Dimècres, 3.9.2014 03h00
D’un costat
Rencontrèrem los responsables de la cultura de la ciutat de Bordèu…
— “La cultura occitana? Aquò’s l’ahar de Tolosa…”
La soscada es simpla: una ciutat de la talha de Bordèu diu aver per atirar, quauques caractèris que li son pròpris. Duas ciutats vesinas (e mei o mens concurrentas) non pòden pas, solide, partejar lo medish imatge. Tolosa es l’occitana, Bordèu diu trobar quauquarren mei.
— “Imaginatz”, —me dishut lo sénher conselhèir—, “qu’afiquim a Bordèu la crotz de Tolosa!”
N’avè pas totalament tòrd lo mossur: la bandèra occitana es çò purmèir la de Tolosa. Nos damòra, nosauts, bordalés de tornar gahar l’istòria e la lenga gascona nòsta, atau de bastir una identitat bordalesa que serà, solide, occitana en tot damorar la dau parçan: Tolosa capitala occitana e Bordèu capitala gascona?
Lo nòste conseilhèir pareshèiva pas briga convençut…
Lo vielh occitanisme de las annadas passadas, lo que centrava la cultura d’òc a l’entorn de Tolosa, lo que tornava definir una nacion a la francesa en partir dau Lengadòc s’enclosquèt dens los quites caps daus conselhèirs bordalés!
Egau, dens la beutat tornada, la ciutat torna gahar tanben la sua istòria: lo moviment es lent, coma un desvelh de longa, mes s’impausa, chic a chic… “Gascon de Bordèu” es vasut l’eslogan daus oficis de Torismes dau sud de Gironda! Una ideia qu’es a s’espandir.
I seràn los occitanistas?
De l’aute costat Puirim esperar que las conquistas passadas de la cultura nòsta ajudin aquest caminament de l’identitat bordalesa: un occitanisme de uei, bastit sus l’identitat d’Aquitània en tot portar l’ideia simpla de l’unitat culturau nòsta.
Mes la cultura occitana sembla húger Bordèu:
— La Region Aquitània paga per apitar un institut navèth de desvelopament de la cultura occitana….a Tolosa!
Aquí de que portar pèira au casau dau nòste conselhèir bordalés!
— L’Universitat de Bordèu, deishèt d’ensenhar l’occitan en tot miar los estudiants de cap a….Tolosa!
Atau d’ensenhar la cultura gascona de Bordèu?
— L’associacion Òc-Bi, probabla alaissada de tant de mauescasudas sus Gironda, desvira son shèiti de cap a…Tolosa.
— De fèiçon mei generau, l’ensenhament de l’occitan es a morir docetament au grat de las barraduras regularas daus cors, e aquò dens l’indiferéncia.
Qui mena la batalha en Gironda? Lo vam occitanista sembla d’eishivar lo nòrd e la rencontra dab lo navèth espeliment de l’identitat girondina es mei que temeruc…
L’Occitània de doman serà donc shens Gironda?
L’espeliment de l’identitat locau es un fenomèn generau a l’escala de l’Euròpa tota: Bordèu n’i escaparà pas, dab o shens l’occitanisme.
Comentaris
11 de setembre 19.47h
Qu'èri dens las arènas entà cantar Agur Jaunak a la fin de la corsa de taurs e de las hèstas de Dacs. Mes qu'avèvam abans cantat Se canti, perpausat per la "banda" locau Los Calientes, abans d'anar junher los autes grops. La banderòla deus Calientes, qui cambia cada annada, es escrita en gascon dempuish quauquas annadas. La banderòla deu "Chocarrerros" (de Sent Pau de Dacs), que demòra cada annada la medisha, qu'a la "crotz occitana" sus un costat. A l'estanquèt "lo Pit", son milierats... Legir la seguida
Valora aquest comentari:
2
0
8 de setembre 18.01h
Ohlala lo pensament es cortet ençò de quauques comentaris e plan perdent dens l'esperit...Perdiu e diu vivant sem pas prest d'anar se pelejar per la lenga nòste d'un biais eficaç.
Valora aquest comentari:
2
0
4 de setembre 21.09h
Mercèi Gabriel per aquesta perlongacion de la soscada. Que hèi plaser.
Istòrieta : Dimenge passat, dens l'encastre de la campanha toristica "Gascon de Bordèu" a Lengon, Gric de Prat a hèit cantar "Se canti", e lo monde n'era esmauvut dinc a las lagrimas...
A nosauts de jogar la particion nòsta.
Valora aquest comentari:
9
3
4 de setembre 18.24h
Mès qui donc se pòt estonar que l'occitanisme fonciona pas en Aquitània? Per la fin de la feria de Dax tota l'arena qu'a cantat "Agur Jaunak" dab un estrambord e ua emocion que son pas de créder. Que'vs poish diser que l'Occitània condèva per pas arren. Mès que la "Vasconia" èra pregonament presenta hens los esperits.
Solide n'es pas lo cas de tots los aquitans, mès los gascons a navanta per cent e son davant tot gascons...o se'n foten, pr'amor lo cambiament massiu de populacion aviat ... Legir la seguida
Valora aquest comentari:
4
1
4 de setembre 11.05h
#11
Au segur. Malurosament, l'occitanisme (de Gironda... e d'alhurs ?) contunha sustot a mochar la faça folclorica de l'occitanisme reservat aus occitanistas e s'aucupa pas de la transmission intergeneracionala, conclusion interéssam sonque los que son dejà interessats.
Valora aquest comentari:
9
1
4 de setembre 10.11h
#10 E per de qué pas, simpletament, faire lei doás ?
Valora aquest comentari:
4
1
3 de setembre 19.41h
Pensi que per hèser revispolar l'òc dens la CUB (disi pas "en Gironda" percé que les situacions son pas pertot identics) fau :
- li balhar una presença, benlèu discreta mès continua, dens los mediàs los mèi lugits (autament dit, Sud-Ouest, demb una cronica setmanèira coma dens les Lanas, per exemple; e benlèu de jornaus gratuïts) e entenduts (France Bleu Gironde, e am dejà La Clé des Ondes)... Mès sustot : pas parlar D'occitan dens aqueras cronicas e emissions (coma s'hèi sus L... Legir la seguida
Valora aquest comentari:
10
2
3 de setembre 16.55h
Se tirar los uns dels autres fins a se tirar los uns sus los autre! Aquò qu'es digne! Que la(s) cultura(s) nostra(s) se precipita(n) d'esperala(s) cap al trau negre!
Valora aquest comentari:
3
0
3 de setembre 16.28h
Tròbi que los comentaris mancan de hautor e vista larga ! lo monde ne sembla pas compréner l'enjòc politic mei londanh. N'avançaram pas dab aquèth esperit estequit.L'article de l'Eric ne dit pas jamei qu'èi la fauta de Tolosa e deus Tolosans...Mes pensi que l'occitan de Gironda se harà shens los occitanistas de Tolosa.
Valora aquest comentari:
7
3
3 de setembre 16.26h
La respòsta dau juppé-boy mòstra pas solament son chauvinisme e son incultura (e, de tot biais, sa chausia de pas privilegiar una cultura que risca pas de passar sus France-Cu o F3 locau a la bona ora, e que rapòrta ren, d'abord qu'es portaa ni per un gran editor, ni per una major dau disc o de la video). Manifesta tanben un perilh grand per nosautres : las chausias estrategicas en termes d'identitat locala dels diverses feudaus regionaus. En Provença, la Region vòl auvir ren que de prove... Legir la seguida
Valora aquest comentari:
15
10
Comenta
Lo comentari es estat mandat corrèctament
13 comentaris
En cargament
13 comentaris
Mandar
