CAPCALERA: la botiga

Jornalet, gaseta occitana d'informacions

Diluns, 14 de junh

Vicent Marqués · La bona taula

Dimenge, 12.4.2015 03h00

Los nhòcs


Comentaris 7 comentaris    
Dolent Fluix Bo Molt bo Fabulós (7 vòtes)
carregant En cargament


Lo nhòc es una pasta d’origina italiana que passèt en Provença e País Gavòt a travèrs del País Niçard, region que dempuèi 1793 e fins a 1814 se trobèt jos administracion piemontesa. Lo gnocco (al singular) o los gnocchi (al plural) italians se tròban ja dins de libres de cosina del sègle XIV, e en Itàlia se fan a l’ora de uèi de fòrça manièras. Los nhòcs provençals s’aprèstan amb de farina e de purèa de patanas e après se condimentan amb qualque salsa. Es un plat corrent, sustot al País Niçard. Es tanben sovent present dins los restaurants, preparat de divèrsas manièras.
 
 
Nhòcs
 
Ingredients (per 4 racions): 250 g de patanas vièlhas, 150 g de farina, 1 uòu, pebre e sal.
 
Preparacion: d’en primièr botarem las patanas (sens las pelar) dins una ola, las cobrirem d’aiga e las daissarem sul fuòc. Lo bolh pres, baissarem la flama e daissarem bolhir a fuòc doç. Al cap d’aperaquí 30 minutas,  tirarem l’ola del fuòc, n’escamparem l’aiga, e daissarem refregir las patanas. Quand seràn un pauc refregidas (mas pas de tot en tot) las pelarem, las passarem per una passadoira (dels traucs fins) e las daissarem dins una caçòla. I apondrem la farina, l’uòu e una esposcada de pebre, puèi barrejarem e pastarem fins que se faga una massa elastica, ni dura ni mofla. La daissarem se pausar environ ½ ora e puèi ne farem de bòlas de la pagèla d’un uòu. Sus un marbre o una taula enfarinada, amb la palma de la man, farem redolar aquelas bòlas del temps que las aprimam en fasent de correjas o de cigarros de l’espessor d’un det, a quicòm prèp. Amb un cotelon talharem aquelas correjas a bocins de dos o tres centimètres de longor e puèi i farem d’estrias en tot los quichant amb una forqueta, après los farem redolar un torn complet fins que i ajam fach de pichonas caneladuras. Metrem alavetz d’aiga abondanta dins una ola e la daissarem sul fuòc. Lo bolh pres, començarem d’i metre de pichonas quantitats de nhòcs. Al cap de qualques minutas, quand auràn remontat a la superfícia, los en trairem amb una escumadoira e los metrem dins un plat, e aital farem fins que totes sián cuèches.
 
Los podèm servir amb de parmesan raspat (e de burre fondut), de salsa de tomata, de rabassa blanca en laminas o de chuc de l’estofat. Se pòdon tanben rabinar al forn, amb de chuc de l’estofat, de burre e de formatge raspat.
 
Variantas: i podèm apondre un rajòl d’òli, una nose de burre, un parelh de grans d’alh chaplats, un rajòl de lach, una esposcada de pebre o un pauc de raspat de muscada. D’unes fan còire las patanas al forn.
 
Los nhòcs verds s’aprèstan de la meteissa manièra mas amb l’apondon de bledas bolhidas e capoladas, que i balhan una coloracion verda e escura. Los cal redolar amb la palma de la man, sens forqueta, e ne sortisson amb los extrèms ponchuts (d’unes los fan tanben amb l’ajuda d’un culhièr, e ne sortisson alavetz mai plats). Se manjan adobats amb de chuc d’estofat o de salsa de tomata (e de parmesan raspat). D’unes los fan tanben amb d’espinarcs e quitament amb d’ortigas. Son pròpris del País Niçard. La varianta nomenada “danderols”, pròpria de la Val de Vesúbia, se pòt far amb de bledas o espinarcs, que se capolan finament e se barrejan totes cruses amb la farina.
 
Los nhòcs de cogorda de la val d’Ubaia se fan amb de cogorda bolhida en luòga de patanas. A la fin, se rabinan al forn, amb un rajòl de crema, de sal, de pebre, de muscada e de formatge raspat.
 
Los danderòls de Champsaur s’aprèstan amb 300 g de farina e quatre uòus (en mai de sal e de pebre), barreja que cal remenar fins a ne tirar una pasta lisa, de la consisténcia de la pasta de bonhetas. La farem alavetz bolhir dins d’aiga salada, a culhierats, e, quand aquelas bòlas remontaràn a la superfícia, las en tirarem, las metrem dins una caçòla plata (onchada prealablament amb de burre), las emposcarem de formatge raspat, las asagarem de burre fondut e las enfornarem, a 200º. Al cap d’aperaquí vint minutas, quand los aurem fach daurar un pauc per dessús, los en tiraren e los servirem.
 
Los danderòls de las Valadas Occitanas se fan amb de farina, d’uòus, de lach, de burre e de sal. Metrem d’aiga (o de bolhon de carn, de galina) dins una ola e la daissarem sul fuòc. Salarem e, lo bolh pres, i metrem la pasta a culhierats pichons. Quand remontaràn a la superfícia, los en tirarem e los servirem. Per dessús s’espampilha de formatge raspat e de burre fondut, o de salsa de tomata.
 
 
Autras denominacions
 
Nhòcs verds: danderòls (la Val de Vesúbia), mèrdas de can (Val Ges, Niça e d’autres endreches; deu aquel nom a la color).
 
 
Dialectalismes
 
Danderòls: dandeiròls (Val de Vesúbia), ganderas (Champsaur), dondeirons, donderets (Valadas Occitanas).
 
Mèrdas de can: mèrdas de chan (val Ges).
 
Nhòcs: nhòcas.



publicitat
BANNER1: IEO 30 MARPOC



Comentaris

13 d'abril 10.25h

#6 Mercés plan per la informacion!


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

12 d'abril 23.55h

#3 anhòcos = nhòcs

#4 "Cal èstre nhòco per se faire una nhòca en les anhòcos" (dicha en vivaroalpenc suspelenc) = Cal èstre nèci/niai/simplet per se faire una badòla/giba en les nhòcs/tot ce qu'es mofle/sople.
E i es un sens escondut coquinàs de mai que laisho a cada un 'a libertat de trobar...


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

12 d'abril 20.52h

#2 Mercés plan!


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

12 d'abril 20.51h

#1 Hola, Susperenc. Em podries dir quin és el significat de la frase? És per a incloure-la en el text.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

12 d'abril 20.44h

#1 Sinonim per anhòcos?


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

12 d'abril 16.50h

A Sant Estève de'n Tiniá : Los andeiròls (sensa d-).


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

12 d'abril 16.47h

A Suspèr e en l'aut país mentonasc se dison : 'es anhòcos.

E una dicha : Cal èstre nhòco per se faire una nhòca en les anhòcos.

Mercés per vòstre article. Miam!


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Vicent Marqués · La bona taula

Vicent Marqués · La bona taula logo rss

Cosinièr e escrivan, presenta dins aquesta tribuna çò de melhor de la cosina populara occitana.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions