CAPÇALERA2: Entèsta drecha, convergéncia occitana-fixa

Jornalet, gaseta occitana d'informacions

Dissabte, 22 de julh

Vicent Marqués · La bona taula

Dimenge, 9.7.2017 03h00

Los escagaròls amb alhòli


Comentaris Pas cap de comentari    
Dolent Fluix Bo Molt bo Fabulós (2 vòtes)
carregant En cargament


L’alhòli va plan per qué que siá, per la carn, pel peis e tanben pels escagaròls, que son ni una causa ni l’autra. Los escagaròls amb alhòli son d’elaboracion simpla: cal solament los bolhir amb d’èrbas nolentas, los tirar del clòsc e los salsar amb d’alhòli. L’èrba mai emplegada es lo fenolh mas per aquela besonha tanplan pòt anar lo balme, la menugueta, la ferigola, la majorana o lo romanin. E los escagaròls normalament son cacalaus o morguetas, mas pòdon tanben èsser mai pichons, coma las meissonièras (Helixcoespitum), las platèlas (Helix algira), las porquièras (?) o los limaçons (divèrsas espècias). Son tipics del Bas Lengadòc e de Provença, e dins las doas regions los aprèstan de la meteissa manièra. En Provença son partida integranta del sopar gròs, repais magre que fan los provençals la nuèch de Nadal. Los trapam dins lo sonet d’Amable Richier “La limaçada” :
 

Quand dins l’èr restontís lo tambor dei limaças,
Que leis escaragòus banejan de sei traucs,
Es alòr que fa bòn de lei faire la caça
E n’adurre un panier per regalar l’ostau.
 
E zòu! que l’ola bolhe e si coïnen en massa!
Dau temps que s’alestís l’alhòli a faire gaug,
Puei, a taula, cadun ven jónher sa plaça:
Per tirar dau cruvèus, armat d’un esplingau.
 
E vague de saussar, manjar la limaçada
Qu’au cabanon si fai entre bòns cambaradas
Quora lo vin peteja e larga sei cançons.
 
Au flascon s’amorrant mielhs qu’an un ben calici,
Un bòn plat de limaças es per nautrei un delici,
E quilha ambe l’alhet coma un flame peisson.
 
 
Escagaròls amb alhòli
 
Ingredients (per 4 personas): 1 kg d’escagaròls, 1 mortierada d’alhòli, fenolh e sal.
 
Preparacion: d’en primièr metrem los escagairòls (prèviament enganats[1]) dins una ola, los cobrirem d’aiga, los daissarem sul fuòc, i balharem un bolh, n’escamparem l’aiga e los tornarem metre sul fuòc, amb d’aiga novèla e qualque rameta de fenolh. Los salarem e, lo bolh pres, rebaissarem la flama e los daissarem bolhir a fuòc doç. Al cap d’aperaquí trenta minutas, los tirarem del fuòc, n’escamparem l’aiga e los metrem dins las siètas. Los menarem alavetz a taula, acompanhats d’una salsièra amb d’alhòli.
 
Variantas: podèm apondre dins l’ola d’autras èrbas (balme, ferigola, romanin). En Lengadòc d’unes los bolhisson en companhiá d’una ceba (atalhonada amb un clavèl de giròfle), un parelh de carròtas, d’alhs, ferigola e pebre. En Provença se manjan, generalament, bolhits, mas d’unes tanben los aprèstan rostits a fuòc de flama, sus una tòla.
 
Autras denominacions: cagaròls amb alhòli (Bas Lengadòc), cagaraulas amb alhòli (Bas Lengadòc, Costièra de Nimes), cacalausas amb alhòli (Costièra de Nimes, Provença), cacalaus amb alhòli, caragòls amb alhòli, escargòls amb alhòli (Provença). ’Escagaròls amb alhòli’ es una denominacion correnta en Bas Lengadòc e Provença.
 
 
 
[1] Per "enganar los escagaròls" se compren "lor far traire las banas defòra del clòsc abans de los còire, per los poder manjar melhor après".


 


abonar los amics de Jornalet



publicitat



Comentaris


No hi ha cap comentari




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: IEO Label ÒC

Perfil

Vicent Marqués · La bona taula

Vicent Marqués · La bona taula logo rss

Cosinièr e escrivan, presenta dins aquesta tribuna çò de melhor de la cosina populara occitana.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions