Bandièra01 1180x150: Comuna de Tolosa

Opinion

Los cornets

Vicent Marqués · La bona taula

Vicent Marqués · La bona taula

Cosinièr e escrivan, presenta dins aquesta tribuna çò de melhor de la cosina populara occitana.

Mai d’informacions

Son tipics dels monts de Cantal, en Auvèrnhe, e los mai famoses son los de la comuna de Murat. D’aquel parçan es lo conegut formatge de cantal, aprestat amb de lach de vaca, çò que vòl dire que i a de vacas pertot, e, doncas, de burre e de crèma foetada. Los cornets son de finas fuèlhas de pasta de farina, d'uòus, de sucre e de burre. En los sortissent del forn, e abans que se refregiscan, òm los vissa en forma de còrn o d’embut d’aperaquí dotze o catòrze centimètres de longor e d'unes cinc centimètres de diamètre en la part mai dobèrta. En acabant, cal solament los daissar refregir e los emplir amb de crèma foetada e ensucrada. Es un lepetitge qu'agrada fòrça als grands e menuts.

 

 

Cornets

 

Ingredients (per 12 unitats): 100 g de farina febla, 4 uòus, 100 g de sucre glaçat, 50 g de burre, ròm e 500 g de crèma foetada (amb de sucre).

 

Preparacion: d'en primièr, metrem dos uòus e doas glàrias dins una escudèla, o batrem amb lo batedor fins que faga un pauc d’escuma, i apondrem lo sucre e la farina e contunharem de batre vigorosament per espaci d’aperaquí dètz minutas. Puèi i apondrem dos culhierats de ròm e lo burre (qu'aurem liqueficat prèviament) e o tornarem batre un pauc, fins que n'ajam fach una pasta puslèu mòla. En acabant oncharem un platèl de forn, i botarem quatre culhierats de pasta (separats) e, amb lo revèrs del culhièr, i farem una forma triangulara. Puèi los enfornarem, a 220º. Al cap de quatre o cinc minutas, quand se seràn eissugats un pauc, los tirarem del fuòc, los desempegarem amb una paleta e, rapidament, abans que se refregiscan, lor farem una forma de còrn o d’embut. Quand seràn refregits los farcirem amb la crèma, a pichons culhierats, o amb lo margue de pastissièr.

 

Variantas: i podèm apondre una envolopa de levadura en posca o un rajolat d’aiga. Podèm cambiar lo ròm contra d'aiganafa o de sucre vanilhat. D'unes los farcisson de crèma, o de glacets de tota sòrta.


 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article