CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Dimècres, 18 de setembre

Joan-Marc Leclercq

Dimars, 19.12.2017 03h00

Ei pas jamès cresut au Pair Nadau


Comentaris 3 comentaris    
Dolent Fluix Bo Molt bo Fabulós (5 vòtes)
carregant En cargament


Aquò pòt paréisher susprenent, mes nòsta mair a pas jamès volgut que sons dròlles cresossen a la legenda deu pair Nadau. Sa rason èra simpla: avèva tan patit quan s’èra assabentada de çò qu’existissèva pas, s’èra sentida tan engarçada peu monde deus adultes, que volèva pas que sa descendéncia ne subiscosse las medishas esgòrras.
 
Sovent, quan disi aquò a quauqu’un, sa responsa de tira es: “Òh, praube, quina manca d’astre!”
 
Vòli rassegurar tot lo monde, èi pas particularament patit d’aquesta situacion, e diserí meslèu qu’aquò me valorizava de cap a mons amics d’escòla. En efèit, èra dens lo secret deus grans e me’u calèva guardar dabans los autes.
 
Podètz imaginar de la hèsta de Nadau en çò nòste èra redusida a la part mès congrua. Solide que recebèvi un present au pè deu …, non, i avèva pas tampauc d’avet, mes l’ostau èra totun ondrat per garlandas.
 
La màger part de la hèsta de hasèva vertadèrament lo 25 a mieidia dens Armanhac dambe tota la familha. En comparason, la “velhada” deu 24 au ser èra meslèu de las bracas. Segon un sondatge efectuat au près de las personas de mon edat presentas, ma sòr auré pas tampauc patit d’un programa de Nadau tròp simplificat.
 
Per contra, podètz imaginar que lo hèit de pas créser au pair Nadau a consequéncias sus l’adulte que soi. La purmèra, solide, es que lo periòde de Nadau n’es pas mon preferit dens l’annada. Tot me sembla gaujós, mes faus. Sabi plan que se hesteja la naishença de Jèsus, mes aquesta estoc plaçada au sègle IV-au au moment d’una vielha hèsta pagana (Sol Invictus) fòrça mès anciana. Jèsus seré vasut probable en octobre.
 
La dusau consequéncia es que’m pòdi mauaisidament hèr “gahar” per un raconte quin que sia. Pòdi pas jamès “entrar” dens una ficcion, film o líber, que’m sembla lo frut de son creator, e que serà de tot biaish luenh de la realitat. M’avegi au cinèma. Soi tostemps a estudiar dambe quins artefactes l’autor ensaja d’enganar son public. Sabi que lo mot “enganar” es tròp fòrt, caleré milhor díser “encantar, embelibar”, que tot aquò me sembla manipulacion consentida.
 
La tresau consequéncia, l’atz dejà endevinada, es que caleré inventar un aute mot ende jo per parlar de “mauhidança” quan quauqu’un me conda quicòm. En comparason dambe jo, lo Sent Tomàs es lo rei deus ninòis credules. Vos rasseguri, parli pas de mas relacions dens la vita vitanta dambe lo monde que m’entornejan, mes de ma percepcion de tot discors politic o istoric.
 
Quan ausissi un politician parlar, me sembla de tira tornar víver mon mainadèr, quan los autes dròlles cresévan çò que los adultes les disèvan. L’actitud comuna de cap a un devís politic es de’u créser a la debuta e de’s demandar çò que’s va debanar dens l’avenidor, se lo tipe tenguerà paraula o de qué cambiarà.
 
Mon actitud es drin diferenta, considèri a la basa que l’orator mentís per interés personau e’m demandi s’i a pas aquí dedins quicòm que, en fèit, fin finala, seré vertat. Dinc a ara, aqueste pausicionament se muishèc majoritàriament mès racionau.
 
Se que non, Bon Nadau a totis!
 
 


abonar los amics de Jornalet
 



publicitat
BANER1-2-3: DGPL DICTADES



Comentaris

19 de decembre 18.01h

Adiu Joan-Marc, vòu dire que te plasen pas los contes de fadas o las literaturas de l'imatginari ? Me fai paur, a me, un monde que seriá completament racionau maugrat qu'aime pas beucòp lo periòde de Nadau mas per 'mor qu'es subretot un afar comerciau.


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

19 de decembre 13.34h

Polit article!
A! las faulas e las creséncias que van amb elas...l'istòria, las religions, las informacions....
Se i a de faulas, qu'es que i a un mercat de la faula, d'afaulaires e d'afaulats qu'en tornan demandar.
E aquò se formata tot pichon estant, tal com descriptat dins l'article.
La manipulacion, la fabrega de la idèas...


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

19 de decembre 10.37h

"mes nòsta mair a pas jamès volgut que sons dròlles cresossen a la legenda deu pair Nadau. Sa rason èra simpla: avèva tan patit quan s’èra assabentada de çò qu’existissèva pas, s’èra sentida tan engarçada peu monde deus adultes, que volèva pas que sa descendéncia ne subiscosse las medishas esgòrras".
Aquò, òc, es responsable, onèste e respectuós dels mainatges.


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL DICTADES

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions