Es un plat tipic de la region d’Avinhon, una sòrta de flan de merinjanas qu’es de costuma de far a l’estiu. D’en primièr cal fregir las merinjanas e ne far una purèa, puèi se barrejan amb d’uòus e de lach e se meton dins un mòtle, que uèi pòt aver una forma quina que siá, mas qu’abans aviá la forma d’una tiara papala, particularitat que benlèu a qualque rapòrt amb lo fach qu’Avinhon foguèt sèti pontificial pendent los trenta nòu ans que durèt l’Esquisma d’Occident, dins lo sègle XIV. Papeton es un iperdiminutiu de papa; n’i a tanben que lo nomman merinjanas dels Papas, que semblariá d’indicar qu’aqueles papas s’i èran congostats autres còps. Coma que ne vire, la soleta causa vertadièrament importanta es lo plat, un delici qu’òm aprèsta encara.
 
 
Papeton de merinjanas
 
Ingredients (per 4 personas): 4 merinjanas, 4 uòus, lach, formatge raspat (parmesan, gruièra), òli d’oliva, pebre e sal.
 
Preparacion: abans tot, trencarem lo cap de las merinjanas, puèi las pelarem, las lescarem, las salarem e las daissarem dins l’escoladoira per que tiren l’aiga que contenon. Al cap d’una ora las lavarem a rajada de robinet e las tornarem daissar dins l’escoladoira. Al cap d’un moment metrem d’òli dins d’una padena e la daissarem sul fuòc. Quora l’òli serà caud las fregirem a per tièra, per cada costat. Aital a flor e mesura que las tirarem de la padena las daissarem sus papièr eissugatot per que tiren l’òli de tròp. En èsser totas fregidas las passarem per la molineta (o pel batedor) e ne farem una sòrta de purèa. Batrem los uòus dins una caçairòla, i ajustarem mièg litre de lach, o remenarem, o salpicarem de pebre e sal, i metrem la purèa de merinjanas e o barrejarem plan barrejat. Metrem la barreja dins un mòtle onchat d’òli, o emposcarem amb de formatge raspat e o enfornarem (a 180 ºC). Aperaquí quaranta minutas après, quora serà ligat e leugièrament daurat per dessús, o desfornarem e o desmotlarem. Ne farem quatre parts, las metrem dins las siètas e las servirem.
 
Variantas: i podèm apondre un sautat de ceba (o escaluènhas) e alhs, un pauc de notz muscada raspada o un brot de frigola. Podèm metre lo mòtle al banh maria. N’i a que, a la taula, i ajustan de salsa de tomata.
 
Autras denominacions: merinjanas dels Papas, merinjanas dei Papas.