Bandièra01 1180x150: Comuna de Tolosa

Opinion

Tolosa 2014 (I)

Jean-Charles Valadier

Jean-Charles Valadier

Adjunt al cònsol de Tolosa en carga de la lenga e cultura occitana de 2008 a 2014, es membre de la comission Regions e Federalisme del partit Euròpa Ecologia Los Verds.

Mai d’informacions
En març de 2014 son las eleccions municipalas. A Tolosa coma endacòm mai, es l’ora de far lo bilanç de las eleccions de 2008 e de soscar a las de 2014.
 
Mas cal tornar a la prima de 2008, quand las associacions occitanistas amassadas dins Convergéncia occitana prepausèron un projècte municipal a las còlas politicas en competicion en aquel temps. Organizèron una reünion publica per ausir las responsas dels caps de listas. Es dins aquesta reünion publica que Pierre Cohen, cap de lista d’esquèrra, faguèt publicament d’unes engatjaments que tenguèt puèi quand foguèt elegit cònsol màger de la ciutat.
 
Es atal que Pierre Cohen, coma cònsol de Tolosa, me nomenèt adjunt delegat a la cultura e lenga occitana amb lo supòrt d’una encargada de mission. Creèrem un budgèt especific a la cultura e lenga occitana de 500 000 euros, siá 1/1000 del budgèt municipal, en aumentacion de 50% per rapòrt a las divèrses subvencions que preexistissián. N’aprofeitèrem per suprimir d’unas discriminacions que patissiá la cultura occitana al dintre del sistèma administratiu municipal.
 
Las assisas de la cultura occitana en 2011 coconstrusidas amb las associacions e las institucions (Educacion Nacionala, DRAC…) se concretizèron per l’adopcion de la Carta Municipala per la lenga e la cultura occitana en 2012. D’ara enlà, se pòt valorizar l’occitan dins totas las competéncias municipalas: educacion, comunicacion, espaci public, cultura, senior, petita enfància, torisme, senhaletica... S’a Tolosa l’occitan non patís pas mai d’una discriminacion oficiosa, es a cada servici e elegit de promòure (o non) l’occitan.
 
Es atal qu’amb lo sosten d’unes elegits o director de servici, faguèron las anòncias bilingüas dins lo mètro, las placas bilingüas en entrada de vila, l’obertura de doas escòlas bilingüas publicas dins la vila. Tolosa sostenguèt bravament la manifestacion per l’occitan del 31 mars de 2012 que botèt 30 000 personas per las carrièras grandas de la ciutat e que s’acabèt amb una fèsta bèla la nuèit subre la plaça del Capitòli. Per l’escasença, un vòte per una lei per l’occitan foguèt votat a la quasi unanimitat per lo conselh de la comunautat urbana de l’aglomeracion tolosana.
 
Ara, una comunicacion municipala subre l’occitan es regularament actualizada subre internet amb lo sit www.culturas.Tolosa.fr/tematica/cultura-occitana.
 
Atal, durant aqueste mandat, la lenga occitana es sortida de son estat de delegitimizacion dins dins la municipalitat de Tolosa.
 
Aquesta avançada es a l’encòp la resulta del trabalh associatiu e cultural de las annadas passadas e del foncionament democratic del conselh municipal.
 
Per l’occitan coma per tot autre subjècte, una politica se bota en plaça sonque se i aguèt un engatjament abans las eleccions. A Tolosa, foguèt un compromés dins una còla d’esquèrra PS, PC, MRC, Los verds entre maites sobeiranistas francés d’un costat (MRC e d’unes PC e PS), una majoritat neutra e d’unas  federalistas (Les Verts).
 
Es atal que coma occitan conscient de la cultura istorica de la ciutat, faguèrem amb la cargada de mission plan mai de causas que previstas, dins lo limit del consens establit abans las eleccions.
 
Mas, per exemple, non poguèrem pas concretizar la mesa en ret amb Barcelona per facilitar la reconeissença institucionala de la lenga occitana perque èra fòra del consens inicial e que i aguèt una oposicion dels sobeiranistas. Tanplan, la competéncia cultura occitana non foguèt pas integrada al nivèl de la comunautat Urbana de Tolosa Metropòli per que l’occitan participe a l’identitat del territòri metropolitan per indiferéncia dels cònsols de las comunas petitas de l’aglomeracion que non son pas interpelats subre aquel sicut per los lors conciutadans.
 
Per 2014, es als occitans de faire intrar la question occitana dins lo debat municipal pre electoral de las comunas de l’aglomeracion tolosana e endacòm mai en Occitània (de seguir).

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lutz
5.

#1 Vaquí çò que se passa quora on occitaniza una URL en francés :
http://www.cultures.toulouse.fr/thematique/culture-occitane

  • 1
  • 0
Damian Tolosa
4.

Rai, òm pòt pas dire que la vila de Tolosa e Cohen fan res per l'occitan, mas bon, cal pas s'enganar tanpauc.
E d'alhurs Modenc tanben a fach de proposicions per l'occitan (cf. son site).

Qual pòt dire que son pas que de mesuras clientelistas (e tanben per çò de Modenc) per rendre contents qualques peluts ? Qual pòt èsser satisfach per qualques panèus de dintrada ? E per l'occitan en diglòssia flagranta dins lo metrò ? Perqué lo panèu 'Tolosa' taggat a la dintrada de la vila dempuèi l'an pebre es pas estat remplaçat ?

Onestament, i a pas (o pauc) de politica volontarista.

Doncas Cohen es, segurament, lo "mens pièger" per çò de l'occitan.
Lo nivèl de desconeissença del PS es estat confirmat pel Martin Malvy (PS) lo 23 de julhet pel biais d'un tuit :
"La Région continuera de soutenir @Estivada et l'occitan, car l'#occitan est dans nos gènes. C'est vrai de la musique, de la poésie,..."
L'occitan genetic...Aquò vòl tot dire...

E la Region ? Vos rapèli notadament que deguèsse "sensibilizar totes los escolans a l'occitan dins lo secondària" (schéma 2007-2013). Sèm a la fin de l'annada e doncas del schéma, los resultats son pas aquí.


Una estructura nacionala coma lo PS pòt pas defendre complètament l'occitan. Un fum de politicians del PS, atanplan (e mai) de l'UMP veson Toulouse et la province coma un trempolin cap a quicòm de nacional. La defensa de l'occitan, aquò se pòt far, a minima, pel biais de politicas a vocacions localas coma lo Partit Occitan o Bastir!

  • 5
  • 3
Domergue Sumien Ais de Provença
3.

Felicitacions per vòstre trabalh!

  • 7
  • 0
Terric Lausa Quilhan
2.

"Per 2014, ES ALS OCCITANS de faire intrar la question occitana dins lo debat municipal" > Volètz dire dire es a totes los tolzans, ja que los tolzans son occitans? O volètz dire als tolzans occitanistas?

Un bon mejan per promòure l'occitan, e qu'auriá pas res costat al budget municipal, seriá estat que lo cònsol Cohen anèsse assistir a un cors d'occitan, l'aprenguèsse e faguèsse qualques discors en occitan en public. Seriá estat plan avisat d'o far aqueste luenchenc sussessor politic dels Ramons. Aparentament a cregut que 0,1 % de las talhas que pagqn los occitans tolzans bastavan per defendre lor lenga faidida.

Deu pas èsser aisit, Sr. Valadier, de far progressar l'idèa occitanista dins una còla municipala tant francista e n'avètz autant de meriti. D'autantmai ne meritatz las felicitacions.

  • 12
  • 0
lo passejaire Tolosa
1.

www.culturas.Tolosa.fr/tematica/cultura-occitana

es un pauc damatge qu'aquel ligam fonctiona pas

«Tanplan, la competéncia cultura occitana non foguèt pas integrada al nivèl de la comunautat Urbana de Tolosa Metropòli per que l’occitan participe a l’identitat del territòri metropolitan per indiferéncia dels cònsols de las comunas petitas de l’aglomeracion que non son pas interpelats subre aquel sicut per los lors conciutadans.»

Cresètz que los conciutadans foguèron interpelats per los empachar de parlar lor lenga ? Es als politics de far conéisser la nòstre identitat occitana al monde, son eles que son en carga de la cultura e de la vida vidanta dels ciutadans. Son pas las associacions sens mejans que devon far aquò. Los intellectuals e borgeses occitans an tuats la lenga e a l'ora d'ara fan pas res per la reviscolar.
Cal una politic vertadièrament ausardièra cap a l'estat francés.

Setz capable ?

  • 7
  • 0

Escriu un comentari sus aqueste article