CAPÇALERA: HISTÒRIA DE LA CUINA CATALANA I OCCITANA
CAPÇALERA2: FAI-TE SOCI

Jornalet, gaseta occitana d'informacions

Divendres, 13 de decembre

Joan-Marc Leclercq

Dimars, 24.11.2015 03h00

Après los atemptats, çò que'm chepica


Comentaris 6 comentaris    
Dolent Fluix Bo Molt bo Fabulós (4 vòtes)
carregant En cargament


Lo problèma de ténguer una cronica setmanèra que pareish lo dimarç, es que, quan un eveniment deus fòrça grèus se debana lo divendres, la cronica es dejà escrita e lo còp d’après, sembla arribar “après lo ausèths” coma dison en Silesia (Po ptokach), sia un drin tard.
 
Mes fin finala, vau mílhor balhar son sicut après que l’emocion sia un pauc recaduda que non pas suu pic en plen baticòr generau.
 
Coma a cada còp, cadun pensa que çò que’s arribat le balha rason e vei son biaish de pensar e sons arguments ahortits. Me brembi plan que, l’endoman de la caduda de las Tors Bessonas lo 11 de seteme de 2001, la Setmana i vesèva la resulta d’una politica estrangèra deus Estats-Units que tenguèva pas compte de las culturas, lavetz qu’un pastor protestant reaccionari nos assegurava qu’èra lo castig de Dius taus umans pr’amor de lor laxisme de cap a l’omosexualitat …
 
D’un biaish generau, la reaccion populara estoc meslèu bona, i avoc mès de vam de cap a la convivéncia deus òmis de bona volontat que non pas una debuta de guèrra civila etnica, çò que los terroristas volèvan, e a maugrat deus esfòrces desplegats peu Front National, aligats objectius deu terroristas. Drin totun assadolat per un deluvi de Marseillaises e de drapèus blau-blanc-rotge, estoi content que l’òrdi deu jorn de la manifestacion tolosenca estosse tanben “… contra las amalgamas.”
 
Aquestes eveniments an tantes aspèctes diferents qu’es complicat de’n vénguer a çò d’essenciau.
 
Çò que’m chepica a jo, adara, après aquestes atemptats, es d’aver un espiar un pauc mès eslhevat e de considerar la situacion dens son ensems.
 
Segon çò que digoc un ostatge deu Bataclan deishat liure peus terroristas, mes qu’avoc lo temps de parlar dambe un d’eths, lo tipe expliquèc que miavan aquesta operacion en represalhas aus bombardaments de l’armada francesa sus Siria. Aquestas bombardadas èran hèitas a la debuta ende lutar contra lo terrorisme. La responsa de l’Estat francés estoc d’intensificar sas atacas sus Siria. Podèm benlèu devinar la seguida: represalhas de l’Estat islamic contra las represalhas de l’Estat francés contra las represalhas de l’Estat islamic contra … m’atz comprés.
 
Deisharèi de costat una analisi de la politica estrangèra francesa e son ròtle dens la situacion actuala, fòrça observators ac hèn plan, coma l’ancian jutge antiterrorista Marc Trevidic que demanda de cessar lo doble jòc de demorar en gasanhas dambe Arabia Saodita e Qatar. Me concentrarèi sus l’aspècte deus bombardaments sus la vila de Raqqa.
 
Cau saber qu’una part de mons impòstes, coma ciutadan de l’Estat exagonau, van a la fabricacion de las bombas que son getadas sus la vila e au salari de’us que las largan. “LA” question que’m pausi, doncas, es: aquestas bombas blau-blanc-roge van pas tocar civius que serén pas sòcis de DAESH?
 
Mès d’una persona dambe qui parlèi d’aquò ça’m responón: “Se son acerà, es que son d’acòrdi dambe los djihadistas.” Ne soi pas tan segur qu’aquò. Es una vila de 196.000 poblants qu’estoc presa militarament per DAESH. Sèm solides que totis los que son demorats o qu’an pas podut s’escapar son islamistas radicalizats? Ne dobti.
 
Lo problèma es qu’am pas nada entresenha sus çò que’s debana aquiu uei lo dia e suus domaus eventuaus de las bombas. Imaginam qu’an pas hèit lo mendre mòrt. Botèm. Mes quan vesèm au finestron los reportatges sus l’espanta deus lotjants de Saint-Denis après l’intervencion de la polícia, podèm imaginar çò que viu una poblacion devath las bombas, pensi màgerment aus dròlles e a l’impact psicologic.
 
Quan l’aviacion francesa, sus mand de Nicolas Sarkozy, bombardèc Libia, n’avom pas tampauc nat reportatge. Levat un deu jornalista bèlga Michel Collomb que muishèc las victimas civilas que lo finestron exagonau nos muishèc pas. De mès, sabèm plan que, au cors de loras campanhas de bombardadas, los Americans an a còps tocat unas miras civilas e darrèrament un espitau tengut per Médecins Sans Frontières, çò qu’es pas ende’ns rassegurar.
 
Es doncas aquò que’m chepica. Se demandam aus musulmans d’estar clars per rapòrt au terrorisme hèit au nom de lor religion, podèm tamben ensajar d’estar rigoroses nosautes medishes de cap a la politica exteriora de nòste govèrn.
 
Acabarèi en tot díser que França, en mestior de politica estrangèra, fonciona coma una dictatura, pr’amor que lo pòble es pas brica consultat ni tampauc lo parlament, lo president es plenipotent, e es estat elegit en seguida d’una campanha electorau on lo subjècte estoc pas jamès evocat.



publicitat
BANER1-2-3: DGPL TRADUCTOR



Comentaris

25 de novembre 10.34h

Lo Sèrgi pausa LA bona question sus la proporcionala. Benlèu que la solucion es la Democracia Dirècta.


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

24 de novembre 20.09h

#4 Me sembla que conoissètz pas gaire lo foncionament de la "proporcionala" (ò qu'engolissètz un pauc tròp lei leiçons de bfmTV).
Se lo FN èra lo promier partit de França, auriá, de fach, pas de besonh de la proporcionala per aguer lo poder, l'auriá adejà.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

24 de novembre 18.03h

E òc, car Matiu Castèl, es pas lo mendre dels paradòxa de "la domocracia a la francesa"! Se coma o demandi ieu, la "democracia a la francesa" èra vertadièrament democratica e que la representacion se fague enfin A LA PROPORCIONALA, malurosament lo FN seriá lo partit qu'auriá lo mai de conses, de conselhièrs despartamentals, etc...
Amb aquò nautres, democratas, deuriem renonciar a la democracia e a son marcaire màger qu'es la proporcionala? Que ne dises?


Valora aquest comentari:   votar positiu 2   votar negatiu 2
Respondre comentari replica Comentari inadequat   Formulari d'abús de comentari

24 de novembre 12.56h

#1 primièr de França ?

Quant an de cónsols sus lei 36 000 de França tota ? Quant an de deputats ? De senators ? Quant an de conselhiers generaus ? De conselhiers regionaus ?

E quant an de sòcis ? Sus lei darrierei chifras que viguèri, son luenchs d'èstre lo premier partit de França (ò d'Occitània).


Valora aquest comentari:   votar positiu 4   votar negatiu 1
Respondre comentari replica Comentari inadequat   Formulari d'abús de comentari

24 de novembre 08.30h

Quan escrivi aquò, cau saber que "aligat objectiu" vòu dîser que fin finala seguisson la medisha tòca sus un punt (au mens) : hè nàisher la confrontacion entre comunautats. Es aquò estar "aligat objectiu", coma dens totis los conflictes, los estrèms de cada costat son aligats objectius.

La mira aquî es pas de lutar contra lo FN mes de muishar çò que los terroristas vòlon e de dîser que càder dens lo refùs de l'aute es estar aligat objectiu deus terroristas. Lo FN, dens son meeti... Legir la seguida


Valora aquest comentari:   votar positiu 10   votar negatiu 3
Respondre comentari replica Comentari inadequat   Formulari d'abús de comentari

24 de novembre 07.57h

"Front National, aligats objectius deu terroristas", encara un còp nos fasem plaser. Es pas amb una logorrèa atal que frenarem la pujada del primièr de França e probablament -malurosament- d'Occitània. L'exageracion -quand es pas lo refús de la realitat- tua lo messatge.


Valora aquest comentari:   votar positiu 7   votar negatiu 14
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL AN LAFONT

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions