francés, tal coma las televisions, la premsa, los partits, los sindicats o lo cercles de reflexion (think tank en francés), trobèm fòrça analisis politicas de la situacion de l’estat francés, e subre totes los subjèctes, i comprés subre la lenga e cultura francesa.
 
Aital, fòra Isla de França, patissèm d’una vertadièra denegacion democratica regionala.
 
Lo resultat n’es una regression de la premsa quotidiana plan mai marcada en França que dins los autres paises europèus, e un desinterès ciutadan fòrt per los enjòcs politics e culturals regionals e locals.
 
Çaquelà, la tendéncia actuala de relocalizacion de l’economia e de transicion ecologica en ligam amb los territòris necessita una produccion d’informacion locala de qualitat. Per i participar, me sembla essencial de produsir una informacion occitana mai qualitativa. Que sià en francés per de vertadièrs medias regionals de qualitat o en occitan per una participacion màger dels occitanistas al trabalh de Jornalet. Cal tanben sosténer la campanha “l’Occitan cada jorn a la television regionala” per una cadèna de television publica regionala a temps complèt.
 
E aquel constat d’inexisténcia politica occitana en region Occitània Pirenèus-Mediterranèa val per totas las regions administrativas de l’Occitània francesa.
 
 

abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article