CAPÇALERA: IEA-AALO
CAPÇALERA2: IEA-AALO

Jornalet, gaseta occitana d'informacions

Dimècres, 27 d'octòbre

Jean-Charles Valadier

Dimècres, 14.4.2021 03h00

Frància versus Occitània


Comentaris 11 comentaris    
Dolent Fluix Bo Molt bo Fabulós (6 vòtes)
carregant En cargament





“Que la causa siá un còp nomenada, e la vaquí faita. Aital, nomenar, es cambiar, transformar”, çò escriviá J.P. Sartre. Dempuèi que la terror jacobina de 1792 e la transformacion del reialme de França en Republica de França, lo mot França designa un estat que se definís coma una nacion unica amb lo francés coma una lenga unica. Dempuèi aquel temps, los occitans e occitanas patriòtas an trabalhat per nomenar lor lenga fins a impausar lo mot occitan contra lo mot patés qu’èra comun. An tanben trabalhat a definir lo territòri ont se parlava fins a impausar lo mot Occitània contra lo mot Miègjorn qu’èra comun. E mai, definiguèron una mapa d’Occitània amb de frontièras. Aital, podem trobar de carta de França amb Occitània, Bretanha, Alsacia… Mas’ i a quicòm que truca per nomenar lo territòri d’origina de la lenga francesa. En general, se ditz païses de lengas d’oïl.
 
Dins los tèxtes, non sabèm pas cossí designar aquela partida de l’estat francés que non es pas Bretanha, Occitània, Alsàcia, Flandra... Lo mot França seriá ambigú, que uèi, França es universalament reconegut coma lo territòri de la republica francesa. Aital, per los occitans, e mai las autras lengas minorizadas, nos demòra de nomenar aquel territòri per existir plenament.
 
Propausi de popularizar lo mot Frància per caracterizar aquel territòri que cobre la part nòrd de França e la mitat de Belgica, qu’èra originalament de lengas d’oïl.
 
En francés, lo mot «Francie» es estat creat per convencion per d’istorians per revirar lo mot latin Francia autrament que per França per las epòcas merovingiana o carolingiana. S’agissiá de designar la multiplicitat dels reialmes francs sens los confondre amb la França actuala e evitar un anacronisme. Emai, se de l’Edat mejana al sègle XIX, los reis de França se designèron coma los successors dels reis dels Francs.
 
Aital nomenar Occitània foguèt dificil e mai subversiu. Uèi, l’estat francés que definís la nòrma de la lenga francesa non vol pas reconéisser lo concèpte d’un territòri identificat per designar lo d’origine de la lenga francesa.
 
Coma los istorians, podèm propausar per convencion d’utilizar Frància per aquò. En catalan, serià tanben Frància fàcia a França, aital coma en portugués. En francés, seriá «Francie» fàcia a «France». Serà mai complicat per los espanhòls e italians qu’utilizan jà «Francia» per la republica francesa.
 
Aital, seriá mai aisit de distinguir Occitània fàcia a Frància coma entitat lingüistica, mentre que administrativament, Occitània fa part de França, Italia e Espanha.
 
Lo mot Frància coma lo mot Occitània nos es necessària non solament per un usatge lingüistic, mas tanben per plan d’autres sicuts: Occitània recèp una forta immigracion de retirats de Frància, los sètis socials de las entrepresas grandas e mejanas d’Occitània son en general en Frància, los canals de television majoritaris en Occitània emeton dempuèi Frància, lo nivèl de vida en Occitània es inferior a lo de Frància, en França, los emplècs culturals son majoritàriament en Frància, Frància es un pais de plana mentre qu’Occitània es un pais de sèrras, Frància e Occitània partisson una cultura comuna d’origina romana, una granda part de Frància e Occitània foguèron integrada al reialme de França per las conquistas successivas dels capecians.
 
 
 
 
abonar los amics de Jornalet
 
 


 



publicitat
BANER1: Generalitat de catalunya



Comentaris

15 d'abril 22.35h

Per ieu, lo territòri de la lenga francesa es France. Occitania es lo territòri de la lenga occitana, e non es pas lo meteis territòri, e mai s'es un territòri ocupat.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

15 d'abril 22.32h

#2 Francia ! Car *Frància seriá de farlabica : daissariá entendre que lo mot en question s'es popularizat despuèi sègles, coma *Occitània. Son tèrmes modèrnes, que cal tractar coma mots sabents e conceptuals.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

14 d'abril 18.17h

'Standard Oil es una companhia petrolièira estatsunidenca. Es una pena pel francés.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

14 d'abril 14.24h

#6 "Lo País d'Oïl" es una expression coneguda que totes comprenon.

"Oïlitània" es un mot rar e pauc conegut que repren la terminason -itània del mot Occitània, donc es una formacion escura e dobtosa que met de confusion dins los esperits.

En mai d'aquò, "Oïlitània" es liat al mot artifical "oïlitan" (amb la terminason d'"occitan"), e "oïlitan" es un mot completament absurde perque sufís de dire a sa plaça "francés" o "lenga d'oïl".


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

14 d'abril 14.19h

#5 En istòria, lo mot "Frància" (en francés "la Francie") es ja ocupat per designar de territòris politics ancians dominats per los francs merovingians e los francs carolingians.

Per exemple lo Tractat de Verdun creèt los reialmes de la Francia Occidentala, de Lotaríngia e de la Frància Orientala.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

14 d'abril 14.17h

#4 Perqué pas Oïlitània? Lo mot "oïlitan" s'atròba...


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

14 d'abril 14.15h

Per nomenar l'espaci de la lenga francesa o de la lenga d'oïl, i a ja un tèrme que fonciona clarament e que totes comprenon: "lo País d'Oïl".


Valora aquest comentari:   votar positiu 3   votar negatiu 3
Respondre comentari replica Comentari inadequat   Formulari d'abús de comentari

14 d'abril 09.43h

Oc-citània # Oil-citània
Se quant i auja una discontinuitat lingüistica, emai identitària, è sembla que se posquèssa tornar prèner ambedós concèptes d'origine, per divíser l'espaci gallo-roman, e quant i aujèsse qualque rèire-projècte geopolitic.
Identitàriament, l'occitanitat francesa se sènt mai francesa, que non pas latina, çò'm par, que s'i senten, alàs, tirats de cap en aut. Aquò's l'univèrs mental de la populacion generala auèi.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

14 d'abril 07.09h


A contrari de çò que dishut l'escrivan francés Boileau :
"çò que s' enoncia clarament se concep clarament "
Quiò , un nom es necessari per nomenar lo territòri que lo francés i es la sola lenga istorica.
Òc, perqué pas "Frància" ?
E l'adjectiu , quau seré ? "francian " ?


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

14 d'abril 06.46h

Frància o Francia (franci-a) ???
Pensi qu'avèm aquí un brave debat de far !


Valora aquest comentari:   votar positiu 2   votar negatiu 2
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: OPLO liceu

Perfil

Jean-Charles Valadier

Jean-Charles Valadier logo rss

Adjunt al cònsol de Tolosa en carga de la lenga e cultura occitana de 2008 a 2014, es membre de la comission Regions e Federalisme del partit Euròpa Ecologia Los Verds.

mai d'informacions

contactar l'autor

Las mai...


Mai d'articles

Archius




D'autres articles


Jornalet, gaseta occitana d'informacions