CAPÇALERA2: FAI-TE SOCI

Jornalet, gaseta occitana d'informacions

Dissabte, 16 de febrièr

Gerard Joan Barceló

Dissabte, 24.11.2018 03h00

Omenatge au pòble curd... e au confederalisme democratic


Comentaris 4 comentaris    
Dolent Fluix Bo Molt bo Fabulós (10 vòtes)
carregant En cargament


Abdullah Öcallan, cap e fondador dau PKK, presonier politic de l'estat turc dempuei 1999; fòto de 1997
© Version catalana de Wikipèdia




Per un instant, voudriáu quitar nòstra Occitània e sa sòrre e vesina Catalonha per agachar devèrs Curdistan. Me desencusaretz de non èstre pas especialista de la question, de saupre pauc de causas sus aquela nacion de la lenga dau grop iranian. En alestissent l'article, m'assabenti que de saberuts dison que lei curds sarián lei descendents d'un pòble conegut de l'Antiquitat, lei mèdes, e ja leis ellenistas ò leis istorians pensaràn ai famosei Guèrras Medicas qu'opausèron lei grècs coalizats a l'Empèri Pèrsa.

Tornem a nòstra epòca. Lei curds aurián pogut èstre comparables ais occitans s'aguessiam desvolopat nòstra consciéncia de pòble en servant nòstra lenga e nòstra cultura. Coma nosautres, son esparpalhats mai que mai entre quatre estats (Turquia, Siria, Iraq, Iran); coma nosautres jamai non an agut l'astre de s'unir dins una entitat politica que garentigue sa libertat e sa seguretat; coma nosautres, sa lenga coneis una diversificacion dialectala confòrme a son espandiment territoriau.

Mas eles, perque an pas patit lo malaür de l'assimilacion dins un estat centralizaire coma França, sabon encara quau son, mentre que nosautres, reduchs a quauquei miliers, subvrevivèm amb lo tresaur màger dau remembre gloriós mai tròp luenchenc de la civilizacion medievala. Quauqueis uns resistissèm, elei luchan, maugrat l'ostilitat generala que leis envòuta, amb la fòrça d'un pòble. E se nòstra Occitània pareis sovent abstracha, ben talament que d'unei an vougut qu'existiguèsse sus la carta coma region administrativa francesa, Curdistan es ja una realitat concreta per fòrça monde.

Curdistan serà jorn un estat? Quau o saup? Enterin, en Rojava, ja la cadena de television francoalemanda ARTE s'es interessat au projècte de societat curd dins un reportatge: ecologia, democracia dirècta, recèrca de l'egalitat, convivéncia entre comunautats que ne parlam sovent leis occitanistas sensa la viure de verai, tolerància dins una region dau Monde onte lo fondamentalisme musulman e lo jihadisme fanatic son pas luench, e pereu, coma un desfís a l'opression dei societats patriarcalas, de fremas que prenon lo poder e leis armas, valenteis amazonas de nòstre temps. Tot aquò de tot segur s'inspira dau confederalisme democratic que lo revendica lo PKK d'Abdullah Öcallan, òme secutat dempuei 19 ans dins lei presons turcas, mai me pensi qu'es un modèl de la portada universala, quand comprenèm que la necessitat absoluda es de trobar de mejans justs de se governar.

En Curdistan cresi que se podriá miralhar un projècte per Occitània, feminista, ecologista, democratic, egalitari, tolerant, anticentralista, e que lo defendrián volontiers aquelei que se mesfisan de l'Estat.





 



publicitat



Comentaris

29 de genièr 17.05h

Sousteni li Curdes d'Iraq e de Surìo es bou. Soustenï la sècto mièjo-poulitico, mièjo-racketairo d'Öcalan es chicon mai.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

24 de novembre 13.25h

« Tornem a nòstra epòca. Lei curds aurián pogut èstre comparables ais occitans s'aguessiam desvolopat nòstra consciéncia de pòble en servant nòstra lenga e nòstra cultura. »

E cossí o auriam complit, aqueste miracle, amb l'istòria de França subre l'esquina ?

Del temps que s'abausava la supremacia ottomana e que la glòria del país dominant demesissiá al Curdistan, França, al som de son espandida coloniala, teniá la plaça d'una de las principalas poténcias mondialas : de ... Legir la seguida


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

24 de novembre 09.35h

Quò es pas ganhat enguera per los curds. Turquia e Iran que son surtits renforçats per la guerra contre Daesh e donc Israel, visan pas d'un bon uelh un estat curd autonome veire independent.

Que quò vòl dire un project per Occitania, feminista, ecologic, democratic, egalitari, tolerant, anticentraliste?
I a tròp d'adjectifs que son prestas a se divisar e se plumar entre eus. Mielhs vòl dire : a de que sers sciença e technologia si quò es per se plumar, se rivalisar, se far la gue... Legir la seguida


Valora aquest comentari:   votar positiu 1   votar negatiu 8
Respondre comentari replica Comentari inadequat   Formulari d'abús de comentari

24 de novembre 08.07h

Un còp de mai lo GJ nos fai una analisa originala e comola d'esper. Òsca l'amic. E mercé.


Valora aquest comentari:   votar positiu 7   votar negatiu 1
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: 468x60 Aran TV

Perfil

Gerard Joan Barceló

Gerard Joan Barceló logo rss

Lingüista, professor agregat de gramatica e director de la revista electronica universitària Lingüistica Occitana. President de l'associacion Los amics de Jornalet

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions