Es una ortalécia que, dins la siá varietat de taula, se consuma sustot en nòrd d’Euròpa, mas en Provença i a tanben la costuma de ne manjar. Son fòrça famosas las de Gardana, près de Marselha. Se còson al forn e s’asagan amb una vinagreta. An un gost sucrat e la carn presenta una coloracion entre roja e violeta. Abans i aviá la costuma de las vendre per la carrièra, pendent l’ivèrn, e las vendeiras cridavan per las carrièras de Marselha: De bledas-rabas de Gardana! Leis bledas-rabas cuechas au forn! Èran un lepetitge e las maires ne crompavan pels pichons.
 
Fan tanben una ensalada de pomas e bledas-rabas en Auvèrnhe, que li dison ensalada d’ivèrn. En aquela region òm las manja crusas.
 
 
Ensalada de bledas-rabas
 
Ingredients (per 4 racions): 1 kg de bledas-rabas de taula, òli d’oliva, vinagre e sal.
 
Preparacion: d’en primièr netejarem las bledas-rabas a rajada de robinet e, per acabar, las portarem al forn, a 200º. Al cap de trenta o quaranta minutas, quand las bledas-rabas seràn cuèchas, las trairem e las daissarem refregir. Quand seràn frejas las pelarem e las coparem en dats, de l’espessor d’una avelana. Las metrem dins un plat, las asagarem d’òli e de qualques gotas de vinagre, las salarem e las portarem a taula.
 
Variantas: las podèm garnir amb quatre anchòias dessaladas o un parelh d’alhs trissats. D’unes i botan de maionesa.
 
 
Ensalada d’ivèrn
 
Ingredients (per 4 racions): 1 endévia, 3 pomas reinetas, 1 bleda-raba de taula, òli de noses, vinagre, sal e pebre.
 
Preparacion: netejarem l’endévia a rajada de robinet, la daissarem s’escolar e la talhonarem. Pelarem las pomas e la bleda-raba e las abocinarem. O metrem tot dins un plat, asagarem d’òli e de vinagre, salarem, i donarem una esposcada de pebre e la servirem a taula.
 
Variantas: d’unes i apondon qualques noses brigalhadas.
 
 
Autras denominacions
 
— Ensalada d’ivèrn: salada d’ivèrn.
— Ensalada de bledas-rabas: salada de bledas-rabas.