CAPCALERA: la botiga

Jornalet, gaseta occitana d'informacions

Divendres, 5 de març

Eric Gonzales

Dijòus, 24.11.2016 03h00

Jacques Julliard, la Republica vielha


Comentaris 7 comentaris    
Dolent Fluix Bo Molt bo Fabulós (10 vòtes)
carregant En cargament


Cronica publicada en agost passat dins Le Figaro
© www.lefigaro.fr




Etiquetas
gonzales, islamofobia, juliard, racisme, racismegonzales

Despuish trenta ans Jacques Julliard que’ns parla de Republica, perdon, de République, puishque de segur, lo sens qui ua partida de la classa politica e mediatica francesa e da ad aqueth mot ei de mau arrevirar e va mei enlà qu’un nom de regime politic.
 
Ueratz-lo, adara, e après aver escriut sus Le Nouvel Obs e Marianne, a har-s’i suu Figaro, com dens aquesta cronica publicada en agost passat.
 
Sus la fòto qui va dab l’article, que ns’apareish envielhit, embohit, essajant, davant la soa bibliotèca e dab lo son aire seriós, de dà’s l’aire noble d’un gran intellectuau guardador de las valors de la França etèrna, la de 1789.
 
Que ns’apareish triste, tanben. La soa Republica, la concepcion qui n’a, qu’ei autan vielha com ne pareish eth aquiu. Que repepia: la Republica, la laïcitat pervertida dinc a concernir l’usatge public d’autas lengas que lo francés o lo dret tà ua hemna de portar lo veu pertot on l’agrade.
 
Que comença hòrt: “Il y a un problème de l’islamo-gauchisme.” E i auré totun un problèma de l’islamofobia? Que non! Legetz-lo afirmar shens perperejar: “Il est singulier de voir ces âmes sensibles s’angoisser des progrès de la prétendue “islamophobie”, qui n’a jamais fait un mort, hormis les guerres que se font les musulmans entre eux.” Per delà la maishanta fe qui consisteish a assimilar los conflictes enter sunitas e shiitas a l’islamofobia, çò qui m’a hèit tressautar qu’ei l’argument que ne n’i a pas avut nat mort per’mor de l’islamofobia. Açò qu’ei a archivar e probable, malurosament, a tirar de la memòria deu Web un dia o aute: entà Jacques Julliard, l’islamofobia qu’existirà —lhèu!— quan i aja, en Euròpa, musulmans tuats per’mor de la lor religion…
 
Qu’ac compara dab las persecucions patidas peus crestians d’Orient. Malaja, quan las a denonciadas, eth, senon adara, entà se’n servir com argument entà relativizar, sordeish qu’aquò, negar l’islamofobia?
 
Shens solament perdonà’ns ua ataca contra los bobos, classic deu genre gratapapèr parisenc e de l’exclusivisme d’aqueths miei-intellectuaus, que hè servir l’arma de la maishanta fe (“… l’islam est le parti des pauvres, comme ils le prétendent? Je ne crois pas un instant à ce changement de prolétariat. Du reste, allez donc voir en Arabie saoudite si l’islam est la religion des pauvres.”), lo procès de broishas pròche de la difamacion (“Je constate plutôt que l’islamo-gauchisme est né du jour où l’islamisme est devenu le vecteur du terrorisme aveugle et de l’égorgement.”), la crida aus psicanalistas entà qu’expliquen las posicions deus sons adversaris, e, com se n’èra pas pro, seguint los pas deu Front National e deus fascistoïdes de l’UMP, que’s descobreish defensor deu cristianisme (“Ils [los islamofòbes] ont abandonné la laïcité, mais ils ont conservé l’anticléricalisme. Pis, l’antichristianisme.”).
 
Ací, que volerí precisar ua causa: ua partida de l’esquèrra qu’ei enqüèra cristianofòba, qu’ei vertat. Mes qu’existeish tanben enqüèra, e plan viva, tota aquera esquèrra au còp cristianofòba e islamofòba, dab, au capdavant, lo tròp celèbre Charlie Hebdo. Aquò, qu’ac cau brombar, puishque lo noste navèth defensor deu cristianisme n’ac hè pas.
 
Que caleré tanben explicar longament que la defensa deus drets deus musulmans dens las societats occidentaus n’ei pas, de segur, ua adesion a las valors de l’islam o aus sons dògmas. L’amalgama practicat ací que va tant enlà que ne seré pas inutile. Mes tà qué? Jacques Julliard que continuarà a predicar la Republica vielha, la sembla-laïcitat desaviada, l’òdi a çò de musulman, de basco e d’occitan, la denóncia deus bobos, que continuarà de repepiar, uei suu Figaro o aulhors, doman lhèu suu bulletin de Riposte laïque, e nosautes tant qui’u legeram qu’espravaram lo medish hasti. A nosautes, que’ns convéncian aqueras polemicas repetidas que la sola faiçon, e lhèu la sola rason, de prepausar ua alternativa mobilizadora en vistas de construsir un país libre qu’ei de s’escapar de la deriva xenofòba e fascizanta de la França. Per tant qui s’ondre de valors “republicanas” e “laïcas”.
 
 



Jornalet es possible gràcias al sosten economic e jornalistic dels legeires e benevòls. Se podètz sosténer en venent sòci dels Amics de Jornalet o de l’associacion ADÒC, contribuiretz a far un mèdia mai independent e de melhora qualitat.
 



publicitat
BANNER1: IEO Arièja



Comentaris

26 de novembre 09.23h

#6 Vos caleré precisar se vòsta intervencion es au purmèr o au dusau grad.


Valora aquest comentari:   votar positiu 5   votar negatiu 0
Respondre comentari replica Comentari inadequat   Formulari d'abús de comentari

25 de novembre 14.32h

A ieu m'agrada fòrça que i auja una fòrta comunautat musulmana en França perqué amb els, anam tornar a de valors virilas coma dau temps del catolicisme vertadièr d'abans Vatican 2. An encara de valors religiosa e nos van ajudar a tornar a mai de morala familiala, sexuala e patriarcala. Soi plan content que la comunautat musulmana, per exemple, sia contre lo maridatge dels omosexuaus e contra la femenisacion de la societat. An e auràn un pes social de mai en mai important dins nòstre pa... Legir la seguida


Valora aquest comentari:   votar positiu 0   votar negatiu 16
Respondre comentari replica Comentari inadequat   Formulari d'abús de comentari

25 de novembre 10.02h

moussú E. G. que doblida que los sons rasonaments e seràn lèu los d'un òme vielhit, escrusiu, etc. Entà parlar mei seriosament qu'auré poscut escríver que moussú Julliard o la soa pensada èran d'un epòca passada. S'enganar o escríver o díser peguessas n'es pas reservat a las blondas ( dens las istòrias que lo mone contan) !


Valora aquest comentari:   votar positiu 6   votar negatiu 5
Respondre comentari replica Comentari inadequat   Formulari d'abús de comentari

24 de novembre 16.46h

Sénher Gonzales, volètz que vos disi ? Sètz pas qu’una missanta lenga. D’autres o sabon reconéisser, lo meriti de Julliard :
http://www.acrimed.org/A-Jacques-Julliard-l-oligarchie-reconnaissante?recherche=julliard


Valora aquest comentari:   votar positiu 3   votar negatiu 1
Respondre comentari replica Comentari inadequat   Formulari d'abús de comentari

24 de novembre 15.07h

Òsca Eric, un article daus bons, n'i a pro aura que sian totjorn los mesmes que s'esbramelan dins la societat e dins los comentaris de Jornalet, quò lor fai dau ben aus fachos que vesan que nos laissaràn pas far, quilhs vielhs borges cafauds enorgulhits de lor senta Republica, los volem pus veire.


Valora aquest comentari:   votar positiu 17   votar negatiu 11
Respondre comentari replica Comentari inadequat   Formulari d'abús de comentari

24 de novembre 11.48h

amirable aquel argument ad hominem ! un ome vielh bodenfle ! ren que de lo veire, me pensi que dèu patir d'aquelas grossas malautiá que se combaton amb de remedis que te fan venir gonfle e bofeti coma Pompidor que ne moriguèt. per ieu, ei mon amlc e collèga Sant-Joan Boca d'Aur que parla quora eu duèrbe la boca, coma poguèri me n'avisar dins una tribuna de LCI amb Luc Ferry onte avià ren perdut de son intellect. E vaqui lo jornalet que idola amb lei lops e vou engabiar Jacques Julliard ... Legir la seguida


Valora aquest comentari:   votar positiu 7   votar negatiu 23
Respondre comentari replica Comentari inadequat   Formulari d'abús de comentari

24 de novembre 07.54h

Avètz vertadierament besonh de criticar l'aspècte fisic d'un òme ("que ns'apareish envielhit, embohit etc") per afortir que sas idèas son pas bonas?


Valora aquest comentari:   votar positiu 17   votar negatiu 6
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Eric Gonzales

Eric Gonzales logo rss

Eric Gonzales, licenciat en istòria e lètras classicas, escrivan, editor e traductor. A l’òra d’ara, que tribalha com expèrt a l’Institut Occitan d’Aquitània; qu’ei tanben membre deu Conselh lingüistic deu CPLO.

mai d'informacions

contactar l'autor

Categorias

Las mai...


Mai d'articles

Archius




D'autres articles


Jornalet, gaseta occitana d'informacions