Dissabte, 30.12.2017 03h00
Una peticion occitanista, doncas provençalista
Al moment que vos escrivo aquestas linhas, me regaudisso fòrça de la reüssia d’una peticion bandia sus change.org. Uei mai de 5000 personas an signat en favor dal nom "Provença" per l'actuala "PACA" que las autoritats regionalas li vòlon atribuir la marca "Region Sud" dins l'espèr que la gent li dijan ansin dins l'usatge corrent.
La peticion sòrt d'un membre dal Partit Occitan, Hervé Guerrera, e me regaudisso que d'occitanistas prengan l'iniciativa. Se confirma çò que los occitanistas sabèm ja, la defensa vertadiera de Provença la fasèm nosautres, non pas los anticoccitanistas dal Collectiu Provença, que non lor gèina ges la marca "Region Sud". Paur probabla de pèrdre las grassas subvencions regionalas, çò comentaretz...
Fa qualques ans, Iniciativa Per Occitània vouguèc crear un sit apelat "Provençalisme" per afortir l'articulacion estrecha entre la revendicacion de Provença e aquela d'Occitània, perque pensàvem que l'occitanisme assòcia necessàriament çò general e çò local. Malaürosament, en causa de la manca de braces que vos en parlèro la setmana passaa, aquel projècte capitèc mal, mas i penso encara. D'èsser plenament provençal es un mean d'èsser plenament occitan, e aquela peticion correspònd a aquela exigéncia. Per ansin convio chascun a la signar, se o desira.
Provença, una realitat istorica fòrta
Aüra vivo pas en region "PACA" mas al limit administratiu, dins un territòri qu'apertenguèc a l'anciana província dau Daufinat mas que i constato ren una identitat daufinenca marcaa. Ondejan de bandieras provençalas a las intraas de Pèiralata, los panèus pòrtan l'identificacion toristica "Droma Provençala" (en francés), e es un fach que regardam, de Pèiralata estant, vèrs lo sud provençal. Solèm far de crompas de l'autre caire de la frontiera departamentala, dins l'immensa e impersonala zòna comerciala de Bolena. Istoricament, se pòt nieus dire que nòstre territòri se situèc un temps en Marquesat de Provença qu'anava entrò Diés.
Se donc los limits de Provença foguèron, coma totas las tèrras feudalas, chambiaires, "Provença" es una realitat istorica fòrta que va nieus delà l'espaci de la varianta provençala de la lenga nòstra. Se sap per exemple que lo tèrme de "provençal" concurréncia encara, de còps, "occitan" per designar tota la lenga, en particular la lenga anciana, e entre d'autras realitats, una associacion d'artisans, "Terres de Provence", revendica lo tèrme de "Provença" per qualificar tota la region. Nieus la Comtat de Niça, que ne nèo ren l'originalitat istorica degua a sa relacion amb Savòia a la fin de l'Edat Meana, s'apelèc entrò 1526 "Tèrras Nòvas de Provença", e los mai antiprovençalistas de Niça la Bèla son de segur tanben los mai antioccitanistas. Eles creon en un Arc Alpenc amb los savoiards e piemonteses. Que nòstres compatriòtas de Niça se viren vèrs Provença e Occitània, puslèu que Savòia e Piemont, me sembla un vòt coerent amb la volontat occitanista d'aver un projècte comun a l'entorn de nòstra lenga e dal prestigiós remembre de la civilizacion trobadoresca que pòt tanben federar las populacions occitanas alpencas.
Sortir Provença de sas dificultats
Malgrat sa fòrça istorica, Provença concentra per malastre bòna part dals problèmas d'Occitània. Mentre que la region es la mai poblaa d'Occitània e la mai occitana dins sa composicion, La lenga i es globalament febla e pauc ensenhaa, e la division ben conegua entre grafias classica e mistralenca i ajua ren. Los provençals patisson los efieches desastroses dal torisme de massa, de l'especulacion immobiliera, de la consagracion dal territòri a las vacanças e als retirats mai qu'a d'activitats economicas diversificaas que benefícien a totes, amb d'importantas desparietats segon las zònas costieras o montanhòlas. Marselha poiriá èsser una Barcelona occitana, e totun...
