Ma tòca prefonda era qu’un jorn l’Aupenc siai parlat dins tot lo departament. Coma era quasi plus parlat dins las familhas, ai pensat que lo biais melhor era de faire passar aquel aprendissatge per l’escòla publica. Mai era quasi impossible d’aguer un dialògue amb l’Educacion Nacionala.
 
Se troba qu’en 1995, l’achamp generau de l’I.E.O. Nacionau se debanec a Gap. Fuguec d’escasença d’inaugurar l’Espaci Occitan oficialament. En marja d’aquela A.G., Joan-Loís Blenet (president de la Confederacion Calandreta) e Bernard Vaton (president de la Calandreta d’Aurenja) nos an demandat de crear una Calandreta a Gap. Aquò permetriá de crear una Federation e d’aguer de subvencions de la Region. E l’afaire es partia. Nos chaliá un regent e fuguec Peire Eirisson que fuguec lo prumier. L’ajua mairala fuguec sa sòrre Elisabet (?). Per lo locau avem demandat a la Comuna de nos lojar. Fuguec fach leu e l’escòla a poscut intrincar amb 5 o 6 calandrons.
 
Au meme moment (quasi) deviam elegir la còla municipala. Se troba qu’aviáu creat l’associacion de mon quartier vengüa Centre Sociau. Lo conse, Pierre Bernard-Reymond, voliá crear d’autres centres sociaus dins d’autres quartiers e m’a demandat de venir sus sa tiera. Li ai respondut que politicament ero pas ben d’acòrdi amb eu e ai demandat un temps de reflexion e m’a respondut que li chaliá la respònsa per l’endeman. Ai telefonat a Bernard Vaton que m’a dich que chaliá l-i anar en demandant, en contrapartia, de lojar la Calandreta. Ai donc acceptat en disent ma condicion que fuguec acceptaa sul pic. E es coma aquò que la Calandreta Gapiana es lojaa a l’anciana escòla dau maseu de Sant-Joan. Aüra l’escòla compta doas classa, una mairala e una primària, amb un quarantenau d’escolans. L’aprendissatge de l’Aupenc l-i es mauaisat. Actualament, li a una regenta sus dos que parla la lenga e qu’enterven dins las doas classas. Es ieu que l’ai formaa a la lenga. Dòno de corses a la segonda. E las doas an la volontat de faire passar la lenga. D’autra part, la còla dels parents es a fons dins lo projecte. Nos chau solament trobar una autra regenta per venir pron solides.