CAPÇALERA: CONGRÉS AMIC
CAPÇALERA2: FAI-TE SOCI

Jornalet, gaseta occitana d'informacions

Divendres, 18 d'octòbre

Marçal Girbau

Dijòus, 6.9.2012 03h00

La(s) question(s) de l'identitat (V): la catalanofilia del pòble occitan, la catalanofobia de cèrtes que se voldrián l'elit, e los sénhers feudals


Comentaris 21 comentaris    
Dolent Fluix Bo Molt bo Fabulós (45 vòtes)
carregant En cargament


Dimars de la setmana venenta serà 11 de setembre, aquò's la Diada Nacionala de Catalonha. Dison qu'ongan serà una Diada especiala, per amor de la granda manifestacion que se prepara. Òc, que parli de la manifestacion independentista convocada per l'Assemblea Nacional Catalana, qu'aurà coma eslogan "Catalonha nòu estat d'Euròpa". La manifestacion comptarà amb lo sosten de la màger part d'associacions de la societat civila catalana, coma Òmnium Cultural. Tanben recebrà lo sosten de la màger part de partits politics catalans: Convergéncia, ERC, Iniciativa e Solidaritat i seràn, del meteis biais que tanben i serà qualque representant socialista, malgrat non aver lo permís de la direccion del sieu partit. La dissidéncia politica es tostemps quicòm de trist e penós, mas es tanben a l'encòp una mòstra de dignitat umana e intellectuala. Coratge, doncas.  
 
Mas ieu sabi d'autres que tanben seràn a Barcelona per sostendre la manifestacion. Parli del pòble occitan. Òc. Soi convençut que, coma ieu, vosautres tanben coneissètz fòrça occitans que davalaràn a Barcelona per apuejar la manifestacion. L'autre jorn èri al mercat d'Agen e l'amic que me vend los perseques me diguèt: "escota amic catalan, sabes que sèm a organizar de carris per anar totes amassa l'11 de setembre a Barcelona?". Agen - Barcelona son mai de 1000 quilomètres e 90€ de peatge, foguèt la primièra causa que pensèri. Mas tot bèl just après, mentre li preniái un pòt de confitura naturala de las bonas, interpellèri l'amic per li demandar cossí sabiá que i aviá aquesta manifestacion tan importanta a Barcelona. "Pel Jornalet! O ai legit sul Jornalet e me soi dit que i deviam anar! Cal èsser al costat de Catalonha. Sèm lo meteis pòble occitans e catalans!", me respondèt. 
 
E foguèt aquí que me diguèri que los que collaboram pel Jornalet non sèm benlèu encara pro conscients de cossí aqueste modèst mèdia de comunicacion es a cambiar completament l'univèrs simbolic e la gestion de l'informacion de la societat occitana. Es a dire, non pensi pas qu'ara lo pòble occitan siá mai catalanista qu'abans. Non es pas qu'ongan i aja mai d'occitans que vòlgan anar a la manifestacion que d'autres còps perque ara los occitans sián venguts independentistas catalans tot d'un còp. Non. Non a cambiat granda causa per çò qu'es del sentiment d'amistat occitano-catalana del pòble occitan. La question es, simplament, qu'ara, per primièr còp, lo pòble occitan, qu'istoricament a tostemps sostengut –e sosten– las reivindicacions catalanas per de rasons d'afrairament, ara, doncas, lo pòble occitan gaudís d'un mèdia de comunicacion qu'explica als occitans e d'un punt de vista occitan qué se passa a Barcelona. Ara l'informacion non demora pus sequestrada ni dosificada. E lo pòble agís conseqüentament. D'un biais natural. Exactament amb la meteissa naturalitat que fòrça catalans legisson regularament lo Jornalet, sens se pausar mai de questions. Vos dirai que coneissi mai de catalans que legisson regularament lo Jornalet que non pas, per exemple, de catalans que legiscan regularament un jornal andorran, malgrat qu'Andòrra siá un Estat culturalament catalan! Mercés al Jornalet, assistissèm al bastiment dels pilars d'una vertadièra societat de l'informacion occitano-catalana. Çò mai important, çaquelà, es qu'aqueste bastiment es a se far sens cap de ierarquia clientelista impausada. Aquí, degun non pòt menaçar lo Jornalet de li traire de subvencions se se publica una informacion que non interèssa a qualqu'un, entre d'autras rasons perque, sàviament, la direccion del Jornalet decidiguèt dempuèi lo primièr jorn de projècte non acceptar cap de subvencion. 
 
Curiosament aquesta recuperacion de l'amistat occitano-catalana del pòble es proporcionala al desvolopament cada còp mai preocupant d'una catalanofobia sentida e practicada per una cèrta "classa" occitana que se voldriá "dominanta" , malgrat que –e soi desolat per eles– me sembla que la sola causa que senhorejan un pauc son qualques bocinets dels tres sòus e mièg de las subvencions publicas per la "cultura occitana". A mesura que l'independéncia de Catalonha se vei mai possibla e mai reala, la catalanofobia d'aquestes "sénhers feudals" creis. Parli de mond fòrça divèrs, malgrat que tostemps son de mond fòrça vinculat a l'administracion publica –francesa, solide!–. Parli de cèrtes foncionaris que voldrián ascendir professionalament, cèrtes responsables de cèrtes partits politics que lor agradariá de poder sautar a la "vertadièra" politica –es a dire, la de París!–, cèrtes artistas qu'an capitat d'aver lor pichòta plaça que lor conven e son los nòus joglars de la "cort" que fan tot çò que plai al senhor feudal, cèrtes mèstres e cèrtes professors de l'educacion publica –mas tanben de l'educacion "associativa"!– qu'an assumit talament lo discors oficial que semblan mai una armada de soldats de Napoleon que defendon l'Estat francés que non pas de portaires de la coneissença e de l'obertura intellectuala coma deuriá èsser tot ensenhaire, d'associacions occitanistas qu'an paur qu'en se sarrant "tròp" de Catalonha pòscan èsser punidas pels "senhors feudals" e lor tiren las pichòtas subvencions que recebon... Per resumir: parli d'un bon ponhat de legionaris d'onor que, amb o sens de condecoracion oficiala, per pròpria volontat o per un mediòcre clientelisme de nivèl bas, trabalhan la nuèit e lo jorn per l'Estat francés per tal de manténer o melhorar lor posicion sociala. Es a dire, lor interés individual. E per demostrar que trabalhan plan per l'Estat francés, doncas, devon –almens publicament– se mostrar contraris als desirs de libertat de Catalonha, perque aquò marca plan. Devèm èsser conscients que uèi, en França, èsser anticatalan cotiza en auça. 
 