Recuperem Provença
Centrala dins lo reviscolament cultural occitan felibrenc, creo qu'es ora que los occitanistas recuperem de tot en tot Provença. Veo dins la question dal nom de Provença non pas una fin, mas un primier pas vèrs una recuperacion ambiciosa de l'identitat provençala, en nom de Provença, en nom d'Occitània.
Revendiquem Provença.
Comentaris
31 de decembre 12.46h
Prepausère dinc un autre coumentari "PROVENCE" ou "PROVENCE - Alpes / Méditerranée".
Ne'n manlevarai uno treseno d'idèio, que l'ai atrapado din l'article dau 31/12/2017 dau segne Laurenç Revèst : "PROVENCE - GAVOTINE". Pense que çai avèn tres causido de trìo, çou me semblo, per noumma l'anciano "PACA"... De qué n'en pensas ?
Per aqueles que pouirièu laissa un coumentari au segne Hervé Guerrera, autou de la peticiu, prepausa-li las tres se n'en sès d'acuord, que n'assavente lous qu... Legir la seguida
Valora aquest comentari:
3
0
30 de decembre 13.34h
Aquò's de bon sens!
Plus generalament, les departaments e las regions administrativas amagan tota la toponimia d'origina, províncias, países, eca...cal restaurar tot aquò dins la senhalizacion dels noms de vilas e vilatges, en precisant província e país..
Les noms de departaments notadament son de noms de rivièras e flúvies, coma se las gents sortèssan d'un cors d'aiga, sens país...
Las gens an dreit a d'apellacions d'origina contrarotlada coma vins e fromatges: AOC, que Òc!
Valora aquest comentari:
6
0
30 de decembre 11.36h
Revendicam tanben lo Massif-Centrau. Un breton avia perdegut un colegui de trabalh e disset: "L'enteramant se faguet dins sa region d'origina ente los noms de luocs se terminan per ac".
Franca pòd pus niar la diversitat culturala de l'exagòna. Darrier son slogan "sem frances; sem la Franca" i a pus ren d'autant mai que la region parisiena a perdegut son poder d'attraccion e qu'un vent de regionalisme bufa a sa periferia. Franca recupera totjorn que çò que se fai e se dich dins l'exag... Legir la seguida
Valora aquest comentari:
6
1
30 de decembre 09.29h
En seguida de l'article d'actualitat del 25-12, aviai soslevat un punt de reflexion. Pensi qu'es bon de l'aver al cap Per far a la lèsta- èstre prèstes per afrontar los que volrian aprofiechar d'aquel nom (apuèi e en relacion amb la nominacion pietadosa d'" Occitanie") per denegar l'occitanitat de Provença;
Mas ara, çaquelà , soi rassegurat . Ne sabi mai de la genesi d'aquela reivindicacion nòva, ai vist qu'es portada per d'occitanistes, la vau signar, en solidaritat amb Provença e... Legir la seguida
Valora aquest comentari:
2
0
30 de decembre 09.15h
Sembla una revendicacion de bon sens.
Presa de posicion (ja anciana) del lingüista Philippe Blanchet.
https://www.youtube.com/watch?v=29xP3SF9LJs
Valora aquest comentari:
2
0
30 de decembre 08.58h
E per la bona annada ? Sarà "Bona annada "région Sud" ? O bona Annada Provença ?
http://hpics.li/e4d1d42
De telecargarsuls esmarfons de mandar e remandar e far virar !
Valora aquest comentari:
1
0
30 de decembre 05.47h
Arribe pas de faire virar lo liam qu'avètz balhat per la peticion... Lo poiriatz pas balhar de nòu ?
Valora aquest comentari:
0
0
1
Comenta
Lo comentari es estat mandat corrèctament e es en espera de moderacion
8 comentaris
(11 vòtes)
En cargament
8 comentaris
Mandar
