CAPÇALERA: dintrada
CAPÇALERA2: Entèsta drecha, convergéncia occitana-fixa

Jornalet, gaseta occitana d'informacions

Dimècres, 23 d'agost

Federacion dels Ensenhaires de Lenga e Cultura d'Òc (FELCO)

Dissabte, 12.8.2017 03h00

Retraches de collègas: Barbara Roqueta, ensenhaira en collègi


Comentaris Pas cap de comentari    
Dolent Fluix Bo Molt bo Fabulós (4 vòtes)
carregant En cargament


Barbara Roqueta, ensenhaira en collègi

Intervencion de l’escriveire e linguista Florian Vernet al collègi de Casols




Amb lo retrach de nòstre collèga niçard Jerèmias Marçais, a la prima passada, avèm dubèrt dins aquela cronica una seria de retraches de collègas. Nos sembla important tanben de mostrar que, la FELCO, es pas solament una reflexion, un seguit dels dorsièrs administratius e politics, es tanben una federacion que defend de collègas engatjats sul terrenh. A aqueles collègas, dins sa diversitat, lor volèm donar una plaça dins aquela cronica
 
Vaquí donc lo retrach de Barbara Roqueta (un nom predestinat, saique!) que passèt lo CAPES en 2016 e que comencèt d’ensenhar aquest an.

 



De qu’es al just ta foncion? Ont ensenhas? Dins quines nivèls? Quina es estada ta formacion?
 
A la dintrada 2017, serai titulària sus zòna de remplaçament sus la ZR de Mende.
 
En 2016-2017 èri estagiària als collègis de Casols (Cazouls) e Cecenon (Cessenon) d’Òrb (34). Aprèp lo CAPES d’occitan – opcion Lettres, obtengut en 2016, seguiguèri la formacion prepausada per la Facultat d’Educacion (FDE) de Montpelhièr. Primièr, l’annada de master 1 ont faguèri un estagi de quatre setmanas al collègi de Mèsa (34). Capitèri lo master 2 “ensenhament” e la titularizacion al mes de junh 2017.
 
 
Cossí s’organiza ton trabalh? Tipe de corses? Ensenhament d’una autra disciplina? montatge de projèctes interdisciplinaris? iniciativas culturalas?
 
Pòdi pas parlar que de mon annada coma estagiària (2016-2017) a responsabilitat. Aquel dispositiu compren 10 oras d’ensenhament per setmana. Per çò que me concernís, aviái un complement de servici a Cecenon d’Òrb. Al fial de l’annada, me poguèri investir dins de projèctes interdisciplinaris en mai de las oras d’ensenhament; faguèri un ensenhament practic interdisciplinari (EPI) d’un trimestre amb lo professor de musica que per astre parlava un pauc la lenga. Participèri tanben a una mission contra lo descrocatge escolar. Èri la tutritz d’un escolan en dificultat escolara a rason d’una ora per setmana. Dins l’encastre de la ligason escòla-collègi, prenguèri contacte amb los regents e directors d’escòla del canton. Aprèp d’unes escambis, capitèri d’intervenir dins las classas del primièr gra per tal de sensibilizar los enfants a l’ensenhament de complement “occitan”. Enfin aguèri l’escasença d’assegurar de remplaçaments en francés al tresen trimestre.
 
 
Quines plasers rescontras dins ton trabalh? Bastison de projèctes? transmission de la lenga? de la cultura? escambis amb los autres ensenhaires? Pòs donar d’exemples?
 
Çò que reteni mai que mai, es lo projècte d’ensenhament pluridisciplinari en co-animacion amb un professor de musica. Partiguèrem d’una iniciativa que nos semblava un pauc “artificiala”; d’efièch, èra lo primièr ensag en matèria d’EPI. Aviam pas de directivas precisas e sabiam pas gaire cossí endralhar lo trabalh. Descobriguèri amb estrambòrd que mon collèga parlava plan plan la lenga. De son costat, prenguèt un plaser vesedor a emplegar de mai en mai son occitan de Tarn. Trabalhèrem suls instruments de musica tradicionals en Lengadòc. Mas çò mai excepcional foguèt fin finala la plaça que prenguèt l’utilizacion de la lenga. Podèm dire que l’experiéncia se debanèt totalament en occitan. Per acabar, los escolans èran francament estabosits de veire non pas un, mas dos de lors professors escambiar, galejar e transmetre en occitan.
 
 
Quinas dificultats? Agach negatius de cap a ta disciplina? Dificultats de manténer los efectius? tuerts amb l’administracion? Emplec del temps complicat? desplaçaments tròp nombroses?
 
La decepcion primièra foguèt de pas poder montar un projècte de sortida pedagogica o de rescontre. Aviái dins l’amira de presentar un viatge per l’annada a venir. Malurosament, las constrenchas adminitrativas e financièras demandan de presentar cada projècte al mes de junh. Tot aquò se vòta en julhet al C.A. Aquò vòl dire qu’en cambiant d’establiment, ven complicat d’organizar qué que siá.
 
Segondament, soi decebuda de pas poder concretizar lo trabalh de recrutament mes en plaça al fial de l’annada. Establir lo contacte amb las escòlas, participar als acamps, presentar l’opcion conjuntament als parents puèi als pichòts de mairalas… Autant de causas per fin finala descobrir que serai pas mai sus l’establiment e que benlèu l’opcion barrarà malgrat lo sosten e la fisança del cap d’establiment.
 
 
Lo ròtle de l’engatjament associatiu / sindical. La FELCO, son associacion academica (CREO), de qu’es aquò per tu? Quines rapòrts amb los sindicats d’ensenhaires?
 
Per ieu es la marca d’un engatjament cap a la lenga e a la cultura occitana. Me permetèt d’èsser al fial de l’actualitat e de la politica linguistica. Los bulletins permeton per exemple de s’avisar dels arrestats, de las leis que sortisson, mas tanben d’una seccion qu’es amenaçada de tancar coma foguèt lo cas per lo licèu F. BAZILLE aquest an, que tanquèt[1]. La FELCO mena tanben un trabalh de comunicacion amb los sindicats d’ensenhaires; aquest an lo SNES a anonciat sa volontat d’aparar las lengas regionalas mercés a una iniciativa de la FELCO.
 
 
Los contactes amb lo defòra, amb los autres ensenhaires de ton establiment? amb d’autres ensenhaires d’occitan de las autras vilas, de las autras acadèmias? amb los parents d’escolans? amb las autras associacions de cultura occitana?
 
Los ensenhaires de mos dos establiments son generalament favorables a l’ensenhament de l’occitan e se mòstron curioses cap a la lenga. Son estrambordats per las proposicions d’un trabalh de co-animacion o de transdisciplinaritat. Per aver rescontrat qualques parents, lo contacte foguèt bon. Los parents d’escolans son contents quand l’opcion favoriza las nòtas bonas... Per çò que concernís los autres ensenhaires d’occitan, avèm l’escasença d’escambiar dins las jornadas de formacion academica. Es totjorn formator d’ausir lo vejaire e lo biais de trabalhar de cadun. Podèm comunicar pendent l’annada mercés a una plataforma de partatge “ViaEduc”. I podèm metre en linha de sequéncias pedagogicas, d’evaluacions per mutualizar lo trabalh.
 
Al collègi de Cecenon, contactèri una associacion occitana. Trabalhèrem amassa tot lo long de l’annada; organizacion d’un lòto, d’una dictada, d’un rescontre al collègi... L’associacion cecenonesa porgiguèt de libres e de presents als escolans. L’experiéncia del rescontre intergeneracional foguèt rica.
 
 
Quinas perspectivas?
 
M’agradariá de perseguir aquel trabalh de transdisciplinaritat de tal biais que los ensenhaments fagan sens pels escolans. Aquel trabalh permet de far de palancas e es lo melhor biais, per ieu, d’inscriure la lenga dins un encastre autentic.
 
M’agradariá mai que mai de montar de projèctes de sortidas pedagogicas e de rescontres amb d’artistas occitans, totjorn dins la dralha de mostrar als escolans que la lenga es un mejan d’expression viu e ric.
 
Enfin, desiri bravament poder ensenhar lo francés qu’es tanben ma formacion d’origina[2]. Pensi qu’es important per un professor d’occitan d’ensenhar sas doas matèrias de predileccion. Pensi qu’aquela postura dobla dobrís a mai d’una possibilitat d’aprendissatge.
 
Vòli desvelopar la dralha qu’ai presa aquesta an en çò que concernís la sensibilizacion en primièr gra. Es fòrça important per recrutar e manténer d’efectius correctes al collègi. Organizar de projèctes que recampariá los escolans del primièr e del segon gra.
 
 
 


abonar los amics de Jornalet
 
[2] Nòta de la FELCO: Barbarà capitèt una licéncia de letras modèrnas abans de començar sa licéncia d’occitan.



publicitat



Comentaris


No hi ha cap comentari




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: IEO Label ÒC

Perfil

Federacion dels Ensenhaires de Lenga e Cultura d'Òc (FELCO)

Federacion dels Ensenhaires de Lenga e Cultura d'Òc (FELCO) logo rss

La Federacion d’Ensenhaires de Lenga e Cultura d’Òc (FELCO) regropa las associacions academicas d’ensenhaires d’occitan (CREOs, AELOC per Ais-Marselha e APLR per Niça) de l’Educacion Nacionala francesa.

mai d'informacions

contactar l'autor

Las mai...

Mai d'articles

Archius




Etiquetas

D'autres articles


Jornalet, gaseta occitana d'informacions