Atencion al virar l'esquina, que n'i a que semblan d'anhèls e qu'amagan d'arpas...



publicitat
BANER1-2-3: DGPL AN LAFONT



Comentaris

9 de setembre 19.58h

#20 Cf. comentari 19: en aqueste cas, lo catalan que hè com lo castelhan. Perqué aurem a har com lo castelhan ?

E puish, qu'ei hèra plan de crear mots, mes que'us cau socializar.

Aquò rai, a jo que m'interèssa mei la decoracion d'interiors :-D


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

9 de setembre 16.53h

#19 Qual es qu'a dit que "condecoracion" non es un mot catalan? http://www.diccionari.cat/lexicx.jsp?GECART=0033330 Pensi que "condecoracion" es un mot plan mai utile que "decoracion" per aqueste usatge, perque, justament, permet de copar lo doble sens del mot "decoracion", que sovent pòt menar a la confusion.

Vesi pas cap d'espanholisme... Perqué deuriam far coma lo francés? Lo catalan fa pas coma lo franc... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

9 de setembre 13.57h

#18 Lo men brave amic, lo dia qui posqui escríver en catalan, n'ac enviarèi pas tà publicar shens verificar cada mot suu diccionari.

Rapin qu'a "decoracion", "decorar qualqu'un". Aquò rai, que i a diccionaris occitan-catalan, be'n coneishetz un ?

"Condecoracion" n'ei pas un catalanisme (e òc, que'm soi mau exprimit), qu'ei un castelhanisme: http://lema.rae.es/drae/?val=condecoraci%C3%B3n E qu'ac sabetz hèra p... Legir la seguida


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

9 de setembre 11.48h

#17 Mon brave Bourdon, avètz degut préner leçons de critica al pèrp del jaurèl e primadenc Eric Gonzalés, per saber a la plaça dels autres çò que ne vira dels sieus trabalhs subre la lenga, e per devinhar çò que pòdon ben pensar de la pluèja quora vos parlan de la mar…

Lo jorn qu'escriuretz en catalan general tanplan coma Marçal Girbau s'esfòrça d'escriure en occitan general, vos serà autorizat de lo criticar sus un ton tant sentencioós e mespresant coma aqueste. Per ara, ... Legir la seguida


Valora aquest comentari:   votar positiu 2   votar negatiu 3
Respondre comentari replica Comentari inadequat   Formulari d'abús de comentari

8 de setembre 08.45h

#13 Los tèxtes de Girbau que son tostemps conhits de catalanismes. Parlar de l'occitan, de l'Occitania, balhar leçons, predicar davant los praubes indigènes qui n'an pas comprés arren, e tanben (d'autes qu'ac an dit) explicar que i a "bons" e "maishants" occitanistas, balhar bons e maishants punts e, d'aquera faiçon, contribuir a la catalanofobia qui eth medish denóncia), aquò qu'interèssa lo cronicaire deu dijaus de Jornalet. Perfeccionà's en occitan, aquò non l'interèssa guaire.


Valora aquest comentari:   votar positiu 7   votar negatiu 1
Respondre comentari replica Comentari inadequat   Formulari d'abús de comentari

7 de setembre 22.05h

#15 Pietadós... Aquò me fa mens galejar, ai l'impression de liegir de comentaris dau Figaro ò de partesans dau Tea Party... De creire que tot lo mau dau monde ven dei foncionaris.
Vergonhós... Tocaviam lo liberalisme fascisant ninòi amb Marçau, ara viam que capita de far sortir la bèstia de son jaç.

Òsca...


Valora aquest comentari:   votar positiu 6   votar negatiu 1
Respondre comentari replica Comentari inadequat   Formulari d'abús de comentari

7 de setembre 21.56h

Verta Marçal ! Los fonccionaris (o certes autes ligats a l'administracion) qu'avéren de defener l'occitan e qu'at hèn pas briga ( sonrisers per davant e còp de pau per darrèr) que n'i a a pielas !!!! N'en sèi quauquarren.


Valora aquest comentari:   votar positiu 3   votar negatiu 4
Respondre comentari replica Comentari inadequat   Formulari d'abús de comentari

7 de setembre 19.24h

#12 Tant se pòu !


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

7 de setembre 16.48h

*"condecoracion" es un espanholisme per "decoracion" tot simplament


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

7 de setembre 11.28h

#1 Es ironic aquel comentari?


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1
-
2
-
3 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL AN LAFONT

Perfil

Marçal Girbau

Marçal Girbau logo rss

Filològ e promotor cultural, especializat sus las relacions occitano-catalanas.

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions