Divendres, 26.9.2014 03h00
Lo govèrn francés a presentat aquesta setmana un programa contra lo tabaquisme. La mesura estelara es l’imposicion d’un paquet unic e “neutre” per totas las marcas, amb l’objectiu, segon lo govèrn francés, de lo far “mens atractiu, sustot pels joves”.
Dins lo dossièr de premsa de presentacion d’aqueste programa pel periòde 2014-2019, lo ministèri de la santat francés a soslinhat que totes los paquets de cigarretas s’estandardizaràn, del biais qu’auràn totes la meteissa talha, la meteissa color, los meteisses imatges persuasius contra lo tabac, e lo nom de las marcas amb lo meteis tipe de letra e la meteissa color.
Segon lo ministèri, se tracta de copiar l’experiéncia australiana, ont lo paquet unic de cigarretas foguèt adoptat en decembre de 2012. Es a dire, França serà lo segond país del Mond d’aplicar aquesta mesura e lo primièr de l’emisfèri nòrd.
L’objectiu de l’executiu francés es de redusir lo nombre de fumaires un 10% en cinc ans. Dins dètz ans s’espèra que representen mens de 20% de la populacion adulta. De segur, los fabricants de tabac an ja anonciat que reaccionaràn al paquet “neutre” davant lo Conselh d’Estat un còp que se publique lo decrèt governamental. Tanben an menaçat amb l’obertura de procèsses davant lo Tribunal de Justícia de las Comunitats Europèas e davant lo Conselh Constitucional francés. Segon eles, la justícia francesa deu reconéisser qu’amb aquesta mesura l’estat francés viòla lors dreits de proprietat intellectuala, e reclamaràn globalament 20 milhards d’èuros a l’estat francés, una chifra calculada sus la basa d’un informe de la banca BNP Paribas.
E arribats aquí, ieu me demandi tres causas:
a) los ciutadans franceses non son pro madurs per saber eles solets çò qu’es bon o marrit per lor santat, independentament de la publicitat que se faga? los adolescents que non an la majoritat, non deurián èsser susvelhats e protegits per lors parents en lòc d’èsser tostemps protegits sonque per l’Estat?
b) quitament acceptant que lo tabac es quicòm de plan perilhós per la santat dels umans, non deuriam daissar a cadun individualament la causida liura de se vòl o non damnar lor santat? Non es aquò la responsabilitat individuala? L’Estat pòt e deu intervenir quitament contra la volontat de l’individu de s’autodamnar?
c) e, fin finala, non seriá mai simple qu’en lòc de prendre aquestas mesuras esteticas e estatalistas, impausèssem d’impòstes encara mai nauts que los actuals sul tabac, per tal de ne dissuadir la consomacion e aumentar las resèrvas financièras pels tractaments antitabac?
Non sabi pas. E dobti plan. De çò que ne soi segur es que non compreni l’interés addictiu —tant coma lo tabac— de l’estat francés de mostrar cada còp mai que los ciutadans an un papà que los protegís coma de dròlles: la Republica.
Comentaris
26 de setembre 21.10h
#5
Marçal Girbau a agut rason de criticar papà-França puslèu que Papà-estat: l'estat francés a pas vocacion a èsser l'estat d'Occitània. Occitània a pas vocacion de demorar presonièra dins França.
Valora aquest comentari:
8
12
26 de setembre 20.17h
Girbau qu'auré podut díser: "Papà Estat"... Aquera manièra d'incriminar "França" qu'ei un indici d'un nacionalisme "chauvin" qui n'ei pas dit. Brombatz-vse de quan explicava que's calè opausar a la corrida per'mor qu'ei espanhòla...
Valora aquest comentari:
6
4
26 de setembre 17.05h
#3
Òc, solide, conéishem bien aquò en Baisha Guièna. Mès pensèvi a l'introduccion dau tabac, dens l'Ancian Regime.
Valora aquest comentari:
3
0
26 de setembre 15.30h
#2 As auvit parlar de la SEITA ? La fabricacion e la venta dau tabac era monopòli d'Estat d'acianta 1976. As ta responsa, pense.
Valora aquest comentari:
5
0
26 de setembre 12.07h
Aculhi demb plaser aquesta mesura, mès pensi pas que serà fòrt eficaça . Pensi que les cigarretas electronicas son pus judiciosas : en efèit, mème se desliuran totjorn de nicotina qu'es una substància neurò-activa, son exemptas de totas les saloparias a efèit cancerigène desmochat (boidrons, arsenic, amoniac...) o a toxicitat fòrta (HCN, CO...). Aumentar los prètz, benlèu; mès los mèi "addicts" , benlèu que bèth-arremat aimaràn milhor crucar lur moneda puslèu que non pas arr... Legir la seguida
Valora aquest comentari:
3
0
26 de setembre 08.36h
Cambiant radicalament de subjècte, jo me demandi tres causas :
a) Los patrons franceses serián pas capables d'espereles de respectar los salariats sens aquela merda de Còdi del Trabalh ?
b)Acceptant que los trabalhadors son libres dins lor cap, poirián pas acceptar o pas acceptar liurament l'explotacion patronala ?
c)Fin finala, seriá pas milhor de disminuir los salaris per dissuadir de trabalhar ?
Rancòr pel papà-Republica d'aver de leis per nos protegir coma de dròlles !
Valora aquest comentari:
19
0
1
Comenta
Lo comentari es estat mandat corrèctament
6 comentaris
En cargament
6 comentaris
Mandar
