Bandièra01 1180x150: Comuna de Tolosa

Opinion

La chichomèia

Vicent Marqués · La bona taula

Vicent Marqués · La bona taula

Cosinièr e escrivan, presenta dins aquesta tribuna çò de melhor de la cosina populara occitana.

Mai d’informacions
Es un plat d’estiu-tardor, de quand fa fòrça caud, una mena de ratatolha que s’aprèsta amb de merinjanas e tomatas, pròpri de Lengadòc. Las ratatolhas, en règla generala, se pòdon aprestar amb de legums de tota mena, mas en Lengadòc lor agrada mai simple, solament amb de merinjanas e de tomatas e, se volèm, una ceba e un alh saurengats. Coma per totas las ratatolhas, la costuma es de la manjar amb de pan, tebesa o a temperatura ambienta, per çò que quand fa caud agradan pas las causas que venon de sortir del fuòc, e amb aquestas calors africanas d’ara encara mens. Chichomèia, en mai d'aquò, sembla que vòl dire “mescladissa”, “barrejadís”, en aquel cas una mescladissa de legums.
 
 
Chichomèia
 
Ingredients (per 4 personas): 1 kg de merinjanas, 500 g de tomatas maduras, 2 cebas, òli d’oliva, pebre e sal.
 
Preparacion: per començar descabeçarem las merinjanas, las pelarem e las coparem en dats espesses. Puèi pelarem e atalhonarem las cebas e, sul pic puèi, pelarem e abocinarem las tomatas. Quand aquò serà prèst botarem un rajòl d’òli dins una caçairòla e la daissarem sul fuòc, puslèu doç. Quand l’òli serà caud, i botarem la ceba e la saurengarem un pauc. La bolegarem de quora en quora e, quand serà transparenta, i apondrem las merinjanas e las saurengarem tanben. O remenarem de còp en còp e, al cap d’un brieu, i apondrem las tomatas. I farem qualque remenada e, passadas qualques minutas, i apondrem un veirat d’aiga e o salpicarem de sal e pebre. O cobrirem e o daissarem bolhir a fuòc doç. Trenta minutas mai tard, quand tot serà cuèch, o trairem del fuòc. S'i a tròp de liquid, o daissarem bolhir qualques minutas amb la caçairòla destapada e, se rèsta tròp sec, i apondrem un pauc d’aiga. O daissarem refregir e o servirem. O podèm manjar caud o a temperatura ambient, amb de lescas de pan.
 
Variantas: i podèm apondre un parelh de pebrons o tres, un parelh de cogets, mièja dotzena d’alhs o un brot de ferigola. I podèm metre las merinjanas sens las pelar. O podèm servir coma acompanhament per d'uòus fregits.
 
Localisme: “chichomet”.
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article