Es un plat de la Provença meridionala, la mai pròcha de la mar. Son de macarrons que, a primièra vista, semblarián aprestats a la manièra italiana mai elementària: simplament amb un saurengat de tomata. E totun i a lo fach que los macarrons, malgrat lor origina italiana, son coneguts dempuèi l'ancian temps en Provença; las tomatas, pr'aquò, son mai modèrnas. Vòli dire que, possiblament, quand arribèron las tomatas, totes deguèron trobar qu'èran un bon acompanhament pels macarrons e, en general, per tota mena de pasta, en Itàlia, en Soïssa, al País Niçard e en Provença, que son los luòcs ont la pasta s’es mai enrasigada. Coma que ne virèsse, lo fach es que, aprestats aital, los macarrons agradan fòrça, e la pròva es que se son escampilhats d'en pertot.
 
 
Macarrons amb tomata
 
Ingredients: 300 g de macarrons, 1 kg de tomatas maduras, 100 g de formatge raspat (parmesan, gruièra), òli, sucre e sal.
 
Preparacion: d'en primièr emplirem amb pro d’aiga una ola, i apondrem un rajòl d’òli e la daissarem sul fuòc. Salarem e, lo bolh pres, i apondrem los macarrons. Quan tornarà prene lo bolh, rebaissarem la flama e daissarem bolhir a fuòc doç. Un parelh de minutas après, los remenarem per que s’arrapen pas al cuòl. Mentretant, rasparem o talhonarem las tomatas (peladas, dins lo darrièr cas). Al cap de 12 o 13 minutas d’ebullicion, quand los macarrons seràn cuèches, los tirarem del fuòc, n'escamparem l’aiga e los daissarem dins la coladoira. Puèi getarem un rajòl d’òli dins una padena e la daissarem sul fuòc, puslèu doç. Quand l’òli serà caud i metrem la tomata e la saurengarem. La remenarem de contunh per que s'arrape pas, i apondrem un pecic de sal e un autre de sucre e, quand serà confida, i apondrem los macarrons; puèi remenarem, puèi après tirarem del fuòc e servirem dins las siètas. Fin finala emposcarem amb de formatge e menarem a taula.
 
Variantas: i podèm apondre una esposcada de pebre o qualques fuèlhas de baselic. S’i pòt saurengar mièja ceba o un gran d’alh, tot chaplat