CAPÇALERA2: AMICS DE JORNALET

Jornalet, gaseta occitana d'informacions

Dissabte, 16 de decembre

Joan-Marc Leclercq

Dimars, 28.11.2017 03h00

La planeta es fotuda … e me’n foti!


Comentaris 8 comentaris    
Dolent Fluix Bo Molt bo Fabulós (7 vòtes)
carregant En cargament


Aqueste article se pòt aperar un “bilhet de ruca”. Es partit d’una anecdòta que m’es arribada aquesta setmana. Mes vos pòdi rassegurar, soi pas tan esmalit, me soi plan apatzat entertant.
 
A la debuta de la setmana i avèva sus Tolosa çò que s’apèra un “som de pollucion”. Pr’amor d’aquò e ende baishar la taus de particulas primas dens l’aire, la velocitat deus veïcules a motor èra redusida de 20 km a l’ora. Cau díser que las particulas primas, que s’entrodusissen pergondament dens los paumons, son responsables de la mòrt d’un miei milion de personas en Euròpa cada annada. Es seriós.
 
Calèva doncas caminar a 70 km/h sus la rocada au lòc deus 90 costumèrs. La ràdio n’avèva parlat tota la matinada e los panèus electronics ac muishavan plan. Una amiga mia, drin capleugèra, a comprés que calèva carriular a 20 km/h abans de comprénguer!
 
Mes aquò rai. Me soi lavetz apercebut, en tot seguir nòsta famosa rocada pendent las tres oras quan es pas emboçada (11h-14h), que paucas veituras respectavan aquesta consigna de bon sens. A la debuta, me soi dit qu’èran màgerment monde de l’endehòra qu’èran pas au sicut. Efectivament, las placas ac muishavan. Mes un còp passat lo panèu electronic qu’assabentava totis, èi començat de’m demandar dins quin monde vivèvi.
 
A còps pòdi estar fòrça repotegaire, e me soi susprés de rotlar sus la via d’esquèrra a 70 km/h. Es pas tròp finòt, vos ac concedissi, mes vos l’èi dit, èra enmalit. Darrèr de jo, miaires engèrcs que’m volèvan passar e que tutavan. Au cap d’un moment, la rason me tornèc (e èri arribat a la sortida de Lo Nòu on anavi) e deishèc mons contemporanèus solets dambe lors motors Diesel.
 
Vos pòdi assegurar que passèi lavetz una mieidiada de descoratjament sus l’espècia umana. Me soi demandat se valèva la pena de’s hèr cagar end’una umanitat que compreng pas ren, que vei pas mès luenh que non pas lo cap de son nas.
 
Me soi dit qu’anèri jo crompar tanben una veitura Diesel, que m’anèri pas mès triar las dèishas, balhar pas mès ma sang cada tres meses, qu’anèri votar Macron, espiar TF1, minjar carn, deishar l’occitan, aimar Halloween e perqué pas lo Black Friday, e escríver cançons en anglés ende ganhar mès de moneda …
 
Per astre, aqueste sentit perdurèc pas tròp. Soi apatzat, mes vesi se que non que la presa de consciéncia per rapòrt a çò que la planeta risca es teorica. Ne parlam, solide, enfin, pas tròp sovent e tan que sèm pas geinats dens nòsta vita vitanta, comprenguèm pas.
 
Vist au finestron, un reportatge sus l’estacion d’esquí les Trois Alpes que, peu purmèr còp, daubrissèva pas pendent las vacanças de Marteror pr’amor qu’i avèva pas nada nèu, e aquò peu purmèr còp. Bons explics sus la situacion, levat qu’a pas cap moment lo mot “recauhament climatic” estoc prononciat peu jornalista.
 
La còsta de Gasconha es roganhada per la Mar Grana, a La Canau, un escalèr de beton estoc redusit en calhaus e la municipalitat a decidit de desplaçar lo centre-vila pr’amor que la mar ganha tròp cada annada. N’atz ausit parlar? La sitruacion es meslèu mès grèva que çò que sabèm.
 
Me cau me forçar ende’m díser que l’umanitat evoluís dens lo bon sens, mes a còps lo descoratjament nos pòt gaitar. Espèri qu’èra pas qu’un petit truc de flaquèr. Semblaré qu’òc, torni espiar mons contemporanèus dambe hidança.
 
Dinc au som de pollucion que veng?
 
 
 
 
 


abonar los amics de Jornalet
 



publicitat



Comentaris

30 de novembre 19.02h

#4 Sèm totes lo fin d'un e lo piòt d'un autre…


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

30 de novembre 16.09h

Ah la consciéncia !
Quand ben mèsma tu volèssas far del conh, qu'aquò ne t'en seriá pas de bon far.
Per tant que la coneisséncia avançe, la consciéncia n'en sièc pas mai le camin.
La regulacion se farà, tòst o tard, volent, non volent, politica o selvatge, en començant d'ambe les plus fèbles. L'ecologia n'es pas que le quite reflècte de la natura del monde.
Cal nadar pròpre en aquelas aigas trèblas, sens pensar i èsser d'exemple.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

29 de novembre 23.44h

#2 Ende jo, "mieidiada" es lo contengut de la mitat d'un jorn, e "mieidia" es lo punt de la jornada au miei.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

29 de novembre 22.29h

L'adaptacion se farà tòst o tard, volent o volent pas, en començant d'amb los plus fèbles e finint dinc en aut, de per regulacion politica o salvatge.
Amb aquò, l'ecologia es pas que lo reflèit d'un desequilibre general, qu'encara grand monde i ten.
Fisança o pas fisança, aquò depend de son estat psicologic.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

29 de novembre 15.28h

#3 Quin comentari piot d'un que se crei mai fin que non pas los autres, coma s'avia pas cap d'idèa preconcebuda e d'ideal dins lo seu cap e qu'aja tot comprès del mond ont vivèm en tot fasent son cinic... pfff


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

28 de novembre 22.53h

— Èi començat de’m demandar dins quin monde vivèvi.
— Perqué ? Ne sabes un autre ?

— Passèi lavetz una mieidiada de descoratjament sus l’espècia umana.
— Mièjajornada son que ? E cossí fas per capitar d'o fa passar tant aviat.

— Valèva la pena de’s hèr cagar end’una umanitat que compreng pas ren.
— Plan segur que non ! Qué cresiás fins ara ?

— Me soi dit qu’anèri jo crompar tanben una veitura Diesel…
— Perqué ? Creses qu'amb una essença, poluïsses ... Legir la seguida


Valora aquest comentari:   votar positiu 3   votar negatiu 2
Respondre comentari replica Comentari inadequat   Formulari d'abús de comentari

28 de novembre 19.31h

Digatz-me Mossur Leclercq la « mieidiada » es la pausa de miègjorn o l''après-miègjorn ? Mercés.


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

28 de novembre 09.11h

Partegi totalament le contengut de l'article e le sentiment de l'autor e cresi que compreni plan las causidas sieus. Mas en legint aquesta frasa:
"Me soi dit qu’anèri jo crompar tanben una veitura Diesel, que m’anèri pas mès triar las dèishas, balhar pas mès ma sang cada tres meses, qu’anèri votar Macron, espiar TF1, minjar carn, deishar l’occitan, aimar Halloween e perqué pas lo Black Friday, e escríver cançons en anglés ende ganhar mès de moneda…"
me som, ieu, demandat se... Legir la seguida


Valora aquest comentari:   votar positiu 11   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions