Bandièra01 1180x150: Comuna de Tolosa

Opinion

Passatz encara pel prat?

Alan Roch

Alan Roch

Responsable de l’IEO-Aude. Contaire,escriveire, cronicaire (ràdio, premsa escrita). Afogat de rugbi de 13.

Mai d’informacions

Tèxte legit

Vos l’aviái promés lo còp passat (cronica del 2/3/23): vaquí doncas unas novèlas proposicions per acabar las sesilhas de conte d’un biais mai dobèrt e mai modèrne, tot en demorant fisèl a las rasigas prigondas de l’èime occitan dempuèi lo fin fons de las baumas de Las Caus. E òc, se faguèt mai d’un còp la comparason entre indians e occitans. N’avèm aicí una pròva de mai: nòstres aujòls preistorics, vertadièrs trobadors abans l’ora, cortisavan… las squaws!
 
Mas nos perdèm pas pels camins e las travèrsas de las disgressions per tornar a çò que nos preocupa jorn e nuèit, ivèrn coma estiu: cossí plan acabar un conte e daissar la pòrta dobèrta a l’imaginari?
 
Vaquí doncas, dins aquel esperit novator e tradicional a l’encòp, una tièra novèla de proposicions per clavar un conte:
 
E cric e crac, lancèri un pavat e lo conte es acabat (mai de 68). E cric e crac, escotèri un discors d’Arafat e lo conte es acabat. E cric e crac, metèri a cuèire lo tomatat e lo conte es acabat. E cric e crac, prenguèri l’avion/lo batèu per Rabat e lo conte es acabat. E cric e crac, lo prat es auserdat e lo conte es acabat. E cric e crac, l’òrt es asagat e lo conte es acabat. E cric e crac, partiguèri a l’infinit e lo conte es plan finit. E cric e crac, ba diguèron al jornal parlat e lo conte es acabat. E cric e crac, vos cal pas èsser desconsolats que lo conte es acabat. E cric e crac, l’anís es estelat e lo conte es acabat. E cric e crac, soi desolat, mas lo raconte es plegat. E crica e craca, l’istòria torna dins sa saca. E crica e criquet(a), l’istòrieta torna dins son saquet/sa saqueta. E cric e crac, vos podètz vestir pel bal costumat que lo conte es plan acabat. E cric e crac, se rescaufa lo climat e lo conte es acabat. E cric e crac, vos ai pas enganat,mas lo conte es acabat. E cric e crac, los uòus son coats, lo conte pòt començar (La galina). E cric e crac, torna-me çò que m’as panat e lo compte serà acabat. E cric e crac, lo capèl l’ai panat e l’ai pas pagat e lo conte es acabat. E cric e crac, lo capèl l’ai pagat e l’ai pas panat e lo conte es acabat. E cric e crac, ser de luna mercruda, la dent crusa, farai sabat e lo conte serà acabat (la bruèissa). E cric e crac, ara l’ostal es embruèissat e lo conte es acabat. E cric e crac, a l’unanimitat, decidissi que lo conte es acabat. E cric e crac, lo passat es (subre)compausat e lo conte es acabat. E cric e crac, dalhèri lo prat e lo conte s’acabèt tot solet. E cric e crac, passèri al mercat e lo conte es acabat. E cric e crac, lo lençòl (las mitonas) l’an plegat e lo conte es acabat. E cric e crac, lo chaval a galaupat e lo conte es acabat. E cric e crac, lo gos a jaupat e lo conte es acabat. E cric e crac, lo conilh/lapin a tot rosegat e lo conte es acabat. E crac e cric, aurelha de lapin e alas de kiwi, lo conte es finit. E cric e crac, al pibol traucat,lo cocut i a nisat e lo conte es acabat. E cric e crac, lo blat es segat e lo conte es acabat. E cric e crac, lo blat/lo camp l’ai/l’an semenat e lo conte es acabat. E cric e crac, lo rasim es vendemiat e lo conte es acabat. E cric e crac, lo vin es tirat e lo conte es acabat. Ecrac e cric , lo vin l’ai engolit elo conte es finit. E cric e crac, lo gat a miaulat/romiat e lo conte es acabat. E cric e crac, la galina/pola d’Astarac es negra e lo conte es acabat. E cric e crac, lo menaire me ven quèrre en Cadilhac e lo conte es acabat. E cric e crac, lo diable es coaforcat e lo conte es acabat. E patric patrac, se volètz pas un còp de trica, tiratz-vos d’apr’aquí! E cric e crac, l’ase a bramat e lo conte es acabat. E cric e crac, Mèstre Ali Borron a bramat e lo conte es acabat. E cric e crac, lo rat a lepat lo plat del gat e lo conte es acabat.
 
 
 
 
Cric-cracaire Roch
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article