CAPÇALERA: CONGRÉS AMIC
CAPÇALERA2: FAI-TE SOCI

Jornalet, gaseta occitana d'informacions

Dimars, 22 d'octòbre

Jean-Charles Valadier

Dimècres, 16.1.2019 03h00

La granda consulta nacionala, una escasença occitana


Comentaris 13 comentaris    
Dolent Fluix Bo Molt bo Fabulós (9 vòtes)
carregant En cargament


La granda consulta nacionala es destinada a respondre a la crisi dels “gilets jaunes”. Aprèp los detz milhards d’euros desblocats fin 2018, es una concession politica de l’estat francés per evitar la pujada contunha de la violéncia qu’acompanha las manifestacions actualas.
 
Fins a mièg-mars, de debats publics seràn organizats de pertot en França, amb de formas diferentas, dins los ostals de  comuna, los mercats, las entrepresas, subre Internet. Cadun pòt tanben organizar un debat, dins son barri o sa comuna. Las associacions o pòdon tanben faire. Un dispositiu numeric es mes en linha per la Comission Nacionala del Debat Public (CNDP) per ajudar a l’organizacion dels debats.
 
Lo govèrn a fixat quatre temas: la transicion ecologica, la fiscalitat e les despensas publicas, la democracia e la ciutadanetat, l’organizacion de l’Estat e los servicis publics.
 
Totes los ciutadans an la possibilitat de donar son opinion. Una plataforma en linha deu reculhir las contribucions al nivèl estatal. De conferéncias de ciutadans tirats al sòrt serián mesas en plaça dins cada region per escambiar subre las analisis e las proposicions. Se lo debat deu permetre de recensar las opinions, la question principalas son las decisions concrètas que deurián seguir. Fin finala, serà lo govèrn qu’aurà lo poder de decidir. Los elegits de la majoritat an ja parlat d’organizar de referendum subre lo vòte blanc, la proporcionala, la reduccion del nombre de parlamentaris e lo cumul dels mandats.
 
Per qu’aquel debat non sià una simpla sortida de crisi pel govèrn, caldrà una participacion massissa dels “gilets jaunes” e de la populacion en general. Las revendicacions qu’èran fiscalas, puèi socialas, son ara son plan mai generala. Lo Referendum d’Iniciativa Ciutadana es devengut una de las revendicacion màger dels “gilets jaunes”. Coma o escriguèt Joan-Marc Leclercq Jornalet, “inspirat per la constitucion soïssa, es la possibilitat peu pòble de demandar un referendum sus quin subjècte que sia a partir deu moment quan aquò es volgut per 700 000 personas. En Soïssa es 100 000, e atau lo percentatge deu còs electorau es respectat”. La validacion d’aquel principi cambiariá prefondament la natura centralista de las institucions de l’estat francés.
 
Atal, a l’entorn dels “gilets jaunes” e tanben de las marchas per lo clima, i a un desir fòrt dels francés per cambiar de modèl politic. Es una oportunitat istorica per mudar l’organizacion jacobina de l’estat francés. Dins las conclusions del debat, una grand nombre de franceses pòt demandar una vertadièra television regionala, un poder regional mai fòrt. Dins lo futur, lo Referendum d’Iniciativa Ciutadana poiriá portar d’autras politicas localas que las impausadas per l’estat central. Los occitanistas pòdon jogar lor ròtle per faire emergir aquelas demandas que respondan a una part de las revendicacions dels “gilets jaunes” eissits en granda part dels territòris periferics de França.
 
D’un autre costat, devèm portar de demandas pròprias per la lenga e cultura occitana a l’escòla, a la television, dins l’espaci public... Aquelas demandas non son pas brica una preocupacion màger dels “gilets jaunes”, mas lo grand movement social que vivèm fin de setmanas aprèp fin de setmanas laissa un espaci per faire ausir las nòstras revendicacion, e qui sap, crear una nòva generacion de militants occitanistas.
 
La granda consulta nacionala es l’escasença de faire sortir la demanda occitana del ghetto ont l’estat francés la mantén. En Provénça, Limosin, Auvèrnhe e endacòm mai, cal participar e se possible animar la granda consulta nacionala.
 
A Tolosa, entre Gasconha e Lengadòc, dissabte 19 de genièr, a l’ostal d’Occitània, i aurà un debat intitulat “ Federalisme e Referendum d’Iniciativa Ciutadana” animat per tres organizacion occitanistas, Bolegadis, Bastir Occitània E Pais Nòstre. I aurà:
 

— de 10h a 12h30, un expausat subre la democracia e lo federalisme soïssa per Dominique Drouet, animator del cercle de reflexion occitan Bolegadís,
 
— De 14h a 16h30, un debat subre la  revendicacion occitanista a l’entorn del Referendum d’Iniciativa Ciutadana.
 
Serà l’escasença de pensar aquel temps de mutacion institucional.
 
 
 
 


abonar los amics de Jornalet
 



publicitat
BANER1-2-3: DGPL DICTADES



Comentaris

23 de genièr 06.41h

#12 aniretz bramar dissabte que ven, "Macrou, demissíu !" dentre le monde francitan? cantar le "se canta" ? Siatz Pòple premièr !









Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

20 de genièr 13.32h

Reclamar una television independenta per region amb d'occitan cada jorn dins lo grand debat d'un costat e portar la bandièra occitana dins la manifestacion dels "gilets jaunes " de l'autre. Cal profitar amb oportunitat de las flaquessas ponctualas de l'estat jacobin.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

19 de genièr 21.47h

#6 L'occitan tombarà pas del cèl....
Passarà per carrièras o passarà pas sense la rèsta...
Cal préner le bon trin!


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

19 de genièr 16.46h

#5 Oc, mas una occitanitat residuala qu'ignoran completament e dont an pas de tot consciencia. Tant poderos e eficaç foguèt lo bugadatge de cervèl practicat per l'estat parisenc dempuèi dos sègles. Lo poble reivendica sos dreches amb los espleches ideologics e fantasmatics qu'om li a donat a l'escola francesa jacobina : Gallès valent e reborsièr/Revolucion 1789/Bastille/Tablèu de Delacroix amb femna que brandis lo drapel blau-blanc-roge..eca... Lo trabalh de re-informacion istorica e cu... Legir la seguida


Valora aquest comentari:   votar positiu 16   votar negatiu 0
Respondre comentari replica Comentari inadequat   Formulari d'abús de comentari

19 de genièr 14.11h

ÒC de segur : i cal participar ! Per far entendre la votz occitana. Degus o farà pas per nosautres !
Per la lenga, l'ensenhament e la television : cal far de bruch e se mostrar !!
Cal manténer l'occitan coma lenga de comunicacion e donc lo far e se far ausir.
Dins un temps passat auriái cridar : "Farem tot petar !" Pr'amor que es sonque amb la violéncia que lo mond se pòt far entendre....malurosament !


Valora aquest comentari:   votar positiu 9   votar negatiu 1
Respondre comentari replica Comentari inadequat   Formulari d'abús de comentari

19 de genièr 10.49h

En França se pòt debatre de tot, mas sense cap de canviament (ni cap de seriós ni de bona volontat dins lo debat parlamentari) ni cap d'avançada significativa sus l'autogovèrn dels territoris e sus las lengas...

Un Estat centralista de mena, sol pòt entamenar una decentralizacion en partent de naut.

Es a dire en préner sas responsabilitats lo govèrn e lo parlament, e non pas amb una falsa democracia participativa que desembocarà sus pas ren.


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

19 de genièr 10.16h

*mars: març (mars o mart es la planeta)

Mart (o Mars), la quatrena planeta.
Mart (o Mars), dieu roman.
març, tresen mes de l'an.
dimars (o mars, forma classica encara atestada), segond jorn de la setmana.

https://oc.wikipedia.org/wiki/Mart/mar%C3%A7/dimars_(omonimia)


Valora aquest comentari:   votar positiu 0   votar negatiu 1
Respondre comentari replica Comentari inadequat   Formulari d'abús de comentari

18 de genièr 23.04h

Es lo govèrn francés qu'es sus la defensiva. Cal contunhar d'afortir las revendications, e mai contredictòrias. Cal ebranlar aquela cinquante republica jacobina


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

18 de genièr 21.50h

#4 Perqué l'occitanisme es tan pauc present dins le movement dels GJ ?
Cresètz qu'es un affar lingüistica ? Lor seu francitan, o occitan, que'l disen pas aquestes nomes, attèsta pasmens una occitanitat autentica.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

18 de genièr 18.06h

#3 Empacha pas mens que cada escasença de parlar de l'occitan es pas de negligir. Sens illusion, mas es piéger de participar a l'omertà que nos vòl sebelir.


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL AN LAFONT

Perfil

Jean-Charles Valadier

Jean-Charles Valadier logo rss

Adjunt al cònsol de Tolosa en carga de la lenga e cultura occitana de 2008 a 2014, es membre de la comission Regions e Federalisme del partit Euròpa Ecologia Los Verds.

mai d'informacions

contactar l'autor

Las mai...

Mai d'articles

Archius




Etiquetas

D'autres articles


Jornalet, gaseta occitana d'informacions