CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Dijòus, 19 de setembre

Eric Roulet

Dimècres, 17.9.2014 03h00

La lei dau silenci


Comentaris 3 comentaris    
Dolent Fluix Bo Molt bo Fabulós (6 vòtes)
carregant En cargament


Dròm nineta, dròm lo jai que s’en va
Emb pair e mamà
Lahòra a  la mar
On son los vaishèths ribandats d’estelas (…)
Lo jai  que te mauta e sap te har ríder
D’enlà que te crida:
— Hòu! Nina cherida
Auràs quauquarren quan torni lo flòt (…)
Un vaishèth d’estaca emb d’ un blanc velòt
O’n clancon ludent on lo pèugue ronga (…)
 
Los angèus que hèn plaps en aubrir las alas
Per çò d’abrigar los nins desmairats.
 
 
Adrien Dupin
(Canta per la nina)
 
 
 
Engoan encara, sembla que son dus cors d’occitan que son a desaparéisher en Gironda e en Òlt e Garona….
 
Disi plan: “sembla”, que la causa se passa dens lo silenci de las manòbras administrativas. Se per malastre, demandatz çò que se passèt, la responsa serà, com tostemps: manca de mainatges!  Manca de professors! Solide, i avot pas nat aperèt davant la barradura, nada colaboracion dab los parents, los volontaris, e de faiçon generau, dab la populacion….
 
Embarrats dens lo secret, los responsables de l’ensenhament de l’occitan: admnistracion, establiments escolars mes, a còps tanben,  las associacions manòbran lo silenci coma una arma. Per mihor héser desaparéisher lo chic que suberviu?
 
Coratge los amics!  Damòran pas sonqu’un o dus licèus e un tot petit nombre de colègis en Gironda!
 
Coratge los amics! Cinc o shèis mauescasudas de duberturas de classas bilingüas dens tota Gironda acaban de héser compréner a tots que la lei dau silenci tostemps que ganha: i aurà lèu nada rason de mei d’estujar las causas, digun assajarà pas mei. La classa bilingüa serà passada de las memòrias.
 
Dromitz de plan, petits occitanistas! Son los elegits, los especialistas e los experts per susvelhar lo vòste som. It’s no use to wake up, guys!
 
“Dròm nineta, dròm!” E quan desvelhis, trobaràs sau capsèir un beròi “Ofici de la lenga”, apitat tot de nau per las regions Aquitània e Miègjorn-Pirenèus, un present tot pensat en davant per tu, atau de t’eishivar lo mau de soscadèra…
 
Repotegas pas, petiton! T’aufriran engoan encara un hestenau a gratis, atau de milhor breçar lo dromir.
 
E dròman, los occitanistas! Digun demanda pas arren, digun respon a pas arren, digun repotega. Las questions son pas jamei pausadas de tant que la lei dau silenci acabèt d’atudar tota contesta.
 
A cada espectacle de Gric de Prat,  sentim pujar l’emocion dens lo public: l’estacament a l’identitat nòsta damòra viu, mes londanh! Sovent, son los planhs dau  casau secret dau mainatge, coma una causa passada que pas jamei tornarà. Qui puiré imaginar que la mòrt puiré estar eishivada?
 
Qui pòrta la paraula dau renaviu possible? La lei dau silenci acaba de héser morir l’esper de tornar gahar lo temps.
 
Trencar la lei dau silenci, seré demandar au pòble de participar a la soa istòria, egau!



publicitat
BANER1-2-3: DGPL TRADUCTOR



Comentaris

23 de setembre 14.25h

*Londanh: Barbarisme probable digut a una meishanta escritura de l'òc medieval http://losarmoneir.unblog.fr/2014/02/21/los-mots-fatigants-a-lugir-e-ad-entender-en-co-deus-occitanistas-nord-gascons/


Valora aquest comentari:   votar positiu 0   votar negatiu 6
Respondre comentari replica Comentari inadequat   Formulari d'abús de comentari

17 de setembre 13.35h

Duas remarcas :
1- I a probable ren ad aténder de l'administracion francesa, adara ec sàbem.
2- Se l'òc n'atira pas les gents, benlèu qu'aquò's percé que l'occitanisme diu tornar pensar son imatge... I a globalament tres tipes de gents :
-a- Los militants occitanistas : aqueths, son déjà dens lo movement,
-b- Los que s'en foten (son pas d'aci, o se vòlen "modèrnes", o son de la dreta dura, etc. etc.) : aqueths, i a ren a hèser,
-c- Los que son estacats a lurs rigadas : per exemple, d... Legir la seguida


Valora aquest comentari:   votar positiu 10   votar negatiu 3
Respondre comentari replica Comentari inadequat   Formulari d'abús de comentari

17 de setembre 07.45h

"Reporteras pas": repotegues?


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL TRADUCTOR

Perfil

Eric Roulet

Eric Roulet logo rss

Creator, compositor e contaire de la companhia de musica occitana Gric de Prat. Pedagòg e especialista en educacion. Es adara musician e professor d'occitan

mai d'informacions

contactar l'autor

Categorias

Mai d'articles

Archius




D'autres articles


Jornalet, gaseta occitana d'informacions