Lo dimenge de matin manqui pas jamai Rencontre à XV, l’emission de France 2 sus lo rugbi. Encuei, l’i sieguet un reportatge sus la còla de Laruns, vilatge de la valada d’Ossau, budget mai pichon de Federala 3 embe 100 000 euros, que lucha per si mantenir. Aneriam a l’escasença en cò de dos pastres, l’un cepon l’autre mièg de dubertura que lei jorns de match van móser lei sieus fedas d’ora, entre 5 e 7, per si poder puei jónher ai sieus coequipiers. Es lo rugbi qu’aimi. Lònga mai a Laruns en Federala 3...augi pas esperar per elei la Federala 2.
 
Agachèri puei l’emission sus lo Bodisme que nos aduguet dins un mostier, de Peirigòrd vèrd, que l’avián abandonat de monges catolics. Paraula sieguet balhada a de bonz e bonzessas francofònes que butèron l’accent sus l’importància dau liame entre leis umans e la natura. An fondat un luec de preguiera e de meditacion onte lo bòsc senhoreja, en armonia embe l’espaci que leis enròda.
 
Mi diretz puei qué idèia de part dei cervèus de France 2 d’encadenar rugbi e bodisme e vos respondrai, vos trompatz. Lei dos partejan mantunei valors.
 
Rescontrèri recentament Daniel Herrero au Comedia au Morilhon (a Tolon, de segur) que baileja lo nòstre amic comun André Neyton. Li demandèri çò que pensava de l’estadi de rugbi nòu dau Racing 92 a La Défense. Es còntra, de fons, per eu l’Arena es una sala d’espectacle que desnatura l’esperit dau rugbi. L’èrba, la tèrra, lo vent, la pluèia son necites a’n aquest espòrt que la natura n’es au còr.
 
Rugbi e bodisme butan en avans lo despassament de se, la necessitat de contrarotlar seis impulsions, lo besonh de menar una vida armoniosa en còla. Es verai mai que mai embe lo bodisme dau Veïcule Pichon que fa la part bèla a la vida comunautara dins lei pagòdas e lei mestiers. Mantuns entraïnaires dau Top 14 que poguèri auvir mi faguèron pensar a de gorós.
 
La diferéncia màger entre lei dos ven de la dietetica. L’i es pas de terç mièg-temps aigada en cò dei bonz.
 
Daniel Herrero, tresena rega ala dau RC Tolon puei entraïnaire d’aquesta còla que menet a la victòria en campionat es encuei jornalista legit e escotat dins lei mèdias nacionaus.