Per empachar l’intrada illegala de migrants, la polícia grèca reconeis aver installat dus canons acostics a la frontièra turca.
 
L’estatut d’aqueles canons, armas non “letalas” (que tuan pas), es çaquelà fosc: produsisson pas destruccions visiblas e doncas impossibles de quantificar e de poder dire se respèctan lo principi del dreit de la guèrra de proporcionalitat entre los mejans e l’objectiu; de mai utilizada pels Americans autan plan pendent la guèrra en Iraq coma per dispersar una manifestacion, apartenon al domeni civil coma al militar.
 
Aquelas armas pòdon capelar tota una zòna coma ciblar pas qu’una persona a 500 mètres de distància. “Candas”, daissant pas nafraduras visiblas, fasent pas rajar la sang, son sens dangièr? Un especialista american del son afortís que lo volum del son, que pòt pujar a 160 decibèls, produsís un truc e una dolor intensa a l’aurelha intèrna, sens parlar de la paur que s’installa dins tot lo sistèma sensorial. L’experiénçia pòt èsser traumatica estant que s’agís d’una ataca impossible de contrarotlar e de se’n defendre. Las consequéncias fisicas pòdon èsser importantas: venas qu’espetan, palmons e sinusses damatjats. Mas aqueles efèctes an pas encara fait l’objècte d’estudis prigonds.
 
“Se compreni plan —diguèt lo Guston al nebot que li comentava l’emission que venián de gaitar—, utilizan a una pòrta d’Euròpa una arma de guèrra que n’es pas una oficialament, que los efèctes ne son pas estat estudiats prigondament, contra de paures bogres, òmes, femnas, mainatges, caçats d’en çò siu per la misèria, la guèrra, o una dictatura. E los meteisses que se regaudisson d’aquela barrièra a una de las nòstras pòrtas, trapavan escandalosa la muralha que los Americans bastissián a la frontièra mexicana!”