CAPÇALERA2: IEA-AALO

Jornalet, gaseta occitana d'informacions

Dimècres, 21 de novembre

Vicent Marqués · La bona taula

Dimenge, 1.7.2018 03h00

L’Armanhac (e III)


Comentaris Pas cap de comentari    
Dolent Fluix Bo Molt bo Fabulós (3 vòtes)
carregant En cargament


Los melhors e mai rars son los que son estats elaborats sense barrejas, produch solament de qualque culhida excepcionala, segon conta Enric Dufòr dins Armagnac, eaux de vie et terroir:
 

Amb art, sens dobte, es possible de “preparar” d’aigardents, d’amalgamar mai d’una qualitat, mas d’aquò a retrobar e egalar amb las siás “valors” intrinsècas, non modificadas, los armanhacs de granda classa, coma un “Grand Bas”, i a un marge plan apreciable. De laurièrs espigats dins los concorses nacionals pròvan, sens dobte, dins lo cas de l’experimentacion, —mai exactament del “preparator— qu’òm a obtengut d’aigardents de primièra classa. Mas non qu’òm aja abotit a una “egalizacion”, a las equivaléncias per mesa en valor amb un armanhac d’origina, non “aprestat”, sortit d’un bon terrador e apertenent a una granda annada. Es a dire quand la totalitat dels “paramètres” favorables son reüssits.
 
En aquel cas, i a pas comparason possibla, aquel armanhac —bona culhida, terrador e plants de qualitat, vinificacion, destillacion, vielhiment convenents— es imbatable. Quitament davant los conhacs excepcionals. Aqueles tanben los despassa. Cap d’amator, per pauc avertit que siá, se pòt pas vertadièrament enganar.
 
Los melhors son los de culhida unica, mas son pas accessibles a totes, coma lo meteis autor nos remembra:
 
En produsent los unes e los autres çò qu’a un gost unic, es als amators mai assabentats —aquò se compren e los prèses o indican— que destinan aqueles plan bons armanhacs millesimats que son gaireben de raretats, de segur, mas que son tanben la siá bandièra e la fiertat de totes!
 
En tornant a las disposicions legalas, nos ajudan pas tròp a l’ora de saber l’edat del contengut d’una botelha. Los mai joves, amb un parelh d’ans de vielhiment, s’identifican a l’etiqueta amb tres estelas o amb las inicialas V.S. (acronim de l’anglés Very Special); amb un minim de tres ans las cavas pòdon metre la designacion V.O. (Very Old); amb un minim de cinc i pòdon metre V.S.O.P. (Very Superior Old Pale), Resèrva e d’autras similaras; amb un minim de sièis i pòdon metre Napoleon, X.O. (“Extra Old”),Èxtra, Resèrva Vièlha e d’autras de semblablas; en passar de sièis ans i a pas de legislacion, e, de mai, se pòt produire lo cas que, segon las marcas, un V.S.O.P. aja mai d’edat qu’un Extra.
 
Se l’an de la culhida foguèt bon, l’etiqueta o sòl especificar, mas se ditz qu’a quinze ans, per exemple, aquò vòl pas dire que tot l’aigardent de la botelha aja aquela edat, mas solament una partida (la de l’aigardent mai jove, segon la legislacion) per çò que, generalament, l’armanhac s’elabòra amb la tecnica del copatge, barreja de culhidas desparièras. Dins lo cas dels armanhacs de culhida unica, es important que s’especifique tanben l’an que foguèt embotelhat, per çò que s’es passat pauques ans dins la barrica, serà un aigardent corrent, per tant bona que siá l’annada, malgrat qu’aquò arribe pas sovent perque las annadas bonas son las que mai se daissan vielhir, çò qu’es plan natural.
 
Tot comptat e rebatut, un embolh.
 
Per se far una idèa aprochada de l’edat d’un aigardent, i a un metòde fòrça simple: se met sus la copa que ven de se beure un fuèlh de papièr e o daissa en luòc tranquil; s’al cap d’aperaquí dètz oras persistís l’odor, s’agís d’un armanhac de mai de quinze ans. S’es al cap de vint e quatre oras, s’agís d’un armanhac fòrça vièlh, de mai de vint ans. Aiçò es çò que li dison “lo fons de copa”.
 
I aurem d’apondre tanben que l’armanhac supòrta pas las prèissas de l’èra industriala, e aquò se vei per las elaboracions mai economicas de qualques cavas; aquelas que, aürosament, son las excepcions.
 
Alavetz, se i a pas d’experiéncia a l’ora de crompar, una manièra fòrça bona de s’enganar pas es, d’un costat, refusar sistematicament los produches de melhor mercat e de l’autre prene en compte que los melhors aigardents son los de culhida unica.

 


abonar los amics de Jornalet
 



publicitat
BANER1: IEA-AALO



Comentaris


No hi ha cap comentari




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER 3 teveoc

Perfil

Vicent Marqués · La bona taula

Vicent Marqués · La bona taula logo rss

Cosinièr e escrivan, presenta dins aquesta tribuna çò de melhor de la cosina populara occitana.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions